راشد
دخل البيت وناظرته اماني وابتسمت
راشد ناظر ابتسامتها وابتسم؛علامك؟
اماني ضحكت ونزلت راسها:ولاشي غريبه طاوعتني
راشد تقدم لها؛لاني مالي الا انتي
اماني رفعت راسها وناظرته
وراشد جبس قدامها:بالظيب بالغصب انتي لي وانا لك
اماني:من هي علمني اعرفها؟
راشد تنهد:لا
اماني:من وين عرفتها؟
راشد؛من نور الصبح واحلام الجنه
اماني ابتسمت وهزت راسها باعجاب
راشد:بنت عمي عايض كوثر
اماني نزلت عيونها وكمل راشد يحكيها عنها
انتظرته يسكت واخذت نفس:راشد
راشد هز راسه؛هلا!
اماني:ودي باهلي توديني الحفر؟
راشد عقد حواجبه:الحفر!
اماني هزت راسها؛بخاطري ازورهم وماني مرتاحه اكثر هنا
راشد بتفكير:بشوف ابوي واقولك وش نوحه
اماني:وليش تنتظر ابوك؟ بأي وقت خذني ونروح
راشد؛هذا سفر وابوي لازم اخذ شوره لان الحلال والغنم انا مسؤول عنهم
اماني:اي ونعم المسؤوليه
راشد صد ولارد عليها واماني ناظرته ومشت لغرفتها
-
جراح
من دخل البيت مشى لغرفته ودخل الحمام
واول ماطلع دخلت الهنوف:ليش ما مريتيني؟
جراح؛كنت جايك بس بغسل واغير اول
الهنوف:رحت مع فيحان؟
جراح؛اي وعجبه البيت
الهنوف:اي زين بس كوثر ماتبي تبيع البيت
جراح عقد حواجبه وجلس:وليه؟
الهنوف:تبي تروح
جراح؛تروح طيب بس البيت ينباع الرجال مايقدر ينتظر
الهنوف:رافضه راكبه راسها روح كلمها
جراح هز راسه ومشى وخرج من غرفتها
ودخل غرفتها ورفعت راسها له:هلا!
جراح قفل الباب ومشى لها؛وش سالفة الروحه ذي؟
كوثر قفلت جوالها وجلست؛بروح الديره
جراح؛اي وليه؟
كوثر؛بس جراح مابي اتكلم بتفاصيل
جراح؛لا لازم تتكلمين خصوصاً انك موقفه بيعة البيت عشان هالتفاصيل؟
كوثر:كيف يباع البيت واحنا بنروح؟
جراح؛وليه من الاساس تروحين؟
كوثر تاففت؛جراح تكلمت مع امي وخلاص
جراح ناظرها بهدوء:مافي شي اسمه خلاص انا متفهم لو تقولين
كوثر سكتت ثواني وهمست؛عشان راشد
جراح تنهد وصد بعيونه:متزوج اذا ناسيه
لف وناظرها؛ولو بتروحين هناك بتشوفين زوجته معاه وجنبه
كوثر:ادري بس ماني قادره اخطي خطوه مع عماد لين افهم شعوري
جراح تضايق وهمس:كوثر خذيها مني لا ترجعين وتناظرين وراك امشي قدام وعماد مارح ينتظرك مايتعوض والله
كوثر؛ينتظرني عماد لاخر حياتي وانا متأكده
جراح رفع حاجب؛وهذا جزاه؟
كوثر:لا تزيدها علي بنروح الديره باقرب فرصه
جراح رفع كتوفه؛طيب بس انتي تتحملين نتيجة قرارك
كوثر هزت راسها وجراح وقف وخرج
وهوي دور رقم فيحان ويدق عليه
ابتسم من رد؛اعذرني داق عليك هالوقت بس بغيت اخبرك اننا بنودع بيتنا ونقعد فيه كم يوم صعبانه على امي واختي بيعته
فيحان؛لا عادي خذوا راحتكم البيت بيتكم للحين
جراح ابتسم؛الله يعطيك العافيه
فيحان:بس اسمع انت عطيتني المفتاح اذا تبيه برسل لك العنوان تعال خذه
جراح؛على خير ان شاء الله بيننا اتصال
قفل جراح ورجع لغرفته وهو ضايع مايدري يلتفت لنفسه او لاهله
-
عبدالعزيز
من ناظر البتول تجلس بالمجلس جنبه
لف لفجر:قومي شوفي لك شغله
قامت فجر وتركتهم ولف لالبتول:بينباع بيت عايض
البتول:زين ماشاء الله
عبدالعزيز همس:وش زينه انتي؟ بياخذ الارض وبيت عايض وانتي تدرين انه بيتشارك الحوش بعد
البتول سكتت ثواني وناظرته؛بيحفر المدفون يعني؟
عبدالعزيز:قصّري حسك محنا ناقصين
البتول:يارجال انت بس تتوتر من شي تافهه اجل شايف راشد قاعد عالصخور تهاوشه
عبدالعزيز؛هذي اراضينا نحنا ونحنا ابخص فيها من احد غريب
