السلام عليكم
يلا صلوا على النبى ♥
ميلاد الحبيب صلى الله عليه وسلم ...♥
نختم حديث هند بن ابى هالة اللي بدأناه إمبارح بقى فى وصف الرسول لسيدنا الحسن بن على لما كبر فبيقول...
وكان شعره أسود من الليل وكان ناعم جدا وأوقات يصل شعره تحت أذنه وأوقات الى الكتف وأغلب الأحيان في منتصف الظهر وكان يضعه خلف أذنيه اذا فرق عقيقته فرق (يعني لما بايده كده يفرق شعره يثبت شعره ميرجعش تاني) وكأن شعره طوعاً له وكانت رقبته طويلة كأنها جيد دُميه وكانت ساقيه كأنهما اسطوانتي فضة وكان سواء الصدر والبطن (معندهوش كرش) وكان بادر متماسك (معندهوش ترهلات) وكان إذا مشى كأنما ينحط من صبب (كأنه نصه اللي فوق مسابق نصه اللي تحت وهو ماشي) يقول الراوي: ما رأيت أجمل منه ولا رأيت أحسن منه صلى الله عليه وسلم...
تقول آمنه (مامته): ما حملت حملا كان أخف علي منه ولا أيسر عليّ منه ورأيت حين حملت به نورا يخرج مني تضئ به أعناق الإبل ببصرة ولم يقع كما يقع الصبيان .. وقع معتدلا جالس واضعا كفيه إلى الأرض رافعا وجهه إلى السماء ...وكان الصِّبيانُ يُصبِحون رُمْصًا شُعْثًا (شعرهم منعكش)، ويُصبِح محمدٌ دَهِينًا كَحِيلًا.
يقول النبي: "وُلدت مختونا(الملايكة عملاله ختان) مسرورا(مقطوع الحبل السري) فلم ير أحد سوئتي"
أول واحده كان ليها الشرف فى ضم النبى ، أجمل مخلوق صلى الله عليه وسلم هى أم أيمن وأسمها الحقيقى "بركه الحبشيه "مربيه النبى صلى الله عليه و سلم..
و عشان كده كانت من أكتر النساء أرتباطآ بالنبى ﷺ.بركه كانت جاريه عند عبد الله أبو النبى عليه الصلاه والسلام وبعد وفاه عبد الله فضلت بركه تخدم آمنه ..
جه عبد المطلب جد النبى صلى الله عليه وسلم و شاف أجمل مخلوق بين يديه .. كان مولود يأخد العين من الجمال ♡. فيحضنه عبد المطلب و يضمه لصدره ويأخده ويطوف بيه حوالين الكعبه ويدخل جوف الكعبه ويرفع إيده و يحمد ربنا لأنه عارف ان فيه رب لكن يعتقد وجود آله كتير تانيه معاه وهى الأصنام فكان عبد المطلب مشرك لكن مش ملحد ..
فيخرج بيه من جوف الكعبه ويطوف بيه مرة كمان ويبص للسماء ويقول يااارب سأسميه محمد ♡ وكان أسم جديد والعرب مش متعوده عليه ويرجع لآمنه ويقول لها : سميته محمد.. فتقول ..ليه ؟ فيقول: ليحمده أهل الأرض ويحمده أهل السماء ♡ ..
وعند الحته دى هقف شوية وأقول إن الصحيح أن أمه آمنه شافت ف المنام قبل ما تولد الحبيب ملك يقول لها " يا آمنه إنك قد حملتى بخير العالمين فإذا ولدتيه فسميه محمد وأكتمى شأنك وشافت كدا كذا مره لحد ما خلاص ايقنت بكدا ولما أخده جده عبدالمطلب وطاف بيه مكنش عايز يسميه محمد كان عايز يسميه قُثم ودا كان ولد ليه بس مات ف الجاهليه فلما قال لآمنه قالتله إنى أمرت أن أسميه محمد وحكتله اللى حصل فقال إذن هو محمد ليكون محمودا ف الأرض وفى السماء" وفعلا اتولد محمد واتعلمت الوليمه اللى هى السبوع للمولود عندنا كدا وأبو جهل مكنش عاجبه الإسم بس عبد المطلب قال انا سميته محمد ...
