شهر يوليو ...
اليوم السبت..
الساعه 7:30صباحا...
في إحدى ضواحي العاصمه..
تحديدا في منطقة كلها حوايز"مزارع"..
كانت في حوازة صغيرة..
ينخشلها من بوابه حديد لونها احمر"كونشيلو"
فيها حوش قديم...
قدامه ع اليمين حوض ميه ..
ع ايساره حجرة خارجيه "مخزن"..
فجنب المخزن بمسافه "حمام خارجي"..
ورا الحوش بالزبط..
مزروع شجر تفاح ...حوالي سبعه...
تفاح احمر حلو شهي في منظره...
❄هي كانت متكيه ع روشن دارها وتتفرج عليه وتغني..
تعا ولاتجي واكذوب علي..
كذبه مش خطيه..
اوعدني انو رح تجي ..
وتعا ولاتجي...
"رابعه"..
التفتت: هيااا ياام...جاايه..
نزلت من ع سريرها..
وتوجهت لباب دارها فتحاته وطلعت وسكراته..
توجهت وهي ماشيه في ممر طويل بعض الشي للكوجينه..
فاتت من حدا الدار اللي فيها مرت خالها تصلي
"الله اكبر"..
شبحتلها وهي تمشي..
وكملت طريقها لين وصلت في الكوجينه..
رابعه:صباح الخير يام..
خديجه وهي ادير في الزميته ردت :صباح الخير..
رابعه:مرت خالي قداش ليها تصلي؟.
غمضت عيونها خديجه بشده وقالت:هي قاعده تصلي ..فتحت عيونها..بريلها سلم بنتي..
رابعه بإبتسامه :حاضر..
طلعت رابعه من الكوجينه قاصده الدار اللي فيها مرت خالها..
كانت مقعمزة ع كرسيها وتصلي..
جت قدامها رابعه قعمزت ع روس اصباعها:مرت خالي خلاص صليتي ركعتين..
صفيه ضيقت عيونها وقالت؛خلاص تميت..
ابتسمت رابعه؛ايه تميتي..
صفيه :باهي باهي..
رابعه:شويه ونجيبلك فطورك..
صفيه:اني فطرت ولا؟؟
رابعه:لالا مازال..
صفيه هزت راسها بإيجاب وقعدت تسبح بسبحتها..
طلعت رابعه من حداها قابلها خالها خاش بشكارة خبزة وشكارة فطيرة..
رابعه قدمتله وخدتهم منه:صباح الخير خالي..
امحمد؛صباح الخير ياربيعه "تصغير لأسمها"..
ابتسمت:زميتك واتيه راهو..
حول شبشبه وخش :هي نراجي فيها..
توجه للدار..
وهي بعد قالت:شويه بس..
توجهت للكوجينه..
خشت لقت امها وتت صفرة فطور خالها ومرت خالها..
خديجه:جي امحمد..
رابعه وهي تحط فالشكاير ع الطاوله:ايه..
خديجه خدت الصفرة وطلعت بيها..
وهي لهت بالفطور متاعها هي وأمها..
رن تليفونها طلعاته من جيب التوته...
شافت الرقم ابتسمت وردت:صباح الخير فوجي..
فجره:صباح القديد ياحمارة ..
رابعه:ههههههههههه..
فجرة؛مازال تقوليه الإسم هدا نقرضلك لسانك.
رابعه بضحكه:باهي خلاص معاش نعاودها..
فجرة بضحكه وهي رافعه حاجبها:شن جوكم شن دايرين..
رابعه:تمام الحمد لله..وانتوا..
فجره:الحمد لله كويسين..ايه روبا غدوة بإذن الله من الصبح جايين..
ابتسمت وقالت:مرحبتين اهلا بجيه..
فجرة وهي تغني:مرحب ياضي القمراتي..
رابعه:هههههههههه..
فجرة بضحكه:المهم اعطي امي علم..
رابعه:إن شاء الله..
فجرة:هي مانعطلش عليك ياعريستنا بالسلامه..
رابعه:بالسلامه...
صكرت وردت التليفون لجيبها..
وكملت تجهيز الفطور...
وتت صفرة فيها طن وزيتون وهريسه وجبنه ودحي مطبوخ مع براد شاهي وحكة حليب وطواسي..
خدت فردتين خبزة سخان حطتهم فالصفرة..
ورفعتها وطلعت بيها من الكوجينه..
وتوجهت لنفس الدار..
