وبعده لهسه نزفك حار هاي الصورة بتاريخ ٢٧ - ١٠ - ٢٠١٩ قبل إستشهاد صفاء بيوم وواضح بيها على صفاء كل علامات الثائر الحقيقي، أخذها ويه أصدقائه بعد إستنشاقهم للكثير من دخان قنابل الغازات المسيّلة للدموع، نفسها القنبلة الي إستقرت براس صفاء ثاني يوم بعد هذي الصورة. . صفاء السلمي الي ما چان شايل غير العلم بإيده تصوّب بإيده بتاريخ ٢٥ اكتوبر وما چانت إصابة بسيطة، جرحه ظل ينزف لحد ليلة استشهاده رغم إصابته، وضاع تلفونه بيومها، رغم التعب الي مبين عليه بالصورة، رغم التهديد ومخاطرته بحياته بقى صفاء ثابت بالتحرير ويهتف للوطن
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
صفاء خريج الجامعة التكنلوجية صفاء المثقف صفاء الشاعر صفاء الرسّام صفاء الفنان صفاء الحمّال صفاء العرضچي صفاء إشتغل كل شغله شريفة ممكن تخطر على بالكم حتى يعيش بشرف ومن ضحكتله الدنيا وتعيّن معيد جامعي بجهده وتعبه باگوا عمره الأنذال بعدها بإسبوع وما لحگ يداوم كأستاذ جامعي غير ٤ ايام.. صفاء ما فكر بأنانيه وگال ما دام تعيّنت ماكو داعي أتظاهر، بالعكس چان العراق همه الأكبر و الله شاهد ياما إنعرضت عليه تعيينات مقابل يترك التظاهر ورفضها وفضّل يبقى حمال ولا يخون مبادئه وبقى يتظاهر من ٢٠١١ لحد آخر يوم بعمره
ما قبل يبيع الوطن ولا باع ضميره وشرفه چان أكبر حلم عنده يشوف العراق نظيف وحلو ويشوف العراقيين ماخذين حقوقهم وعايشين مثل الناس . صفاء اليوم يريد منكم تكملون مسيرته ما يريد تنقهرون عليه، صفاء باقي حي وخالد يريد منكم تدعمون الثورة كل واحد حسب مقدرته يريدكم تتظاهرون وتحبون العراق وتخافون عليه يريدكم تساعدون الناس الفقيرة والأيتام مثل ما چان يسوي يريد يبقى عايش بداخل كل واحد منكم بتصرفاته . ثورة صفاء نظيفة وهدفها تطالب بحق كل عراقي فلا تخلون أي تصرف فردي يشوه صورة الثورة بنظركم، ويمنعكم عن المشاركة بيها بعد إنتهاء الوباء. هذي أعظم ثورة بتاريخ العراق الحديث وما لازم نضيّعها.
صفاء ما مات ولا راح يموت موجود بداخل كل ثائر وكل عراقي شريف صفاء فكرة، والفكرة ما تموت #ابن_ثنوة_مايموت . ٢٧ اكتوبر ٢٠١٩ | أمام مكتبة التحرير ، بداية شارع السعدون من جهة جسر الجمهورية، صفاء كان هنا.
