{ البارت الثاني }
للأقدار أراء أُخرى لا تشبه أحلامنا
"سلطان"
مضغوط ومتوتر ولما جيت بشوف اولادي مالاقيهم؟! وبكل بساطة تقولي احتمال انخطفوا مستشفى مستهتر ماهم قادرين يحافظون ع طفلين لكن والله لا ارفع عليهم قضية إن مالقوهم ، بعد ماسحبني ابوي وقال إنه بيروح يشوف ، هزيت راسي ورحت بشوف جواهر
اخاف تصحى ولا تلاقيني حولها بس تفاجئة من الممرضات والدكاترة المتجمهرين حولها حسيت برعشة بجسمي خفت يكون صابها شيء رحت أركض لين مانزل الشماغ عن وجهي واناظرهم ، شفت الدكتور يسوي لها صعقات كهربائية ، وش يصير ؟ ليش يسوي لها كذا موفاهم جواهر وش بيصير بها ماني مستوعب شيء
وشفت الدكتور يناظر الممرضه وينزل الجهاز من يده ويامرهم يوخرون الأسلاك ثم ناظر ساعته وأمرهم يغطوها
........
دقيقه دقيقه
وش يصير بالضبط ليه يغطونها ؟
طلع الدكتور من الغرفة والتفت له وانا انتظر تفسير للي يصير تقدم مني وحط ايده ع كتفي : إنا لله وإنا إليه لراجعون عظم الله اجركم وغفر الله لها
سلطان: انت وش قاعد تخربط ؟
شد الدكتور بيده ع كتفه : الله يصبر قلوبكم ، ومشى عنه
جلس سلطان ع الارض وحط ايده فوق راسه وهو مومستوعب اللي انقال أو بالاحرى موب فاهم ولا هو يبي يفهم لان اللي انقال فوق طاقته حيل
وفوق قدرت استيعابة
الشيء اللي كان خايف منه صار
مايبي يصدقه يتمنى يكون كابوس ويصحى منه
وقف وهو يناظرهم مغطيينها بالابيض ورجع جلس وحط راسه ع الجدار وايده فوق راسه ويهز راسه بجنون : لا لا هههه يكذبون اصلا وش ماتت يمكن موب هي ااي "هز راسه بفرح وكأنه لقى حبل النجاة "
ووقف يتلفت يمين ويسار شاف ممرضه توها طالعه من عندها دفها بسرعة ودخل ، حاولت تمنعه بس ماقدرت كانت اضعف منه وراحت تنادي الدكتور المسؤول عن الحالة اما هو ابعد الغطا الابيض عن وجها وشافها
اي شافها شاف ملاكه وجوهرته الوحيدة شاف كنزه اللي حارب اهله عشانها
شافها نايمة بسبات وجها شاحب حط ايده ع وجها بكفوفه : جواهر
وسكت شوي وهو يبلع الغصه اللي بحلقه
وكمل كلامه
قومي علميهم انك نايمة انتي نومتس خفيف ، مد يده يمسح على شعرها وأردف ، : دايم كنتي تحسين فيني اذا حركت شعرتس وتقولين سلطان مايجيني نوم إن لعبت بشعري
بصوت مهزوز ضعيف ماليته البحه : جوواهر قومي يانظر عيني
يانصفي الثاني قومي
ياامصدر قوتي قومي لا تتركيني
والله اني بغيابتس ضعيف
والله ياجواهر اني بدونتس جسداً بلا روح
وعقل بلا تفكير
مسك ايدها ومسح بيده الثانية ع راسها
ونزلت من عينه دمعه حارة وسالت ع خده : قومي ندور ورا اولادنا ونربيهم سوا طلع معنا تؤام ياجواهر ""ومسح دمعته اللي سالت ع خده ورجع مسك ايدها ""
:كنتي تعرفين صح إي إنتي قلتي اذا رجعت معي لك مفاجئة
مسح خشمه بشكل مايل بظهر كفه " كانه طفل ماتت عائلته أمام عينه تدمروا تحت حطام ولا يدري من وين يبدأ يدور عليهم "
مسك ايدها بإيديه الثنتين وشد عليها :فراقتس اقوى من اني اتحمله
ماحفظتي الوعد اللي قطعناه لبعض ؟
ولا لاني تركتس وسافرت ،
تكفين ياجواهر سامحيني "باس ايدها وشد عليها اكثر" والله ماعودها يابنت ابوتس تكفين ارجعي وعاقبيني انا لتس كلي وانتي لي كلتس ماياخذنا أحد من بعض
وسكت شوي وهو يتأمل وجها "وقال بصوت خافت ضعيف : جواهر قومي ، " جاء الدكتور وشاف حالته وقالهم يستدعون أبوه لان بهالوضع مايقدر يسوي شيء او كيف يهديه حتى ، وفضل يوقف بعيد لجل يجي أبوه
سلطان بضعف: قومي خلاص يكفي نوم ارجعي ازعجيني اذا نمت وطولت بالنومة موانتي كنتي تكرهين نومي هذاني بعد اكرهه نومتس
جواهر انا نومي كان قصير بالحيل بس نومتس الوكاد بيطول ""مسح دموعه وأردف من جديد : جواهر ليتني مانمت واقضيت كل لحظة بحياتي معتس
جواهر والله قلبي يوجعني حييل تكفين قومي طيبي خاطري وقولي لي سلطان انا امزح
اي انتي تحبين المقالب بالحيل
مسح دموعه بمحاولة اخيرة انها توقف واخذ نفس لجل يوقف عن البكى بس اللي صار العكس زاد ببكاه
مسك ايدها من جديد :وخالق سماك ماعاد اتركك بلحالتس بس قومي ضميني زي قبل وبشيلتس زي ماتحبي
قومي العبي بشعري ونيميني ع رجولتس
قومي نروح لحديقة بيتنا ونجلس ع الارض ونتربع زي ماتحبين
قومي وبسوي كل شيء كنتي تسوينه وتبيني اسويه واتكاسل ،
والله ماتكاسل قومي سولفي ع راسي والله ماتذمر
شد على يدها وباسها : قومي لا تنامين حتى انا صرت اكرهه نومتس ياجواهر والله صرت اكرهه نومتس ،
دخل ابوه وشاف حالة ولده وانوجع قلبه ع هالمنظر ، وشلون ماينوجع وولده اللي كان جبل مايهزه ريح الحين منهد ويبكي ، تقدم منه وحط ايدينه فوق اكتاف سلطان بمحاولة لوقوفه : قم يابوك قم وقل : اللهم أجيرني في مصيبتي وابدلني خيراً منها
سلطان وهو ماسك ايدها وموراضي يقوم مع ابوه : والله يابوي لو هي مصيبه انا راضي فيها بس تكفى قلها تقوم
شد بأيدينه ع اكتافه واسترسل بهدوء : يابوك استهدي بالله مايجوز اللي تقوله هذا يومها وكل شيء مقدر ومكتوب ومافي انسان يموت قبل يومه
سلطان : ليش مامت انا طيب
،" ورفع راسه يناظر لأبوه ، قلي متى يومي يابوي متى "وانهار بكى "
ابوسلطان: قل لا إله إلا الله ، ولا حول ولا قوة إلا بالله أذكر ربك يابوك "ورفع راسه وأشر للدكتور يساعده ،
وتقدم الدكتور وممرضتين ، وحاولوا يطلعون سلطان اللي كان رافض يترك ايدها ، وتركها بعد ماكانوا يرددون عليه إنه يتصبر ويذكر الله
ترك ايدها وكأن روحه انتزعت من مكانها
