❄...
دارت القهوة لخالها..
خدت صفرة صغيرة حطت فيها البكرج وفنجان بصونيته وصكريه سكر النبات...
وطلعت بيها من الكوجينه متوجهه لدار التقعميز..
لقت خالها يعاند في الراديو..
قدمت حطت الصفره وقالت:خيره ماباش يخدم..
امحمد :ايه مش عارف شن جاه..
رابعه:ترا عطيهولي نشوفه..
مدهولها...
قعدت تحاول فيه من هني ومن هني مافيش فايده..
ضحكت بقلة حيله وقالت:ماقدرتش..
خداه وهو يضحك بعدين قال وهو يشبح للراديو:
"تو يروح عدنان ويصلحه"..
هي تلاشت ضحكتها..
وطول لفت وانسحبت من الدار ..
خالها تنهد وحط الراديو ع تركينه ..حدا مخده..
قرب ليه صفرة القهوة..
خدي البكرج .صب منه في الفنجان..
حطه...
بعدين خدي صكريه سكر النبات..
فتحها وطلع منها كعبه...
فهاللحظه
خطروا عليه الصغار منين كانوا يحدفوا فيها فوق ويتلقوها بفامهم المفتوحه..
الحركه هادي هو كان يدير فيها وعلمهالهم..
ضحك..
بعدين حدف الكعبه فوق..
وفتح فمه ..وتلقاها...
لكن الكعبه هادي طلعت عن خط المسار وتعدت الحدود..
مفروض تستقر في الفم...
لكنها خشت فمكان تاني ..
خلاته ينخنق بيها..
حط يده ع رقبته..
عيونه جاحظات ..
مش قادر يطلع صوت..
قعد يشهق بس صوت الشهقه كان غير مسموع..
قاعد يصارع .
ومرته اللي راقده معاه في نفس الدار رايحه في النوم مش حاسه بشي..
وهو يصارع ..
حط ايديه الزوز ع رقبته...ومازال يشهق..
هدا كله..
ورابعه في الكوجينه اديرله في الفطور ودموعها ينزلوا...
هو..
اخر شي حاول يديره وهو يستنجد..
خبط بيده ع الأرض..
بس للأسف...
مامن سامع...
خلاص الراجل..
بدي يطلع فالروح...
يتصرع ويتصرع..
لعند ماخلاص..
ارتفعت الروح....
وسقط الجسد...
❄❄❄❄❄❄
فهالوقت..
ناضت خديجه...
طلعت من الدار متاعها..
متوجهه للحمام..
وهي ماشيه..
خطمت جنب دار التقعميز..
لمحت بطرف عينها..
يدوب شافت خوها..
لكن ماشافتاش بشكل طبيعي..
وقفت ..
التفتت..
شبحاته..
طايح ع الأرض فجنب صفرة القهوة...
قلبها انقبض بقوة..
قدمت...
وكل ماتقدم كل ماقلبها قبضته تزيد..
وقفت عند راسه وقالت.
"إمحمد"..
لارد...
خديجه بصوت مخنوق :امحمد..خوي...
لارد..
ع جية رابعه بالصفرة..
شافت المنظر...قدمت بخطوات ثقيله بعض الشي..
طبست
حطت الصفرة...
وجت عند راس خالها تنوض فيه وعيونها معبيات دموع..
"خالي...خالي...تسمع فيا...خالي نوض"..
لارد..
لاحركه...
قامت عيونها فأمها ودموعها طاحوا..
وامها مازالت مصدومه وهي تشوف لخوها..
ع جية فجره..
شافتهم..
فجرة بخلعه:خيركم..
قدمت تجري..وقفت وهي تشوف لخالها:خاالي!!
نزلت قعمزت وقعدت تخبط ع وجهه وتقول
"خالي..خالي"
صوتها كان عالي ومسموع..
اللي فالحوش استاقضوا..
ناضوا البنات جري وهما مخلوعات...
خشوا الدار..
عطيه:شن في!!
فجره بدت تبكي :خالي ياعطيه خالي..
خبطوا البنات بإيديهم ع وجوههم..
قدموا بسرعه..
وقعدوا ينوضوا فيه..
عطيه..
ونجلا..
وهاجر..
ينادوا ويقولوا "ياخالي.."..
هدا كله واخته مصدومه..
ومرته مازالت تغط في النوم..
سمعوا الرجاله الأصوات..
خشوا من برا يجروا...
وكانت سابقتهم هديل..
هديل :شن في خيركم..
فجره ببكي :جدك ياهديل جدك..
خشوا الرجاله ومعاهم احمد..
قدموا وشافوا امحمد ووضعه.
محمد:يالطيف..
مصطفى وكمال وسالم مصدومين..
هديل دفت امها وقالت:حولي يام..
جت قعمزت عنده..
حطت ايديها الزوز ع قلبه وبدت اديرله فعملية الإنعاش..
فعز اللي هما فيه..
احمد كان سرحان فهديل..
