الحب و الصاعقه

البارت الاول

،،الحب و الصاعقه،،،،،،

،،،،البارت الاول،،،،،،،،
كالو ما تجي وكالو عليك بعيد

ودرب كلش طويل البينك وبيني

شح مني الدمع كد ما بجيت أعليك

وأعاتب بالكمر هلبت يواسيني

ظلم كلش ظلم تحيا وتموت بشوك

وجا شنهو العمر من تذبل رياحيني

تعب حتى الورق حبر ودمع مخبوط

وحسره وي القلم تأذيني وتبجيني

صفة رسمك حلم عذب حنايا الروح

مثل طيفك أبد ما شايف بعيني

،،،،،،،،،،،،،،،،،،،،،،،،،،،،،،

-العب بالشارع و أكمز و جان أكو طين قريب من البيت ركضت و وكعت بي و ملابسي أتدمرت كمت من الكاع و أنفض بملابسي و ادردم و خايفه من ماما أذا تشوفني هيج لميت شفايفي بقلق هسه شسوي ضليت واكفه بالشارع و صافنه أفكر و الشمس عموديه فوك راسي و الدنيا تسمط و عندي مدرسه شلون أفوت للبيت حتى أغير ملابسي و أروح والله اذا امي تشوفني تعلكني بـ باب البيت رحت فتحت الباب شويه و مديت راسي و أشوفهه مشغوله بالمطبخ و تمسح بوجهه من الحر أكيد ما تشوفني اذا فتت من باب الصاله و أطفر للحمام گبل و أبدل  فديتني شلون ذكيه طبيت أتسحب مثل الحراميه و رحت للحمام و سديت الباب و أسمع صوتهه

-ولججج تغريد هاي انتي بالحمام

تغريد:-ضربت على راسي بـ خفه'ها يمه اي اني بالحمام ليش؟؟

بهيه:-شلون بيج اني يوميه جايتني مطينه عبالج ما اعرف سوالفج يا العوبه ناسخه عماتج بالوكاحه و العرامه شوكت الله يفرجهه عليه و أخلص

تغريد:-عوجت حلكي أووف منهه ماما لازم بكلشي و حطت هالعمات بالنص والله حبابات أنطي نص عمري و اعرف شنو المشاكل البيناتهن و ليش متقاطعات هالسنين كلهه بس اني دائمآ اروحلهم بالختله من غير ما أمي تحس لان همه گبالنه و زينات ويايه و حتى حلويات ينطوني!!!؟؟قطع تفكيري دكه باب الحمام رادت تتكسر ''''اي اي ما تكول شبيك

رامي:-شوكت تفضيهه وراي شغل صارلج ساعتين بالحمام

تغريد:-حتى بالحمام لاحكيني شلون عيشه هاي راح أطلع أصبر"" غيرت ملابسي بسرعه و طلعت و الكا واكف بالباب و ملابسه على كتفه فات من يمي و دفعني

رامي:-شو وخري راح أتأخر و انطرد من وراج!!؟

تغريد:-و ثول حتى ثول اكو واحد هيج يعامل أخته الصغيره بلكت يطردك و تكعد لا شغله و لا عمله

بهيه:-يولي لسانج لا اجي اطيح حظج بطلي دعاويج على أخوج

تغريد:-أمشي و شعري ينكط مي و ادردم"""هو اني شمحصله من عنده كاضيهه يوميه ويه بنيه و ينطي بـ الفلوس الهن و اني من اطلب منه يطردني عبالهم جاهل و ما يدرون اني اعرف كلشي يصير بالبيت