في البدايه احب اعرفكو بنفسي وان انا ليه قررت اكتب حكايتي... حكايتي مرطبته بكلمتين بس (فقد استجاب)...
انا إسراء عندي حاليا 24 سنه... حكايتي بدات من خمس سنين اما دخلت الجامعه اكيد هيجي في بالكو ان اما دخلت الجامعه كنت بلبس لبس مش كويس واتعرفت علي شله ولاد وبنات والكلام دا كله احب اقولكو ان لا....
اما كنت في الترم التاني من الكليه جاتلي رساله علي الماسنجر بتاعي كانت من شاب انا مكنتش عارفه ساعتها اعمل ايه او ان لو رديت هاخد الذنب بس انا رديت وقولت ان مش بكلم شباب نهائي وكدا وسبت الفون بتاعي عشان كنت رايحه اصلي.. قولت اصلي وبعدين اعمل بلوك.. بس والداتي جت وشافت رساله وافتكرت اني بكلمه واعرفه والكلام دا انتو عارفينه وزي اي ام ضربت بنتها وكانت هتاخد مني الفون بتاعي... الحوار خلص بس تلقيح أمي عليا مخلصش... عدت الايام وانا الحمد لله اتغيرت جدااا.... اتغيرت للاحسن الحمد لله قربت من ربنا وانا كنت مختمره من الثانوي بس كنت بعيده عن ربنا كنت بحب اللبس الواسع جدااا... هكملكو الحكايه...
بعد اما عدي تقريبا سنه علي الموضوع دا تماما كان في حادثه حصلت ولقيت من ضمن الشباب اسم الشاب دا... اتخضيت جداا وقلقت وقررت ادخل اكلمه تاني... وبالفعل كلمته كنا قبل رمضان بشهر اتكلمنا شهر قبل رمضان... دخلت سألت عليه وقولت ليه علي الحادثه وطلعت تشابهه اسماء كنت بنتكلم كل يوم علي قد الحاجه كان بيسألني عن الصلاه ويعمل اي ف رمضان ويستعد ازاي كنت اما أصوم في شهر شعبان كنت اقوله يصوم ومكناش نتكلم غير تاني يوم.... اكيد هتفكرو اننا حبينا بعض وكدا بس اقولكو ان لا محصلش لان الكلام كان سطحي عن الاهل الدراسه البيت واي مشكله مع التاني وعاوز يحلها.... كنت وانا بكلمه بحس بتأنيب ضميررر اووي واقول ازاي انا اعمل كدا بس الشيطان كان اقوي مني..... جينا بقي قبل رمضان هوا إتكلم معايا وقالي ان نفسو يختم القرآن قراءه في رمضان وانا شجعته وقولتله توكل على الله انت ممكن تقدر تختم مرتين مش مره واحده....
طبعا هتقولو واهلك فين؟؟؟ مش كدا...
انا كنت بسيب الفون عادي وزي ما قولت الكلام كان عبي قد الحاجه وبس...
كان خلاص فاضل اسبوع عن رمضان قولت لا انا لازم ادخل بقلب نضيف وابعد عن اي ذنب نهائي مش ف رمضان بس لا دا بعد رمضان...
الحمد لله بدأت رمضان قويه وفضلت القوه دي عندي والحمدلله قدرت اختم القرآن مره وكنت فهمت فيه معاني كتير كنت تقريبا بقف عند كل آيه من القرآن وبفسرها واعرف السبب بتاعها اي....
كان في يوم بعد اول اسبوعين في رمضان جالي اشعار علي برنامج الواتباد ان هو عمل ليا كومنت علي روايه نشرتها كان الكومنت محدش يفهمه غيري انا بس وفهمت منه ان انا ليه عملت كدا ليه عملت بلوك مكنتش عارفه اعمل اي مكنتش عارفه ارد انا مش برد علي الكومنتس اللي بتجيلي...