خشت شبحت خالها كيف يوكل فمرته ويهدرز عليها ويبصر..
وامها مقعمزة قدام التلفزيون تتفرج ع برنامج صباحي في احدى القنوات..
حطت الصفرة قدام امها..
رن تليفونها من جديد..
امها شبحتلها..
هي طلعت التليفون من جيبها شافت الشاشه ابتسمت..
فتحت الخط وردت:صباح الخير نجلا..
نجلا:صباح النور عريستنا شجو..
رابعه:الحمد الله..وانتي..
نجلا؛الحمد لله..شن ديروا..
رابعه :كيف حطينا صفرة الفطور..
نجلا؛شن فطوركم..
ضحكت رابعه وقالت:طن ودحي مطبوخ وهريسه وزيتون..
نجلا :يييي هريسة امي..زيتون الحوازة ..اه ياكبدي غير امتى يجي غدوة..
رابعه بضحكه:جايين غدوة..
ابتسمت خديجه وهي تشرب في الشاهي بالحليب..
نجلا:ايه ياحنه غدوه من توا ديروا دورة ع مكيفاتكم..
رابعه :ههههههههه غير يقعد الضي..
نجلا:نهاركم قصدك مادبرتوش فمولد..
التفتت لخالها وقالت:يسلم عليك خالي..
امحمد:قوليلها مولد مش واخد نقعد في الظلام ولانتنفس النافظه وراسي يوجعني من الوجيج..
ضحكوا..
رابعه بضحكه:سمعتيه..
نجلا :هههههههه..سمعته سمعته ربي يهديه وخلاص ..المهم غدوة ياحنه جايين وتولي فراشات اني وصغاري ورويجلي..
ضحكت رابعه:باهي ياحنه..
نجلا بضحكه:هي مالا مانعطلش عليك بري افطري..بايات..
رابعه:باي...
وصكرت...وهي تقول..حتى فجره غدوة جايه..
خديجه هزت راسها بإيجاب وقالت:نخمم غير فراجل نجلا كيف بيتلاقى مع راجل اختك هاجر..
امحمد جي قعمز حداهم:مصطفى راجل ملتزم واكيد هو اللي حيبدا سلام ويطيح حبال السو في البير..
خديجه:إن شاء الله..
امحمد:بالله بنتي مديلي الخبزة..
رابعه :حاضر..خدتها ومدتهاله..
خديجه:رابعه..شن رايك اليوم نغسلوا بساطين..وغدوة الزوز التانيات لما يجوا خواتك..
رابعه وهي تاكل في الزيتونه:امم..باهي..
امحمد؛من غير سكر الشاهي ولا..
رابعه؛اممم..نسيت سكر النبات شويه نجيبه..
ناضت تجري ومشت طول للكوجينه..
خشت ..
ومشت طول وين مافي السكريه متاع سكر النبات خدتها وطلعت بيها...
❄❄❄❄
الساعه9:00ص
يكدوا في البساطات برا ويهدرزوا..
خديجه:كان هدا يطلعنا احمد غدوة وناخدوا اللي ناقص..
رابعه وهي تكد:باهي..
خديجه:هي بسرعه سقدي روحك قبل تقيل القايله الجو يحرق..
رابعه:حاضر..
بعد كملوا غسل بساطات هي وامها لفوهم وعصروهم وهما يعفسوا عليهم برجليهم وخلوهم يتسقطروا..
خشت رابعه دوشت..
وبعد دوشت مشت للكوجينه بتوتي للغدي..
طلعت كيسة لحم وحطتها فطنجرة مية بش اذوب..
سخنت القهوة وصبت فنجان وطلعت من الكوجينه للدار..
خشت...
وكيف جت بتقعمز قدام التلفزيون..
هرب الضي..
رابعه؛واااااك..طلعت التليفون من جيب قفطانها وشافت الساعه..
ع خشة امها:الساعه قداش..
رابعه :11كيف ضربت..
خديجه؛معناها يجي الخمسه..
رابعه وهي تحسب:ايه..صح ايه الخمسه..
هزت راسها بإيجاب ..غيرت عيونها لمرت خوها لقتها راقده..
بعدين طلعت..
اما رابعه تأففت بملل..بعدين لهت روحها بتليفونها..
فتحت نت الشفرة..
ومشت خشت ع صفحة خطيبها..
لقاته منزل منشور يتصبح فيه بأبيات شعر فصيح ابتسمت ودارتله احببته..
