وردية

1

نظرا للتقشف والشوماج لي طغا عل بلاد ولاو كاينين زوج خدمات الزواج للبنات و السرقة للولاد ، وردية عاشت و مازالت تعيش حياة الشوك والميزيرية ،من صغرها تحلم تتزوج من مرفه بسيط ينتفلها الشوك ويخرجها مالدوار لي عايشة فيه ، وردية عمرها ماقالت نحبس لقراية بسك هي السبيل الوحيد للحرية يعني بش تخرج مالدار ، وردية أيضا تحب المغامرة والاستكشاف مي الدار كي الذبان واقفين في وجها علاهادي حلمها بعد الزواج -الحرقة- و الخدمة في المرتبة الثالثة نظرا لصعوبتها ، دوار الشوك كفش رح تخرج منو وردية وكفش رح تعيش حياتها تابعوا معي مغامرات وردية .
اليوم الجمعة نهار الطعام الحاجة شوكية مهووسة بالطعام طيبو 3 ايام فالسمانة ومنهم الجمعة طعام بالقرعة واللفت بلا لحم والبطاطا مكاش ،هذا يشكل كوشمار لوردية والكوشمار يتعاود بسك الباقي يتعشاو بيه تان ،وردية عرفت بلي الزنقا هي السبيل الوحيد للنجاة لبست حجاب يتكركر و خمار " يما أنا نصلي الجمعة لبنادم كابابل اليوم غدوة يموت والحسنات مكاش " رجعتلها الحاجة شوكية بسرعة البرق شغل علابالها وش كانت رح تقول " مكاش والصلاة فالدار "
في هذه الأثناء طبطب الباب وردية زربت فالهدرة " علابالك بلي الجمعة العيد خلي لبنادم يعيد وندعيلك لي فاز تع الشوك ينوضو بسك راهم طولو " ، " صح صح تدعي ", "ايه ونلعبو ..دعوتي تحصل بين الغيوم مي يلحقوها الزواوش لي موالفا نوكلهم " , " خلاص روحي مال... اصبري كفش توكلي الزواوش وحنا ماعدناش وش ناكلو ،..." راحت وردية تجري مع صحبتها زهرة لي كانت طبطب رفدو رواحتيهم وراحو يرفرفو فالحومة شافو كل زاوية مليح قبل مينساو الشكل تع الحومة مالقعدة فالدار لحقو للجامع صلاو وخرجو ، " زهرة اعطيني تلفونك نسيت تاعي" كتبت النيميرو تع جمين وعيطت " يا المصفار وين راك ماشي تفاهمنا نتلاقاو " ،" وقتاش تفاهمنا وش تفاهمنا أنا متفاهمتش أنا نرقد  الجمعة نريح " ،" نوووض قتلك نووض أنا نحلل فدارنا كيما الجارية بش نخرج ونتا ترقد راك كل يوم مريح راقد حياتك راحة  " بعد تلفون شويا وهدر مستسلما بهداك الصوت القرمزيي " خلاص راني جاي نغسل وتشي برك " ،" مااااتغسلش، وتشك يخلع فغاع الحالات ارواح برك " وكوبات  ، زهرة كانت تاكل في حوايجها علا ليزونيتي بينسوغ مي فنفس الوقت تكحل لصوت جمين الخرافي ، قعدو مور وحد الحوش يستناو فجمين ، جمين جا شعرو الغوز مخربش وعنيه مغلوقين أو وتشو ماشي مغسول زهرة داخت شوية مي سيات تتنفس علا حساب طريقة شافتها فاليوتوب شهيق 3 خطرات وزفير 4 ، جمين :" وش وتش الشوك "
زهرة في قلبها يا ليتني شوكتو
جمين: " سمحيلي ختي زهرة ماشفتكش شوفي قولي لصحبتك ماتزيدش تنوضني وانا راقد "
زهرة :" ماتزيديش تنوضيه وهو راقد"
جمين:" وقوليلها ماتزيدش تعيط عليا صباح ربي"
زهرة :" وماتعيطيش عليه"
جمين:" وقلها جي تعنقني توحشتها "
زهرة :" ونوضي عنقيه"
وردية ناضت عنقت جمين بكل أخوة و زهرة ترجم فيهم بعنيها ،انتهى العناق
وردية :" اليوم تخلصولي فطور "
جمين وزهرة في نفس الوقت :" يرحم باباك"
اومبعد شافوو في بعضاهم وضحكو ، وجبد جمين كسكروط فريت اوملات و زهرة شيبس وشيكولا ، وردية تالمون تأثرت كلات كلش قبل ما تتأثر صح ، " نتوما صح فرندز تع صح "
جمين :" كاينا جعليلة فالكوتي لي ملهيك هيا نروحو " ، طارو لهيك زهرة سيات تلصق الاص تاعها هي لولا فالجعليلة مي مقدرتش بسك جمين سبقها " هيا طبعوني " لعبو حتى كرهو اومبعد تربعو فالارض مع لحشيش والحشرات نطقت زهرة " جمين علش اسمك جمين وشعرك غوز "، ريبوندا : " بسك يما الله يرحمها كانت تحب وحد الشينوي اسمو جمين وتوحمت علا شعرو الغوز " ، كملت :" ويماك كفش ماتت" ، " حكمها بابا تبوس فالتلفون شغل زعما جمين مالخلعة قلبها ولا يخبط بزاف وحكمتها جلطة " ،وردية : " أنا نحب يماك كون مكانتش تحب جمين كون ماجابتش عفسة كيوت كيما نتا كون خرجت لباباك لي ميشبه لوالو " ، جمين :" صح معليش تترحمو عليها هادي يما ماشي فردة تع صباط " ، قالوها بين زوج :" الله يرحمها "  وكملت زهرة في قلبها -نشاله تولي عجوزتي - ، جاز نهار بلخف لحقو زهرة لدارهم وكملو كيفكيف ، وردية :" باباك راهو مليح " ، جمين :" مزالو كيما كان هداك ميترباش " ، " فتح سونتخ فالخرجة تع الدوار لوكان تقولو..." قاطعها جمين :" هادي متعاوديهاش" ، " مي علاش " ، " باينا الطوماطيش الحارة " وردية ماحبتش تكمل فهمت بلي جمين ماشي حاب يهدر فهاد سوجي  لعبو حجرة ورقة مقص وخسر ولحقها للدار ، متخافوش عائلة وردية صح واعرين مي جمين يشوفوه طفلة بسك شبب وشعرو غوز ساو ميخافوش عليها غاع ونص الدوار دايرينو شاذ مالغري يقطر بالرجولية ، دخلت وردية للدار وسمعت وسخ وذنيها مثل أغلب الجمعات دخلت لشمبرتها وبلاصات الكتمان وراحت تسمع أنا وغزالي وهالالا فالجبل نلقط فالنوار وتتخايل فارس الأحلام حتى رقدت .