#فتى_القريه_وفتاة_المدينه

الحلقه الاولى

#فتى_القريه_وفتاة_المدينه
الحلقه الاولى

(تتقدم كلية الطب بأحر التهاني للطبيب #إسلام محمد ال........ وفقه الله وأعانه بما فيه خير للبلاد  تفضل د.إسلام لاستلام الشهاده)
.
صبيت من مكاني متجه للمسرح بنستلم الشهاده وانا مش مصدق ان اخيرا بعد كل هالتعب وكل هالسنوات بنحصل شهادتي من كلية الطب بس على قد ما كنت فرحان ع قد ما حزنت ان امي مش معاي ف اللحظه هذي بالذات ف اللحظه اللي حققت فيه حلمها هي مش موجوده💔 وصلت للمسرح استلمت الشهاده وصبيت مع باقي الشباب الخريجين ونسهري معاهم لين سمعتهم ينادو على إسمها برمت شفتها وهي متجها للمسرح  شفت الفرحه في عيونها استلمت الشهاده  ومشت لجيهة الخريجات مرت من جنبي حسيت بقلبي ينبض بقوه خفت انها تسمعه من قوة نبضه 😅 وخرت شويه وحاولت نلهي روحي مع الشباب بس ما قدرتش كانت مسيطره على كياني بكل شئ ضحكتها مشيتها نظرتها ما حولتش من بين عيوني نهائيا.......
____________
#døsã_kb
طبعا مازلتو مش فاهمين شي 😅
اولا نحكي لكم ع نفسي شوي انا اسمي اسلام محمد ال....... نسكن في ضواحي مدينة درنه ونقرا في كلية الطب في درنه واخر سنوات انتقلت واستقريت في المدينة عمري 26 سنه
امي نرجس م 72
باتي محمد م 69
انا وحيد هلي و عيت جدي يسكنو في درنه
اعز اصدقائي او تقدرو تقولو صديقي الوحيد اسمه وائل
#باقي الشخصيات تعرفوهم بعدين
_____________________

#قبل_20_سنه

اسلام : ماما ماما امت نمشو لعيت جدو
نرجس : مازال مش توا
اسلام : اوووووف امتى باهي
نرجس : توا نمشو الخميس
اسلام : وااااااااو يا ماما 4 ايام واجد😭
نرجس: ليش مستعجل توا نمشو
اسلام:  رايفت عليهم
خشت ورده للمطبخ (اخت نرجس) : رايفت عليهم ولا رايفت على وتين🙃
اسلام:  اها قصدي نبي نلعب معاها بس رايفتلهش
ورده:  تعرف ماما شن قالت لي
اسلام:  شنو
ورده:  قالت لما يكبر اسلام نبي نزوجه وتين
اسلام:  صاح يا ماما
نرجس: ورده بطلي وسيبي العيل في حاله
ورده : اها قالتها لي لكن تبش تقولها لك توا
اسلام طلع م المطبخ يجري
ورده تضحك عليه:  هههههههه مسرع ما صدق
نرجس:  العيل مازال صغير تحطش في راسه الافكار هذين
ورده: عااادي سيوره يكبر ويفهم 🤓
نرجس: اااااااه مفش فايده  فيك🤦🏻‍♀
وطلعت تبي تنادي اسلام جاها انس (صاحب اسلام)
انس: عميمه صاح تبي تزوجي اسلام ؟
نرجس:  لا من قالها لك؟
انس:  اسلام قالي
نرجس: 🤦🏻‍♀ عدي كلملي اسلام
#døsã_kb
.
اسلام  : نعم
نرجس:  كيف تقول نبي نزوجك مازلت صغير انت
اسلام:  خويله ورده قالت لي هك
نرجس:  تبصر معاك خالتك معش تحكي ف الكلام هذا مازلت صغير
اسلام : اووووف باهي
وخش لداره نرجس خشت للمطبخ
ورده تضحك: ولدك مكبد رسمي
نرجس:  خلاص حتى انتي ما تحطيهش في راسه 😒
ورده:  ههههههه بس كان ما تزوجش وتين بعد ما يكبرو ما نقعد نا
نرجس:  🤦🏻‍♀🤦🏻‍♀🤦🏻‍♀

طبعا وتين كانت جارة عيت جدي وكنت كل ما نمشي لهم نقعد نلعب معاها وقعدت نراجي نمشي لهم بس عشان نلعب معاها (فيكم تسموه حب طفوله😁)
____________________
#døsã_kb_
#بعد_مرور _سنوات