بعدين تلاشت هالإبتسامه..
وسرحت...
■فلاش باك..
قبل سنتين..
حفظتيه كله..
رابعه :ايه..
عدنان :باهي سمعي هي..
ابتسمت رابعه وبدت تسمع..
وهو بعيونه يتأمل فتفاصيل وجهها وسارح فيهم ومايسمعش فيها شن تقول اصلا..
استاقض ع صوتها لما قالت:هاه ..حافظه..
عدنان:مش هلبه..ترا عاودي مرة تانيه..
ابتسمت وقالت :باهي..
ورجع يتأمل فيها من اول وجديد..
وقعد 4مرات يخلي فيها تعاود تسميع بش يشبع من التأمل فوجهها اللي يحبه💕..
لين طلعت امها..
خديجه:رابعه هيا خشي اغسلي الماعين..
رابعه :حاضر..
وناضت بكتابها خشت ورا امها..
■الوقت الحاضر..
ابتسمت بحسرة..
بعدين رجعت شافت لتليفونها وهي تتفحص فصفحة خطيبها..
❄❄❄❄❄❄
الساعه 12:00ليلا..
مقعمزة ع صونيه كبيرة تعجن فعجينة المقروض..
خشت عليها بنتها..
رابعه:يام نسينا المكسرات!
خديجه:لالا مانسيت شي وصيت عليهم اختك هاجر..
رابعه ابتسمت براحه:باهي الحمد لله..
رن تليفونها..شافت المتصل ابتسمت وطلعت من حدا امها.
امها ابتسمت وهي مازال تعجن..
💕💕💕
خشت لدارها وهي ترد..
رابعه:الو جلال.
جلال:ياهلا بالحلو..شن جو..
رابعه:تمام الحمد لله.
جلال:نورتيني اليوم فالصفحه..
رابعه بضحكه:منورة بأصحابها..
ضحك وقال:تهبلي رابعه عندك علم.
ابتسمت بخجل..
جلال:وعندك علم من نهار ريتك لتوا واني بنهبل هبال عليك ياعسل..كان تعرفي فشن خاطري..
فنصت رابعه:لالا جلال الدوة هادي من الاول قتلك مانبيهاش..
جلال بضحكه:راك الخميس هدا بترقدي فحضني..
رابعه:لوسمحت جلال الدوة هادي خليها لوقتها بالله عليك..
جلال:هههههه..حي كان ماتطلعيلي معقده ونحصل فيك.
هي اضايقت وقعدت ساكته..
ابتسم وقال:خلاص ياودي انبصروا...ايه هدرزيلي شن درتوا اليوم ..
هي ابتسمت بالسيف وقالت: عادي..يعني ....
وبدت تهدرز عليه..وهو مرة مرة يحدفلها كلمه وهي تضايق منه ويبدا عندها رغبة شديدة انها تصكر فوجهه بس مش قادرة...
قعدت طول المكالمه تساير..وتتجاهل كلامه اللي يكون خارج التغطيه..
لعند ماهي تحججت بحجه بش تصكر:بنمشي لأمي تنادي..
جلال:باهي ياعسل..ياسكر..تصبحي ع خير....اممممممواااه..
هي بضيق ردت:وانت من اهله...سلام..وصكرت..
غمضت عيونها وتأففت..
♤خطوبتها تقليديه...روها مرة اهله في مناسبه وعجبتهم هلبه وسألوا عنها وجوا خطبوها وامها كانت متحمسه هلبه للموضوع لأن فنظرها موضوع ماينردش..
عيله مرتاحه ماديا ومعروفين وعندهم فالبلاد مركز والولد لما شاف رابعه هبل عليها وشد في الموضوع..هدا كله خلا خديجه تجبر رابعه ع المواقفه..
ورابعه ماتعرفش تقول لأمها لا واللي تبيه ديره دون نقاش..وافقت ع خاطر امها وهي حاليا قاعده تحاول تتكيف مع الموضوع بش تقبله اكثر واكثر..
بس الحكايه مش ساهله♤
❄❄❄❄❄
بعد كملت خديجه شغلها..
خشت للدار اللي تبات فيها مع حماتها..
طلت عليها ..
بعدين مشت لفراشها تمدد ورقدت..
❄❄❄
بينما رابعه كانت متمدده ع سريرها تشوف للفرارة متاعها وهي ادور..
