ولنا في الخيال حياة أخرى (مكتمله)

بارت ٤

معقوله يطلع ورا ‏ سر جبير زين هو شيشتغل صار
عندي فضول ‏ اعرف عمرة شكد شيشتغل مزوج لا وليش يجي هنا
كل فترة ويروح  شنو سالفته  وصار الفضول عندي ازيد

  وظليت انتظره وتعدت ال2بالليل وهو ماكو ولمن رجع  رحت للغرفه وسديت الضوة  وفتحت شويه من الباب وكمت اباوعً ردت اعرف هذا شبي
بس غرفتي الدرج يصير كدامها واني لمن جنت اباوع
شفته اجى وصعد على الدرجً وجان يمشي على كيفه بس عبالك جانت هدومه مخربطه مجنت هالكد اكدر اباوع بوضوح خفت لايشوفني اذا افتح الباب اكثر وجان البيت اظلم
ورحت نمت بفراشي وظليت افكر وبعدين محسيت على نفسي غافيه وكعدت الصبح على صوت اصياح وشفت مصطفى وشدن ماكو تخبلت كمت اركض عبالي صار بيهم شي طلعت شفت باب المطبخ مال برة مفتوحه ورحت بسرعه شفت عمتي دتعيط
وجان واكف زيدون وطه  واكو رجال جبير واكف يمهم
ومصطفى وشدن خاتلين ورة الحايط من الكراج ويباوعون
اول ماطلعت من باب المطبخ وجان اشوفني عمتي وجان تجي عليه ركض وجرتني من شعري  واجى زيدون ركض عليها
وجرني ‏وكفني ورا
....وكال لعمتي
.....طلعي منا ماااريد اشوفج واذا تمدين ايدج عليها اكسرها
....هذوله ولد اخويه انت لتدخل ليش اخابرلك الشرطه
...اذا بيج خير سويها وشوفي شسويلج انتي والشرطه الي تهدديني بيهم
روحي منا ترة وصلت ويايه لهنا
....انطيني جهال اخويه بااي حق مبقيهم يمك
....معليج انتي روحي منا انتي مرة جبيرة لتخليني اتصرف وياج
غير تصرف
....شسويلي قابل
... ‏يا أمة محمد  ترة دجيبين اخرتي وصارلج ساعه دوختيني روحي منا ميرجعولج بعد لان ميريدوج كوة خوما كوة
....اي انت مكيف بنات اثنين شابات يمك وهاي الواكفه تتحامه بيك حلوة وعيونك زغللت  عليها
....لو انتي مو مرة جان ضربتج ضرب لحد ماتموتين بس راح اسكت لان انتي خطيه مريضه لو مو مريضه متسوين هيج بجهال اخوج واخر مرة اكلج روحي ومااريد اشوفج بعد ولو يبقى اخر يوم بعمري مااخليهم يرجعولج والمن تريدين اجيبين روحي جيبي
بس اقسم بالله لاافتح عليج ابواب جهنم
وعمتي ادكلي
....لج خياااال تعاي هنا  والله لااكطع شعرج اني اعلمج تنهزمين من البيت ماعندج اخلاق اني اشوفج
ولج كوليله ‏ لهذا وتعاي رجعي ويايه
....جنت واكفه ورة زيدون وكتلها
...ماارجع  اني راح اروح بغير مكان
...ولج طالعلج لسان ولج معزايه  وين راح يوديج هذا
....احترمي نفسج عد زين صار هوايه اجاوزتي بس انتي لو رجال جانت ضربتج والله وكيلج هي ضربه وحدة واوديج يم العزيز الكريم   بس ساكت لان اكول عجوزة
ومخرفه
....اني مخرفه ‏
...اي خطيه واصله ‏ المرحله الاخيرة
....اوكف شوف شسوي بيك  اني اعلمك
....روحي منا روحي يله لضوجيني لحد الان ترة بعدني مضايجً
...انت واحد غريب بااي حق تتهجم علينا بالبيت وتضربني وتدفعني وتاخذ الجهال  مني
....هههه والله انتي موطبيعيه اني ماضربتج ودفعتج بس هسه دافكر اسويهن
.....مصطفى تعال يم عمه تعال امشي نروح للبيت واني اشتريلك الي تريدة
صحت عليها
....معليج بشدن ومصطفى وخلص منرجع عندج بعد منريدج
انتي سنتين عذبتينا ‏ وموتينا جوع ودكعدينا ودكومينه بالكتل
منريدج روحي منا
....سكتي لج ترة اجي اكسرج ومحد يوكفلج
....باوع عليها زيدون وجه صار احمر وعيونه كامت اذب شرار
....فكري تتقربين يمها بس فكري شوفي شسوي بيج
والرجال الجبير كام يحجي على عمتي يكللها
.....حرام عليج انتي هذوله الجهال تعذبيهم وضربيهم
انتي متخافين الله شلون واحد ‏يأمن بيج على هذوله الاطفال
