Unicode
*ချစ်ခြင်းသည် လေပြေအဖြစ်တိုက်ခတ်သည့်အခါ
အမုန်းတရားဖြင့်နှလုံးသားသည် ဇွန်လရဲ့မိုးစက်တွေလို*
≘ ROYAL ≘
နေရောင်ခြည်က မျက်နှာပေါ်ဖြာကျလာတော့ Tae Hyung လူးလွန့်ကာနိုးလာခဲ့သည် ။ မျက်လွှာလေးဟာပွင့်လာတော့ ပထမဆုံးမြင်ရသည်က Jeon မျက်နှာ ။ နီးကပ်လွန်းသောအနေအထားနှစ်ခုသည် တစ်ယောက်ရဲ့ဝင်လေထွက်လေကိုခံစားမိသည်အထိ ။ ညက Jeon ရဲ့စကားကိုပြန်ကြားမိတော့ ရှက်သွေးလေးတွေဖြာမိပြန် သည်။
အပူအပင်ကင်းစွာအိပ်ပျော်နေတဲ့ ချောမောလွန်းတဲ့ Jeon ရဲ့မျက်နှာလေးကို လက်ညှိုးလေးနှင့် ညင်ညင်သာသာထိတွေ့နေမိ၏။ သူမြတ်နိုးမိတဲ့ နှုတ်ခမ်းမထူမပါးအောက်က မှဲ့နက်လေး။
"ဒါတွေက အိမ်မက်မဟုတ်ဘူးမလား Jeon"
Jeon မျက်နှာလေးကြည့်နေတုန်း လှုပ်လှုပ်ရှားရှားဖြစ်လာတာမလို့ TaeHyung အယောင်ယောင်အမှားမှားနှင့် မျက်လုံးလေးမှိတ်ချလိုက်မိပါတော့သည် ။
.
.JungKook နိုးလာတော့ သူ့နဲ့မျက်နှာချင်းဆိုင်အိပ်ပျော်နေသော ကောင်လေးကိုတွေ့တော့ ပြုံးမိသည် ။ ညက်ညက်ညောညောအသားအရေလေးသည် ဝင်းမွတ်နေကာ ပါးပြင်လေးတစ်လျှောက် သွေးကြောစိမ်းလေးများနှင့်ယှက်ပြေးနေ၏ ။ အပြစ်ဆိုစရာမရှိသော ဒီလူသားလေးကို ဒဏ်ရာမျိုးစုံသူပေးခဲ့ဖူးသည်။ သို့ပေသည့် အခုထိတိုင် ထိုလူသားလေးဟာ သူ့နဘေးမှာအမြဲရှိနေတုန်း။
အိပ်မောကျနေသလိုပုံစံလေးမလို့ နဖူးလေးကိုခပ်ဖွဖွဖိနမ်းမိ၏ ။
"ကောင်းသောမနက်ခင်းလေးပါ TaeHyung ငယ်"
မနက်ခင်းနှုတ်ဆက်စကားလေးဆိုပြီးမှ အိပ်ပျော်နေတဲ့ထိုကောင်လေးမနိုးအောင် အသာလေး အိပ်ယာမှထလာလိုက်ပြီး ကိုယ်လက်သန့်ရှင်းလုပ်စရာရှိသည်ကိုလုပ်လိုက်သည် ။
TaeHyung မှာတော့ အိပ်ချင်ယောင်ဆောင်နေတာကို မိမှာစိုးရိမ်နေရသည် ။ Jeon သူ့နဖူးလေးကိုခပ်ဖွဖွဖိနမ်းလိုက်တော့ ရင်တစ်ခုလုံးဟာ ပေါက်ထွက်မတတ် ။ Jeon အခန်းထဲကမထွက်မချင်း အိပ်ယာကနေမထရဲ။ မျက်နှာချင်းဆိုင်ရမှာ ရှက်နေလို့လည်းပါသည် ။ Jeon အခန်းထဲကထွက်သွားတာသေချာမှပဲ လျင်မြန်စွာခုန်နေတဲ့ နှလုံးသားကိုတည်ငြိအ်အောင် သက်ပျင်းလေးဖြည်းညှင်းစွာချရင်း ငုတ်တုတ်ထထိုင်မိသည် ။