ومااستاقضش الا ع صوت خالته رابعه:جيبوا الدكتور جارنا جيبوه..
سمع مصطفى الكلام..
وطلع يجري....
وهما متفلوشين وحالهم حال..
محمد شبح لصفيه كيف راقده شبح لكمال وقال:مفروض نطلعوها..
كمال هز راسه بإيجاب..
وكل واحد مشي ع طرف من سريرها اللي يتحرك بالعجل..
وقعدوا يطلعوا فيها برا الدار..
وخديجه تشوفلهم..ومازال مش مستوعبه شي من اللي صار.
لحظات...
وجي مصطفى بالدكتور..
وخروا النساوين وقعدوا واقفات..
والرجال حداه...
وخديجه مقعمزه ع الكرسي تشبح للدكتور...
تفحص الدكتور بسماعته اللي كان حاطها ع صدر امحمد نبضات القلب...
مط شواربه لداخل بأسف..
حول السماعات من ع وذانه وقال..
"عظم الله اجركم".
البنات في عيطه وحده..
"خالي"...
رابعه تشوفله بعيون جاحظات..
الدموع يصبوا منهم صب...
اما خديجه مازال مصدومه...
تشوفله بعدم استيعاب مش مصدقه!!..
البنات يعيطوا ويندبوا ويبكوا..
والرجاله يسترجعوا ويحوقلوا...
الدكتور ناض وطلع من حداهم..
ولحقه محمد...
محمد:دكتور كيف مات بالزبط..
الدكتور:تفاصيل زي هادي اني مانعرفهاش..بس اللي نعرفه ان الحاج امحمد الله يرحمه عنده القلب نرجح انه يكون ناسي دواه وماخداشي..
محمد هز راسه بإيجاب وعلامات الأسف ع وجهه...
الدكتور: سلامة روسكم...والله يرحمه ويغفرله..
محمد:آمين..
مشي الدكتور وطلع..
ومحمد قعد واقف يسمع فعياط النساوين وبكاهم...
❄❄❄❄❄❄
انفك سرب الضي الملون ونزلوه...
انحط القرآن في المنظومه...
هي...
حولت القمجه والسروال البودريات..
ولبست توته لونها اسود وضمت شعرها فوق..
وكانت ملامح وجهها جامده...
وطلعت من الدار ..
ومشت تعول مع خواتها..
وين خشت عليهم الصاله ..
شافوها شن لبست..
اسود..
شبحوا لبعضهم...
فجره تنهدت بألم ورجعت كملت اللي فيدها..
وهي معاهم يد بيد..
اضم ودموعها ينزلوا..
شويه
والرجاله طلعوا جثة امحمد..
سيبوا اللي فيدهم وطلعوا يجروا ..
وهما يشوفوا فخالهم لأخر مرة..
قعدوا يبكوا ويعيطوا..
ورابعه تشوفله وتبكي بصمت..
حطوه فالسيارة...
وتحركوا طول....
هدا كله..
وخديجه مازالت مش مستوعبه شي من اللي صار..
اما مرته...
فكانت فايقه..
بس حداها البنيات..
فاتحين كتاب فيه رسوم ...
هاله:هادي تفاحه.
صفيه:تفاحه..
ندى:هادي برتقاله..
صفيه :برتقاله...
يلهوا فيها بطلب من امهاتهم..
مايبوش بشويه الوعي اللي قاعد عندها تفهم اللي صار لأنها مش حتتحمل واكيد حتلحقه..
❄❄❄❄
وانقلب العرس لعزي..
ومن العبمبر وعصير اللوز..
ل اللبن والتمر..
والناس بدال ماتجي تبارك..
جايه تعزي...
خديجه شبه استوعبت بس كانت تهرب..
كانت تجري هني وهني وتعول مع البنات ومانزلتش منها ولادمعه..
عطيه:امي وضعها يخوف..
فجره :حتى اني من بكري نخمم فيها..
جتهم :طلعوا صفرة لبن في ناس توا كيف جوا..
وفاتت من حداهم ..
وهما يشوفولها بريبه...
🥀🥀🥀🥀
دفنوه...
بعد اقاموا عليه صلاة الجنازة..
وروحوا الرجاله..
وع مرواحهم علت من جديد اصوات النواح والنحيب...
وفات هداكا اليوم...
وكانت الفاجعه كبيرة ..
طبعا اهل العريس جو عزوا...
بس وجوههم كانت مقلوبه..
وفي من عيلته ناس لقحت بالكلام..
فجره:مصح وجهها الحقيره..
نجلا:والله بوداني سمعتها قالت اللي صار مايبشرش بالخير..
عطيه:ااه كان اني اللي سمعتها بس راهو قلتها قدمكم نحس وانتم فال الشوم..
هاجر: ناس جايه تعزي وتقول فقطاف فارغ زي هدا؟...
❄❄❄❄
هي كولي مرت خالي..
صفيه:امحمد وين..
رابعه :في الحوازة..