والله اذا استاذ زيدون مراح يرتب وضعهم اني اخذهم يمي
الله واكبر شنو هيجي ماتت الانسانيه ودكاطعت الدنيا اخت متحن
على ولد اخوها وتعذبهم وتاذيهم حسبي الله ونعمه الوكيل بيج
شوفي الله شلون راح يعاقبج عقاب وكون عقابج دنيا واخرى
.عمتي كامت تنكر ودكول
.....اني مامسويتلهم شي فوك مامنومتهم ومكعدتهم وموكلتهم بلاش
زيدون,,،بلاش ليش موحتى اطلعين بالليل بالبرد خيال
تغسل الكراج
....لاماكو هيج شي
....لتكذبين اني شفتها
اني طهت عندي انو اكو احد كمشني بالليل من جتفي
ولمن نهزمت ورجعت عمتي دور مجان اكو احد وبوقتها شفت مفتاح بالكاع ولمن شفت طه اتصورته هو
بس هسه اتضحت الصورة انو زيدون هو الي جان بالكراج مال
بيت عمتي وهو الي كمشني وكع المفتاح مالته
بس ليش اجاني وجان يريد مني
وليش مذكرلي هذا الشي
ورجعت من صفنتي على ذكر اسمي
....خيال
...نعم
......بيج شي
...لا مابيه
وعمتي كامت ادردم وتحجي وتتحلف وخلت وطلعت من الباب. وطه جان ديحجي وهذا الرجال الجبير هم جان ديحجي بس
زيدون جان ديباوع عليه بنظرات وكاانما بيها علامات استفهام جان يريد يعرف سبب شرودي  شنو
بس اتفأجات ايضا لمن سمعت هذا الرجال يكله لزيدون
ابو اوس
‏يعني هو مزوج لعد ليش معايش ويا مرته
صارت عندي هوايه اسئله اتمنى اعرفها عنه مو علمود شي بس مجرد فضول اريد اعرف شي عنه
وبعدها دخلته للبيت وتريكنه وكالمعتاد زيدون ساكت وطه يحجي شويه لان يخاف من عمه و ميحجي ويايه كدامه كلش قليل
بس ورة الريوك زيدون طلع  من البيت وطه كعد يسولف ويحجي ويايه بحريته
وعلى طبيعته وكلت خلى اسئله عن عمه و شنو موضوعه
....طه
....نعم
...صراحه عندي فضول
...بخصوص شنو
....عمك شيشتغل ومزوج لان اليوم لرجال صاحله ابو اوس
وشكد عمرة
....ها اظاهر فضولج صاير كلش قوي
...هههههه اي صراحه
.....باعي عمي عمرة 31سنه  اصغر واحد بعمامي
هو يشتغل مقاول هذا الي اكدر اكوله وضحك طه
وهو جان مزوج زوجته اسمها فداء وعندة ولد اسمه اوس بس انقتلو
وعمي بعد مزوج وعايش وحدة
....ياخطيه  اكول شكله دائما حزين بس شلون انقتلو
.... باعي لتحجين كدام عمي لان يضوج احد يحجي بهذا الموضوع واني هسه راح اكوم وبعدين  نسولف
وكام طه وراح بس عافني بدوامه   وانو هو صدك مثل مافكرت اكو سر ورا وليش انقتلت زوجته اني كمت اخاف
اكو شي غامض  بس كلت يله هي يومين واروح منا اني شعليه
ليش ادخل زيدون بالنسبه النا ساعدنا وانسان جيد ويانا
اني شنو الي دخل بس المشكله بلاانسان دائما يكون عندة فضول
ويحاول يعرف كل الي داير مدايرة اذا كان هذا الشي يهمة او لا
يحاول يعرف كلشي لمجرد الفضول
كمت دخلت جوة وكلت خلي اسويلهم اكل صار يومين يجبون اكل من برة واني اكلي طيب  خلي اطبخ وكمت ادور على الغراض واسوي اكل وجان مصطفى يلعب ويكمز وماخذ  راحته
وشدن جانت دساعدني
ولمن خلصت الاكل رحت كعدت بالحديقه لحد ماسمعت
مصطفى يكلي
.....اني جعتً وداشتم ريحت  ‏اكل طيبه
...هههه اي اليوم الاكل طبخ مال بيت صنع يدي
....يله خلي ننتظر عمي منا لشويه بلكي يجي واذا تاخر ناكل زين
.....زين ننتظر
وشفته كعد يشاقه ويامصطفى ويسولف ويا شدن
وشدن صافنه عليه ضحكت عليها
شدن جانت كلش مدللة ومدتكبر وياريت لو يصير تفكيرها مثلي حتى اطمن ‏ عليها
وسمعنه صوت الباب نفتحت ودخل زيدون
اول وحدة باوع عليها اني  وشاف مصطفى واشرله كله
....تعال
مصطفى راح بسرعه
‏ ‏انطى علاكه  بيها غراض وكله هاي كلهن الك
صراحه انقهرت عليه يمكن جان يتخيل بمصطفى ابنه ‏ الي مات
