last summer (Taekook Lovers)

#27

✨✨✨

Lanjutin peristiwa di kamar nya si Jajang.

"Ini maksudnya apa bang?. Abang mau mainin maman?. Abang udah tau semuanya kan, dari si Jujun?. Terus kenapa Abang ngelakuin ini??."
Si Maman sebenernya pengen banget nampol mukanya si Jajang, yang menurut dia kagak punya ati, kagak punya perasaan, kagak ngerasa bersalah juga, udah nyuekin dia ampir mau dua mingguan ini. Eeh sekarang baru ketemu udah kagak tau malu maen meluk-meluk ajah, mana erat banget lagi meluk nya, Ampe ampir kagak bisa nafas itu si Maman.

Si Jajang cuma bisa geleng-geleng pala, sambil nyoba ngelus rambut si Maman. Tapi sayang, si Maman selalu ngehindar dari tangannya si Jajang.

"Maman jangan ngomong sembarangan siapa sih yang ngomong kalo Abang mau putus sama Maman. Abang meluk kamu ini artinya ... perasaan abang, masih sama kek dulu. Kalo soal si Jujun, dia cuma bilang kalo dia suka sama elu itu ajah." Kata si Jajang mancing-mancing, pengen denger langsung dari si Maman tentang semua ke beneran, dari omongannya si Jujun.

Si Maman masang wajah murka banget. Asli merah banget mukanya kek pantat simpanse.
"Bacoooodd lu bang!!!. Mana mungkin Cuma karna ngomong  gitu doang, lo gak angkat telpon dari gue, kagak pernah bales Chat dari gue. Boro-boro di baca, di buka juga enggak!!. Terus apa cuma karna itu juga, lo tega diemin gue kek gini, sakit ati gue bang, sakit. Salah gue dimana bang... dimana?!."
Si Maman mewek lagi, tapi sekarang kagak pake kejer.
Cuman ngalir ajah itu air matanya kek pancuran.
Sepanjang si Maman ngomong, si Jajang cuma bisa geleng-geleng pala bingung jadi nya, harus ngejelasin dari mana dulu.

"Abang pengen latihan, man."
Kata si Jajang mukanya lempeng ajah.

Si Maman cengo. kagak ngarti.
"Latihan??!!."

Si Jajang ngerasa kudu ati-ati nih, ngejelasin semua ama si Maman.
Takutnya si Maman kagak ngarti, terus salah paham ama maksud ucapan dia yang seterusnya.

"Abang kan mau jadi dokter kan yah, itu cita-cita Abang dari kecil. Abang kan mesti belajar lebih giat nih, kata elu juga kan gitu. Biar Abang bisa lulus dengan nilai yang lumayan tinggi. Biar bisa lulus ikut tes masuk universitas."

Si Maman langsung berenti nangis. Terus ngerutin alis, ama jidat kek ngerasa super bingung ama penjelasan nya si Jajang.
"terus... apa hubungannya ama hubungan kita bang?!." Kata si Maman sekarang lebih tenangan dikit.

Si Jajang kek jadi ragu-ragu ngelanjutin omongannya ...
"Iyah... kalo semisal kan lulus... Abang kan... bakal tinggal di jakarta nih. Terus pasti kan kita bakalan LDR an.
Nah... Abang cuma pengen latihan, biar bisa idup jauh dari Maman, entar gitu hehehe."

Si Maman langsung ngebuletin matanya, lebar banget kek bola pingpong. Sambil melototin si Jajang,
si Maman ngebatin...

Anjiiiing...
Bangke...
Setaaaaan...
Sialaaaaaaaan...
Sereceh itu, alesan dia ngebikin gue nangis kejer kek gini.
Bikin 2 minggu masa liburan sekolah gue sia-sia. Bikin gue cuma bisa ngelamun, galau dan gak mood ngelakuin apa-apa.
Astagfirullahaladzim...
bener-bener ajaib, ada orang kek gini idup di muka bumi ini.
Kalo gue gak cinta ama nih orang... Udah gue tendang dia ampe luar angkasa. Biar temenan sana ama alien-alien penghuni planet mars.

Ngeliat si Maman terus melototin si Jajang, kek pengen nelen dia idup-idup.
Si Jajang takut, sambil nyembah-nyembah ke arah si maman dia ngomong ...
"Maafin Abang Man. Abang sengaja gak ngomong sama maman. Soal rencana Abang pengen latihan ini. Yah kalo bilang... Entar Maman ngegodain Abang lagi. Terus entarnya Abang kagak kuat pengen nemuin Maman."