وتخمم وتفكر فبعدين..
بس تفكيرها هدا سرح ورجع للماضي البعيد..
■فلاش باك
قبل سنين طويله...
كان عمر رابعه..6سنين..
ماشيه للمدرسه ع رجليها وهو وراها بمسافه بسيطه..
وقتها فصل شتي..
وفالطريق كان في غدران ميه..
وقفت قدام واحد فيهم معاش عرفت شن دير..
جاها هو..
عدنان:تعالي معاي..
خداها من يدها..وقعد يمشي هو وياها مسافه بسيطه لعند ماوصلوا لجهة مافيهاش ميه..
فوتها هي الأولى بعدين مشي وراها..
وكملوا طريقهم..
وصلوا للمدرسه..
عدنان:هاكي خودي..
شبحت للتفاحه اللي فيده ابتسمت وخدتها..
عدنان:هيا نخشوا للمدرسه..
رابعه:هيا..
■الوقت الحاضر..
تأففت ورقدت ع جنبها..
غمضت عيونها بالسيف تحاول ترقد..
❄❄❄❄
يوم الأحد..
الساعه 9:30صباحا..
فالطريق..
فجرة: هديل خودي ..
خدت هديل طاسه الميه..
فجرة شبحت لراجلها:اكيد الموضوع بنفتحه معاها يا محمد لكن مش من الاول..
محمد:حاولي تستعجلي يافجرة راهو بنقعدوا في الشارع قوليها لأمك عربيه وكانك متحشمه انتي اني تو نقوللها ..
فجرة: لا شن تقوللها ماتقوللها..هدا اللي مازال..هني روحك اني تو نفتح معاها الموضوع من غدوة..
خبط ع دومان السيارة خبطه خفيفه وقال:نراجو ونشوفوك شن ديري..
فجرة بضحكه:حط فبطنك بطيخه سيفي..دانت وراك رقااله.
ضحك محمد وهو يحرك فراسه ايمين ويسار..
وبنتها وولدها حتى هما يضحكوا عليها...
❄❄❄❄❄
طاب الشاهي؟.
رابعه :ايه يام..
رن تليفون رابعه..
طلعاته من جيبها وشافت الرقم قالت بصوت عالي:يااااام فجرة جت ..
.....
خديجه ناضت وطلعت برا...
لقت خوها يفتح فباب الكونشيلو..
بعد فتحه..
خشت سيارة محمد..
درسها ..
ونزلوا منها..
نزلتلهم خديجه ..
طول جوها احفادها سلموا عليها وهي فرحانه بيهم..
بعد سلمت فجره ع خالها جت لامها..
فجره:ست الحبايب..
ضحكت خديجه وحضنتها وسلموا ع بعض سلام حار..
بعدت فجرة...
محمد:كيف حالك نسيبتي..
خديجه :الحمد لله..
خشت هديل جري داخل لخالتها..
خشت للكوجينه.
هديل :روبا..
ضحكت رابعه وحضنتها..
ع خشة فجرة ووراها امها.
جبدت فجره صفرة وبدت ادربك عليها زي البندير:يانا يانا طرابلسي...الورده طاحت ع الكرسي..
وقعدت ادور وتغني : نور العين وعاجبته عليها درس كرهبته..
وهما يضحكوا عليها..
بطلت..وقدمت لأختها حضنتها هي شاده الصفرة؛ربي يتمم ع خير روبا..
رابعه بضحكه:تسلمي فوجي..
خبطتها ع ظهرها بالصفرة..
ضحكوا..
فجرة بعدت:تبيني نوصلك لجليل معاقه انتي..
كلهم يضحكوا..
ورابعه تضحك وهي تتحسس فظهرها..
.....
برا..
محمد:ماشيه ياحاج الحمد لله..
امحمد:الحمد لله..هي خش للمربوعه..
محمد؛هي..
وخشوا الزوز داخل..
في نفس الوقت اللي وصلت فيه هاجر..
درس مصطفى فم الباب..
مصطفى:لولا العوزة اقسم بالله ماكنت خليتك تطلبي من مخلوق..
هاجر:مصطفى خلاص بالله عليك معاش تقول هكي..
تنهد مصطفى وشبح القدام..
هاجر شبحتله بضيق..وبعدين رنت ع اختها...
❄❄❄❄
خشت للحوش..
رفعت خمارها وقالت:السلام عليكم..
وحضنت امها..
خديجه:حمد لله ع سلامتكم..