كلبي نكسر عليه
وشفته يلعب بشعر مصطفى ويضحكله
شويه وجيت ابجي كلش اتاثرت بحيث عيوني غوركت اني بطبعي كلش عاطفيه بحيث من اشوف احد يبجي كدامي اكوم ابجي
ولمن ديدخل زيدون للبيت شافني كلي
...شبيج خيال
....مابيه شي
....لعد شبيها عيونج شنو جنتي تبجين
.....لا
ظل يباوع عليه وهز راسه ودخل جوة
ودخلت ورا وبديت احضر الاكل. وسمعت صوت على الدرج
عرفت انو زيدون نزل من فوك
ودخل للمطبخ وكعد على الميز وماحجة  اي شي
وصاح طه
....اي عمو
....يله تعالو اكلووو
....اي جينا
‏وحضرت الاكل وخليته على الميز جنت اباوع زيدون
ياكل ويباوع على مصطفى ويبتسمله كل شويه
واني كلبي كام يوجعني عليه
كلت بكلبي الله يساعدك شلون متحمل 
بس هو مبين انسان يكابر هوايه
اما بالنسبه لشدن يحجي وياها كلش طبيعي ودورات اشوفه يضحك على سوالفها بس ويايه جان يباوعلي ويصفن وبعدها يدير وجه ماادري ليش احسه  ‏يذكر بيه شي
او من يشوفني يحس بشي يأذي ماااعرف مجرد احساس
ويجوز احساسي غلط ويجوز مثل ماكلي بعدني صغيرة ومشاعري
مو واعية
وبعد ماكملنا الاكل هو كام صعد لغرفته وبعد ماشفته وطه جان يقرا واني هم دخلت للغرفه وظليت افتر بيها ماعندي شي اسوي
ولمن صار العصر طلعت وسويت جاي وطلعت بسكت
وصحت طه  كتله
....طه وين عمك خلي يجي يشرب جاي
....يمكن فوك
...ادز مصطفى يكله
....يله دزي وخلي نطلع بالحديقه واني راح اطلع قبلكم شويه افتح المي اسكي الزرع
...زين
....مصطفى
....ها خيال
....باع اصعد فوك صيح عمو زيدون كله تعال اشرب جاي
....هسه اصعد
ومصطفى كام يركض على الدرج
....مصطفى لتركض لتوكع
وصعد مصطفى بس طول كلش
كلت هذا وين راح دادز شدن شفتها برة يم طه
كمت صعدت اني شفت  باب الغرفه مال  زيدون مفتوحه
باوعت جان زيدون نايم ومصطفى نايم على يده
وماادري شيكله ومصطفى طاك من الضحك
ظليت واكفه اشوفهم لحد منتبه زيدون عليه
....اشو واكفه
.....مواني دزيت مصطفى يكلك تعال سوينا جاي وراح نطلع للحديقه نشربه
...اوكي
...وكال لمصطفى يله انزل جوة قبلي
ومصطفى كام ركض ولمن ديركض وكع اوراق جانت على الكومدي
الي يم الجربايه مالته ونهزم
وصحت على مصطفى
....اني اعلمك مصطفى شوف شسويت
ورحت وكمت الم الاوراق  وزيدون جان واكف يباوع عليه
لمن وكفت وخليت الاوراق على الكومدي ونداريت داروح
سمعته يكلي
.....اشو باعيني
....شكو
....هاي صار ثالث مرة من تشوفيني اباوع عيونج بيها دموع
شبيج خايفه مني
اني ماااذيج صدكيني
.....لامخايفه منك بالعكس اني احس هنا بيتك احنا باامان ومحد يكدر ياذيناا
....لعد شبيج
.....مابيه
.....متريديني احجي وياااخوج
.....لالويش مااريد بالعكس افرح
...لعد شييج شكلج طه
....ماكلي شي
.....متاكدة
.....اي
.....كلج عندي ولد مات مو
...ماكدرت اكذب كتله  اي
....لتخافين مااسوي شي لااخوج صحيح اخوج يذكرني باابني
لان من عمرة تقريبا
....اني اسفه وموقصدي تاذي اخويه بس صراحه انقهرت كلش
....شنسوي هاي الحياة
....انت تشتاقلهم اكيد
سكت وظل يباوع بوجهي وكاانما اخذته الدنيا ودته لغير دنيا
.....وجر حسرة
.....هوايه اشتاقلهم
....الله يكون بعونك وينسيك وان شاءالله تزوج ويصير عندك اطفال
.....تعتقدين
...اكيد احنا هم فقدنا ابويه وامي وتعذبنا هوايه يس شنسوي ماشيه حياتنا ‏
.....بس الي احس بي يختلف عن الي تحسون بي انتو
مفتهمت قصده مكدرت اجاوبه لان ماااعرف شيقصد
....اني راح انزل جوة  واذا تحب تعال اشرب جاي
....هسه أجي

يتبع ....