و يفضل المولود ده مع أمه آمنه ولكن بتحصل مشكله ..آمنه مش قادره ترضعه.
ليه مش هتقدر ترضع النبى ..ده لأن آمنه كان عندها وباء.. من يوم وفاه جوزها عبد الله بن عبد المطلب و هيه مريضه والمرض اللى كان مشهور عندهم وهو الطاعون
وكانت مكه مليانه أوبئه وأخدت قريش عاده أن أى رضيع يتولد فى الكام سنه اللى فيهم وباء..بتيجى قبيله لمكه أسمها بنى سعد فيها مرضعات بالأجر، كل مرضعه بتاخد طفل بره مكه..بعيد عن الوباء ويكون ده لمده سنتين وتاخد أجر عليه وبعد ما تفطم الولد، بترجعه لأهله وتاخد مبلغ تانى بعد ما تسلم الولد ليهم.
وبعد أيام من ميلاد النبى جت قبيله بنى سعد و كانت من بينهم حليمه السعديه نسبه لبنى سعد وهيه فعلا هيسعدها ربنا عز وجل بشرف إرضاع النبى ..وصلت القبيله لمكه وكل مرضعه بدأت تاخد طفل.. وكانت المرضعه الشاطره هيه اللى تلحق تاخد ولد أهله أغنيااا ..
و أخر وحده وصلت كانت حليمه لأنها كانت فقيره وكانت بتركب على "أنثى حمار" ضعيف و بطئ جدا فوصلت متأخر لمكه .. حليمه بتقول أنها بمجرد ما وصلت لاقت كل واحده من صحباتها خدت رضيع.. ومتبقاش إلا طفل واحد! و هو النبى ...
و أن محمد أتعرض على كل المرضعات ومفيش ولا واحده رضيت تاخده ..يا ترى ليه ؟..
لأن سيدنا محمد صلوات ربى عليه كان يتيم ..😥
كل مرضعه قالت هعمل ايه بولد يتيم.. مش هينفعنى..لأن اللى بيكرم المرضعه أبو الرضيع..بيدينى فلوس أكتر عشان أخد بالى من إبنه أكتر.. طب جده هيهتم أنه يدينى زياده! واللا هيدينى الأجر وبس؟..فرفضت المرضعات أنها تاخد النبى ..
وحليمه لاقت أن متبقاش غير محمد ..
..فقالت هعمل إيه بيتيم عبد المطلب.. فرجعت لزوجها وقالت له : دلوقتى كل وحده من صحباتى خدت رضيع و أنا مش حابه أرجع بينهم من غير رضيع..
أعمل إيه؟ آخد يتيم عبد المطلب؟
فجوزها قالها: خديه لعل ربنا يجعل فيه بركه..
وفعلا حليمه خدت النبى عليه الصلاه والسلام..وبتقول أنى بمجرد إنى ضميت محمد لصدرى أتملى صدرى باللبن.. معرفش إزاى .. وكان عندى اللبن قليل جدًا بسبب الفقر و قله الأكل.. وفضل محمد يرضع و يرضع .. كان جعان أوى .. و أنا مش عارفه منين كل اللبن ده..
وكمان حليمه بتقول "أن من حبى لمحمد وضعته على ثدي الآخر لكى يكمل رضعته" لكن رفض النبى صلى الله عليه وسلم أنه يرضع..وفضلت أحاول معاه تانى فبدأ يبعد ويدور وشه عنى ومش راضى يرضع..
طب ياترى ليه ؟
......................
السلام عليكم ورحمة الله