البتول:هدي نفسك واذا انت شفت الرجال ما يتشارك ارض ماطله لين يشرد وماظنتي يسكن دايم هنا
عبدالعزيز سكت بتفكير والبتول مسكت يده وهزته
:اترك التفكير اللي اندفن اندفن ومابينكشف شي ابد
هز راسه عبدالعزيز وصد عنها
وفجر عقدت حواجبها ورا الجدار تسمع ولفت على طول
وناظرت الصخور قدام بيت عمها عايض وبتفكير
مشت لين وقفت عندها وهي تناظرها وتدور ببالها الافكار
اخذت نفس وبعدت بسرعه عن المكان ودخلت البيت
واصرت انها تعرف السر يمكن تستفيد منه وتستغل
موقف ابوها خصوصاً انها شافته خايف ومتوتر من الجار الجديد
ناظرتها ريحان تفكر وهمست:وش فيك؟
فجر هزت راسها بالنفي:ولاشي
اما عبدالعزيز ناظر راشد من دخل واعتدل بجلسته؛هلا
راشد ناظرهم وجلس؛جيت اخذ شورك يبَه
عبدالعزيز:وش عندك؟
راشد؛اماني تبي تزور اهلها بالحفر
البتول:طفشتها؟
راشد بلع ريقه وهمس:لا تقول تبيهم
عبدالعزيز:ضايقتها بشي انت؟
راشد هز راسه بالنفي:مشتاقه لهم يمكن
عبدالعزيز؛يمكن! والله انك فاهي خلاص خذها بالسياره
راشد سكت ثواني وكمل:تبي تروح طياره
البتول:عشتوا والله طياره ليه؟
راشد؛بعيده الحفر بالسياره
عبدالعزيز؛هي اللي بتسوق والا انت؟
راشد؛انا اكيد
عبدالعزيز:اجل مو على كيفها خذها بالسياره زين انها بتروح لهم بعد تتشرط
راشد هز راسه والبتول ضحكت؛اجل طياره؟
ناظرهم راشد وخرج من المجلس راجع للبيت
-
دخل راشد لاماني البيت
ولفت له؛وش قال؟
راشد؛وافق
اماني:اي زين وافق علينا ابونا
راشد؛بس مو بطيارن
اماني ناظرته وعقدت حواجبها؛ليه هو اللي بيسوق؟
راشد؛ياشيخه تفاهمي معه انا هذا ابوي شسوي فيه؟
اماني؛راشد مو حاله تستأذن منه وانت متزوج وفاتح لك بيت وش هالحياه اللي بتمشي على شور ابوك
راشد؛اذا عندك مشكله مع ابوي كلميه انا ماعرف له
اماني؛هو يعرف لك والله يعرف يخليك ترعى غنك وعيال عمتك دكاتره
ناظرها راشد وهمس:سبحان الله ترمين كلام وماتدرين وش مفعوله عالروح
اماني؛مارميت شي ذي الحقيقه
راشد مارد ووقف بيروح لغرفته
وتكلمت:لا تقفل الباب بجي الم اغراضك
راشد؛متى تبين نمشي؟
اماني:انت قول متى لا تتعبني راشد تكفى
راشد؛الشرهه علي ابي رايك انتي؟
اماني:ما احب امشي رايي على احد يبي لك تتعلم تتخذ قراراتك بنفسك بس متى وابوك عايش
تركها ودخل وتضايق منها وانسدح على فراشه
-
كوثر
فاتحه الشنطه وترتب اغراضها داخلها
ناظرت الشريط وابتسمت وجلست على السرير وهي تناظره
تنهدت بحب وحطته بالشنطه على دقت الباب
الهنوف دخلت؛خلصتي اغراضك؟
كوثر:باقي
الهنوف:بكره بنروح ماهو اليوم
كوثر:ليه؟
الهنوف:جراح وراه دوام يابنتي خليه الخميس
كوثر تاففت؛قلت له ماكان عنده مشكله
الهنوف؛ادري بس انا قلت ليه يرجع لحاله حرام يقعد معنا ثلاث ايام ونرجع
كوثر هزت راسها؛طيب
الهنوف:انا كارهه الروحه ياكوثر بس عشانك ترا
كوثر؛كلكم ماتبون تروحون اجل؟
الهنوف:لا والله اخوك متلهف ادري فيه
كوثر:ماودك تخطبين له؟
الهنوف تنهدت؛مو وقته اسكتي اسكتي
كوثر ما تكلمت والهنوف خرجت وتركتها
مشت لغرفة جراح وفتحت الباب وفز وناظرها:شسالفه؟
ناظرت جواله الهنوف وهي تسمع صوت الاغاني:تسمع مصري هالوقت؟
جراح قفل جواله وهز راسه؛شبغيت امي؟
الهنوف:خلاص الخميس وافقت اختك
جراح هز راسه:زين
خرجت وتركته وفتح جواله وناظر الفيديوهات وتنهد
ناظر شكلها بالفيديو ترقص ولا تدري عنه يصورها
وابتسم من شكلها واشتاق لها من تذكر كلامها وقعداتهم سوا
تنهد وقف جواله وغمض عيونه بقوه ورجع فتحها
