قَتَلتني الثورة

البارت الرابع(الحقيقة)

خالي اسمعني
انت تدري بيه اني شكد احبك واعتبرك مثل ابني
اني الله ما رزقني ب اطفال وانت صرت ابني الوحيد

يارحومي يا عمري

الناس بهذا الزمن اختلفت وصاروا يقيسون البشر على مذهبه على عرقه على جنسيته

الطائفية اكلت هل بلد اكل وخلتنا ناس تكره ناس وناس تريد تنتقم من ناس

كلشي تشوفه كبالك موزين سبب خرابة الطائفية صدكني

موت اهلك سببة الطائفية
ضياع حلمك سببه الطائفية
جيتك لهنا سببها الطائفية

لو احنه جنه ايد وحده جان مصارت صولة الفرسان
وجان والدك وامك هسه يمك وانت بالبصره تضحك وياهم وتطلعون وتدخلون سوه ماجان صارو جثث كبال عيونك!!

اعرف كلامي قاسي الجاي اكوله بس هذي الحقيقي يا خالي ولازم تعرفها

اني اباوعله واتحسر وهو يسولف وكلامه اسمعه بتركيز لان حسيت الكلام كلش مهم وخطر وخصوصاً لمن كال اهلك سبب مقتلهم الطائفية

كلبي بساعتها انقبض!

تذكرت اهلي ومنظرهم .. ضليت ارجف وابجي كتله خالي منو سوه هل طائفية بالعراق ومن يمته موجود هذا السم؟

كلي خالي دوول هواي جانت تكره العراق لان جان العراق الاول بيهم ، هواي دول جانت تتمنى العراق يطيح حتى تعيش بخيرة ، هواي ايادي تشاركت بزرع هذي البذرة الخبيثه بوطنه، صدكني خالي اني بصغري ابد ماجان اكو طائفية

عايشين بخير وسلام ومحد يعرف الثاني من يا عشيره من يا دين من يا مذهب

زرعو هل شي بوطنه حتى يطيح
ومع الاسف هواي ناس انخدعت بيها وهذي النهاية

فياخالي اني راح اكلك شي وانت فكر بي وبكيفك بعد

هنا بالمنطقه اكو كم طفل وجاهل وهواي ولد حرام فاهمين الدين بالسلاح

ناس مايخافون الله ولا عبده ولا يحترمون احد
واذا درو بيك انت من غير مذهب ممكن يقتلوك
ف لازم ع اقل وانت يمنه تحاول ما تختلط ابد
وماتكول لاي بشر شنو مذهبك الاصلي حتى اليه لا تكول الا اذا غيرت مذهبك!!

ماريد اخسرك هنا وانت جبير وفكر بيها يا خالي وانتظر منك قرار على راحتك

كتله انشالله وسكتت

وصفنت صفنه جبيره ضليت اكول بيني وبين روحي
يعني هسه معقوله اكو بشر يميز بين نفسه وبشر ثاني
بس لان ذاك افكاره ودينه يختلف؟
لا والاكثر يقتلة!

احنه البشر كلنه مخلوقين ب احسن خلق
وكلنه ربنه ابدع بينه وخلقنا من انواع المعجزات

الاختلاف بينه فقط بالسلوكيات شلون اني اروح اقتل كائن خلقه ربي احسن خلق بس لأنو سلوكه مختلف عني!