وتحديدا في سنه 3 ثانوي

كنت نقرا في سنه 3 علمي وكنت نبي نخش طب و نحقق حلم امي نفس ما تقولي ديمه نتمنى نشوفك دكتور
.
كنت نقرا ف الدار امتحان فتره خشت امي
نرجس:  شن صار معا؟
اسلام  : اسلام والله اهو الماده صعبه شوي بس تمشي
نرجس:  باهي تبي حاجه نديرلها لك
اسلام:  ادعيلي يام بس
نرجس:  ربي يوفقك ي وليدي وتجيب التقدير اللي تبيه
اسلام:  يارب ♥
طلعت امي م الدار و رديت نقرا
طبعا مستغربين اني ما حكيت على بوي بكل
بوي توفى من لما كان عمري 3 سنين بس لأن اعمامي و عماتي متعلقين بأمي واجد عطوها شقه فوق من حوشهم و استقرينا فوق منهم
#نردو_لقصتنا
طلعت م الدار قعدت نقرا شوي نعست قلت نقرا شوي و نوعى نقرا رقدت ونضت بعدها بشوي و حسيت بشي غريب صاير حسيت بشعور غريب شعور كأن في شي صاير لأمي كأن امي مريضه او شي هك ما كنتش متريح للشعور هذا صبيت وطلعت من داري مشيت لدار أمي لقيتها راقده جيت نبي نسكر الدار بس لفتتني طريقة نومها كيف انها مش متريحه ف النوم قربت منها نبي نوعيها ناديتلها امي ماردتش ناديتلها للمره الثانيه و الثالثه ماردتش تملكني شعور غريييييب شعور بالفقد قربت منها اكثر مسكت يدها لقيتها مسقعه ووجها ابيض مافيش نقطة دم💔 قعدت نهز فيها نبيها توعى بس ماردتش علي بكل سيبتها ونزلت لعمي نبي نكلمه والشعور مازال متملكني لكن مابش نصدقه مانبش نحطه في عقلي بالاصح مش مستعد نفقدها توااا بالذات 💔 نزلت كلمت عمي ورقا يجري خذاها للمستشفى طبعا لاننا نحن من ضواحي درنه ف خذينا وقت على ما وصلنا للمستشفى درنه قالو لنا توفت الخبر نزل علي كيف الصاعقه متخيلين شعور الفقد ان تفقد شخص كان اعز من حياتك لك انك تفقد شخص كان يعني كل شي بالنسبه لك شعور انك خلاص قعدت بروح ف الدنيا مهما كانو اللي حواليك تحس بنفسك وحيد من دون الشخص هذا هذا كان شعوري ف اللحظه هذك 💔
døsã kb
روحت على عيت جدي لقيتهم دايرين خيمة العزاء ما صدقتش او مانبيش نقنع روحي بالشي هذا مانبيش نصدق اني خسرت امي وان معش لها وجود في حياتي اول ما خشيت لقني خالاتي تضبطني وبكن ونا ما نزلتش مني ولا دمعه رقيت فوق خشيت للدار اللي ديمه نقعدو فيها نا وامي توقعت اني نلقاها فبها نفس ما متعود ديمه تقعد فيها بس ما لقيتهش قعمزت ع السرير ومسكت صورتها يعني صاح الكلام اللي قالوه صاح انك خلاص مشيتي وسيبتيني صاح معش ح نشوفك ولا نسمع صوتك ولا نسمعك وانتي تدعيلي 💔 باهي كيف نبي نقرا بدونك وكيف نبي نجيب الطب ولمن نبي نجيبه وانا قبل نبي نجيبه لك انتي يا امي أااااااااه ي امي كسرتيني💔
رقدت على سريرها و نا حاضن صورتها ثاني يوم وعتني خالتي قالت لي ننزل لوطه عشان نقعد مع الرجاله ف العزاء صبيت غسلت وجهي ونزلت قعدت مصبي مع الرجاله لين انتهى اليوم رقيت فوق لدار امي قفلت الباب طلعت صورتها وقعدت نحكي معاها لين رقدت عدا ثاني يوم وثالث يوم والاسبوع الاول نفس النظام بعد اسبوع كنت قاعد ف الدار وماسك صورة امي فجأة تجيني رساله مسكت تليفوني لقيتها رسالة ماسنجر فتحتها لقيتها ...........
#يتبع

لو عجبتكم الحلقه تفاعلو عليها 😁💖

#تعديل
ديرو متابعه عشان توصلكم الحلقات اول بأول 😁💖