وردية

2

ليوم الاحد لبست وردية صباطها لكحل سروال كحل وتريكو بيض عريض دوميمونش راحت تجري بسك راهي روطار ورفدت مورصو فطير فيدها ، لقات جمين يستنا فيها قدام لاري ركبو فالبوس ، ويبنسور لحقو روطار جابو نص ساعة يحلو فالعساس وطبعا مخلاهمش، بوعلام السم يقطر كي الحنش يتلوى قدام الباب يقبل الرشوة ومايخليكش تدخل تقول يخلص بالدولار ، على كل حال وردية جاتها على السطاش راحت تزنق مع جمين مشاو زوج ميترات ولقاو طفلة تبكي وتنوح راحو ليها يشوفو وشبيها وعرفو بلي عندها فرض ومخلاهاش تدخل ، وردية :" نوضي ياسمينة متبكيش ليوم يا حنا يا بوعلام"
جمين" الفرض على 9 وراهي 8,30 والباب يحل عل 10 بقاتلنا نص ساعة "
وردية :" بوعلام مايتزعزعش مل باب غير علاجال كرشو ولا المدير "
جمين :" خلاص عرفت وش نديرو ياسمينة روحي مع وردية كركري السلوم لي مور الليسي "
جمين راح يدقدق لبوعلام لحنش " عمي بوعلام الحانوت لي فالحبطة راهو جاب لحليب ومكاش الغاشي "
بوعلام طار كيما يطير لحمام ومنساش يغلق الباب ، ياسمينة طلعت فالسلوم ودخلت ،جمين رجع السلوم أو وردية قالت لبوعلام بلي مكاش غاشي بسك لحليب كملوه 🤣 
جمين :" وردية راني نخمم نحفف قرعة "
وردية :" وش راك تستنا "
جمين :" نستنا تحبسيني "
وردية قعدت تشوف فالحيط ،
جمين :" وش راكي تشوفي "
وردية :" لي يعلقو لي بوبليسيتي لمبهدلين هادو  يخلصو مليح؟"
جمين :" يخلصو خير مالمدير حشاك ؟"
وردية : " جاتني فكرة يا جدك امشي معايا للحوش "
جمعو فالارض حطت وردية طابوري قديم وفوقو ورقة
وردية :" جمين وشنو هوما لحوانت لي فالدوار غاع "
جمين :" رضا القط ، جمال الفار ، عاشور ، شكال ، بولحية ، السعيد و خالتي خداوج  و ...."
وردية : " هاك ستفهملي وحطلي جدد و لقدم أو وش يبيعو وقتاش يغلقو وكلش "
جمين بعد 15 د :" راني رسمتها شغل خريطة ضك فهميني "
وردية:" ليوم نخلصلك عشا "
وردية تمشي و جمين يتبع فيها كي الحاجة العمية
جمين :" علاش رانا رايحين لدارنا "
وردية :" جيب لغيتار تاعك "
جمين :" متقوليليش نطلب بلغنا أنا غير هادي منديرهاش اصلا صحاب الدوار غاع مشوكين الدورو يخرج مقنوط "
وردية : " هههه تبعني وسكت "
لحقو عند وحد الحانوت فارغ تقول صحرا زدمت وردية :" عمي السعيد سمعنا بلي الباتسري تاعك مراهيش تتباع  وراح تغلق الحانوت " رجع :" ايه يا بنتي راكي تشوفي فلست " ، وردية :" وانا من وين نولي ناكل الباتيسري راك غير نتا تبيعها " رجع :" الله غالب "
وردية" شوف عمي تقدر تنقص فالسومة الفرنك للحبة وتتباعلك "
السعيد :" ايه مادابيا المهم تتباع الكرية ومكاش بش نخلصها "
وردية :" هيا نوض وجدلنا الحبات الشابين عندك "
راحو جابو طابلا سقموها و حطوها عند الباب حطو الباتسري والسومة لي ولات معقولة جمين ريح فكرسي وقعد يسنتر لبنات تلايمو ف ثواني ولولاد تبعوهم وردية تعبر وتعطيلهم يذوقو باطل ، والأغلبية دخلو يشرو وحارو كفش كانو مراطيين الباتسري تع عمي السعيد .
لعشيا جمين أو وردية موليين للدار
جمين :" النص بالنص "
وردية " أنا 70٪ الفكرة تاعي "
جمين :" أنا رسمت الخريطة وانا لي سنترت أصلا كون ماشي وتشي واحد مايقابلك "
وردية :" خلاص 65٪ "
جمين : " لا"
وردية:"  يا سيدي 55٪ حق الفكرة برك "
جمين :" هههه 60٪ وتخلصيلي لعشا "
شرات وردية ماكلة شابة لجمين عطاتهالو  وفنص الطريق صونا تلفون جمين وبان مخلوع شوية
جمين :" وردية أنا نروح "
راح جمين قبل متهدر هي ، وردية حكمها توسويس وتبعت جمين بالتخبية ، مشات بزاف حتى لحقت لوحد الجيهة فيها الخردة بزاف ، كانو 5 دايرين بواحد وباين تحاماو فيه ، دخل جمين للساحة ونطق واحد يشبه للربعة تع صباح :" وش جمين هداوين جي بش تسلك صاحبك لعزيز " ، هدر لي كان فالارض :" قلتلكم مادخلوهش فالوسط " ، جمين باين بلي تقلق بزاف ولا غوز كيما شعرو وطار فيهم وبدا يضارب خباااط ضراااب برااااد وردية تحمست بزاف قريب ناضت تغني دورت وتشها دقيقة لقات جمين طايح أرض مع صاحبو
وردية تمتم :" طحت من عيني يا جمين طايح عليا تعرف دير كلش "
قعدت تخمم كفش تسلك جمين والظلمة بدات تطيح وراهي روطار ، شافت شرق جنوب غرب شمال لقات ريدو بيض كلي بيض فيه الألوان غاع تالمون موسخ لمت شويا حجر ، دارت موسيقى تخوف و تخبات ، جماعة بداو يدورو يحوسو على الصوت هي ولات ترمي لحجر فغاع الاتجاهات وهوما بداو يخافو
جمين :" أيتها الأرواح الشريرة سلكينا "
صاحبو :" بلع يل بهلول ضك تخلاص علينا مسكونين "
جمين :" ارواح تشو نحيلي رباط هذا "
صاحبو :" نحيلي نتا لول "
وقعدو ياكلو في بعضاهم ، وردية طلعلها الزبل للراص وطلعت فوق الخردة هاديك وعيطت بصوت يبان تع وحش والموسيقى زادت ، الجماعة هاديك اختفو تع الصح وجمين وصاحبو يعيطو كي الجاجات دنات ليهم وردية بلعقل حتى خرج قلبهم طلع السكر و حبطت لاطنصين بش نحات ريدو ، هنا جمين وصاحبو كفرو وعاودو شهدو ودخلو الاسلام .