Sa pagsikat ng araw ay minulat ang mga mata
At muling napagtantong wala ka na nga pala
Sa aking pagtulog ay muli kang nakita
Ngunit paulit-ulit isinasampal na hanggang panaginip lang talaga.
------------------------------------------------------------
Di makatulog kakaisip kung ano ang dahilan
Kung bakit tila ba nagmadali ang ating orasan
Kung bakit hanggang ngayon ako'y di makaahon sa nakaraan
Patuloy na naglalayag sa dagat ng kalungkutan.
------------------------------------------------------------
Lahat ng sakit ay pinapaalala sa akin ng umaga
Tanging sa panaginip lang ang tagpuan nating dalawa
Minsan nga'y hinihiling na sana'y hindi na muling gumising pa
Na sana'y haharapin ko ang bukas na ikaw ay akin ding makakasama.
------------------------------------------------------------
Tinatanong ang sarili kung ano nga ba ang pakiramdam
Yakap at haplos mo ay ang pinaka-inaasam
Siguradong pagkasabik ko'y hindi nila alam
Nais kang makasama ngunit mahirap ding mamaalam.
------------------------------------------------------------
Ano nga ba ang pakiramdam na kahit pagod ay makakahanap ng pahinga?
Na kahit malungkot ay magkakaroon ka ng saya't pag-asa?
Na kahit mahirap ang sitwasyon ay may mayayakap at may matatawag kang "ama"
Sana'y meron din ako, kahit man lang mapanghahawakang alaala.
------------------------------------------------------------
Sadyang mananatiling pangarap kung hihintayin kitang bumalik
Kahit pa lumipas na ang panahon ay hindi nabawasan ang aking pagkasabik
Alam ko namang balang-araw ay magkikita tayong muli
At sa panahong iyon ay hindi na sa isang... panaginip.
Enit-sirhC