هاجر: الله يسلمك يما..
بعدت ..
بعدين حضنت اختها..
هاجر: عروستنا..
ضحكت رابعه وحضنتها...
بعدين سلمت ع اختها فجرة وبنتها...
وقعمزوا كلهم ع صفرة الفطور...
❄❄❄❄
واقفين الولاد قدام دار المخزن ويشوفولها..
مأمون:قتلك بوداني سمعت راجل خالتي عطيه يقول لراجل خالتي نجلا ان فالدار هادي في كنز..
معتز:امتى باهي..
مامون:لما جينا اخر مرة في حادث جدي امحمد..
معتز: اه حني ماجيناش معاكم ع خاطر بوي متعارك مع عمي كمال..
مأمون:ايه..باهي توا قولي بدور معاي ع الكنز..
معتز هز راسه بإيجاب..
سكر مأمون يده ومدها وهي بوضع عمودي لمعتز..
معتز ضحك ودار نفس الحركه وضربوا قبضات ايديهم فبعض..
❄❄❄❄❄
هاجر:ايه يام الحمد لله بعد دارولها العمليه تحسي حالها احسن.
فجرة: إن شاء الله غير تهمد وتهدا ..
ضحكوا..
خديجه بضحكه:فجرة!
فجرة :ماقلت الا الحق عزوزة هاجر عزوز شمطاء غبرة..
هاجر ضحكت وهي تفنص :وطي صوتك..
ضحكت فجره وهي تحط فالخيارة ففمها..
وهما يضحكوا عليها..
بعدين هاجر شبحت لأمها:يام اللي قتيلي عليه جبته..
خديجه بإبتسامه:يبارك فيك وفي مصطفى..
ابتسمت هاجر..
ورابعه تشوفلهم وهي تاكل ومبتسمه بحب..
❄❄❄❄❄
درست فهالوقت سيارة سالم راجل عطيه..
سالم :رني ع اختك هيا..
شبحتله عطيه بربع عين من المرايا ..بعدين شبحت لتليفونها وضربت ع رقم اختها..
وولدهم احمد اللي كان مقعمز جنب بوه كان باين ع وجهه ملامح الإمتعاض...
❄❄❄❄
اهيا خشت تكركب
اهيا خشت تدرهب..
ضحكت عطيه:بري يافوجي..
فجره شقلبت عيونها وقالت:إيوااااه..
ضحكوا..
سلمت عطيه ع امها...
بعدين سلمت ع اختها..
عطيه :ياوخيتي سلمها طشونتنا كبرت وبنزوجوها..
ضحكت رابعه...وحضنوا بعض..
عطيه بهمس:ربي يتتملك ع خير ويجعل نصيبك خير من نصيبنا..
تلاشت ابتسامه رابعه..
بعدت عنها عطيه وسلمت ع فجره..
احمد:اوووو حناي..
هديل قعدت تشبحله وعيونها يلمعوا وقلبها يدق بقوة💕
وخالتها رابعه مركزة معاها..
بعد سلم احمد ع حناه سلم ع خالته:روبا يامشفشفه امس بس كنا نلعبوا اني وياك و عدنان كيلو بانيه..
ضحكت بس فداخلها كان في غصه وحسرة..
احمد:ربي يتمملك ع خير..
رابعه:تسلم وعقبالك..
احمد:لالالاالا بعيد السو..
هديل اضايقت..
فجرة :تي غير تجي بنت امها اللي اطيحك وراسك ماضال الا واخدها فدار مع امك..
ضحكوا..
احمد بضحكه:خل تجي قبل..
شبح لهديل ومد يده :شن جو..
هديل سلمت عليه وهي تشوف لعيونه:تمام..
طلق يدها ومشي لامها سلم عليها بعدين طلع...
وهي معاه بعيونها...
ورابعه معاها ع الخط...
❄❄❄❄❄
برا..
واقفه قدام الحمام الخارجي تراجي فبنتها..
هاجر:مازال ياندى..
ندى من داخل:شويه بس..
هاجر تنهدت بملل وهي تشوف للصغار كيف يجروا ورا بعض..
هاجر:بالشويه انت وياه...راكم اطيحوا...
سكتت لما شافت باب الكونشيلوا ينفتح وولد اختها احمد يفتح فيه وشافت سيارة كمال راجل نجلا خشت..
هاجر:ياحليلي ...ياربي استرنا
....يتبع...