صفيه :يلقط فالزيتون..
رابعه :ايه..هي كولي هي..
فتحت فمها صفيه وكلت...
ورابعه تشوفلها بألم..
وهديل اللي مقعمزة حداهم كذلك...
❄❄❄❄
الساعه 1:30 ليلا..
من هول الصدمه ..
ومن قوة الحزن..
انطرحوا كلهم رقدوا...
بس في ناس..
لا موت يعظهم...
ولاحزن يأثر فيهم...
خش يتسلل في الليل لدار نسيبته...
عارفها راقده حدا بناتها في الدار التانيه..
وصل فدارها..
فتحها..
ابتسم بفرح لما لقاها مش مسكرة بالمفتاح..
خش بحذر..
فتح الضي متاع تليفونه...
وقعد يدور...
فكل تركينه ع المفاتيح..
سالم بهمس:تي وين انتلفت بيهم؟
قعد يدور لعند ماجي ضي تليفونه ع الحيط لقي المفاتيح معلقات ع المسمار..
طاار من الفرح...
طول خداهم...
وطلع بسرعه وسكر الباب..
وتوجه برا الحوش...
وماكانش عنده علم ان في قطاطيس صغار يراقبوا فيه..
مأمون:هيا بسرعه..
طلع وهو يمشي بحذر.
والولاد وراه...
....
وصل في باب المخزن فتحه.
وخش...
لما خش داخل فتح الضي...
قعد يمرر فعيونه ع اللي فيه..
ماعين وسبيزة...
لعند ماجت عينه ع صندوق مغطي بشرشاف..
ابتسم بخبث وقال:اهوا صندوق السعد والهني...
قدمله طول..
حول الشرشاف ولوحه...
لقي الصندوق مصكر بقفل..
تلاشت ابتسامته..
بعدين فنص..
وشبح للمفاتيح..لقي بيناتهم واحد صغير..
ضحك بفرح..
وطول حطه في القفل وبدي يفتح فيه...
انفتح..
قلبه يرقص رقيص من الفرح..
قام الغطا...
وهو ملهوف يشوف شن فيه..
توسعوا عيونه بصدمه...
لما شاف...
بندقيه قديمه...
ومصحف قديم...
وجرد مطبق...
فتح فمه وقعد يشبحلهم وخلاص...
بعد حوالي 5دقايق..
سالم؛ما تجي منكم تزغرط انتم ياعيلة الفقر..
فجأة..
هرب الضي..
انخلع..
طلع الغطا طاح ع يده..
عيط وجبدها فيسع..
سالم وهو شاد ويتألم:العزي فيكم ياعيله الهم.
قعد يتحسس فيده..
بعدين فتح فلاش التليفون..
وجاي بيطلع...
شهق بصوت عالي لما جي ضي الفلاش ع وجوه الولاد اللي واقفين فم الباب ويشوفوله...
❄❄❄❄❄❄
يوم الخميس..
الساعه 10صباحا...
فجره ببكي:مابكتش بكل يامحمد خايفه عليها خايفه تصيرلها حاجه..
محمد :وينها هي..
فجره وهي ترشف:فدارها..
هز محمد راسه بإيجاب..ومشي من حداها..
وتوجه طول للمربوعه...
شرح الوضع لعدايله بش يشوروا عليه شن يدير..
كمال:شيخ مصطفى صوتك وانت تقرا في القرآن حزين..
مصطفى شبحله..
محمد :صح..كان تقرا حداها قرآن..
مصطفى شبح لمحمد .
شويه ورن تليفونه..
مصطفى :لحظه شويه..
ناض بتليفونه وطلع من حداهم..
قعدوا معاه بعيونهم لين طلع..
بعدين كمال شبح لسالم:ماتقوليش خيرك من بكري وانت ساكت..
قال بحده:حازن..
محمد رفع حواجبه...
وكمال شبه فهم شن في لأن الوحيد اللي يعرف بالموضوع لكن ماباش يشارك سالم فيه..
برا...
مصطفى:هاه شن النتيجه..
:للأسف ياشيخ انت مصاب بسرطان البنكرياس وفي الطور التاني...
مصطفى بألم:انا لله وانا إليه راجعون..
صكر ع الدكتور..
ومشي بخطوات ثقيله..للحوش..
خش داخل...
وطول توجه لدار نسيبته...
وقف قدامها..
وقعمز...
نساباته كمال ومحمد لحقوه...
بدي يتلى في القرآن...
كانت آيات سورة البقرة...
اللي تبدا ب ¤ولنبلونكم بشي من الخوف...
وكمل يقرا بصوت حزين...
جو النساوين قعدوا يسمعوا..
واحمد خش من من برا حتى هو ويسمع..
وسالم في المربوعه ويسمع..
وخديجه فدارها اللي هو مقعمز قدامها ويتلا تسمع..
وصل في آية "إنا لله وإنا إليه راجعون"...
انهارت خديجه بالبكي..
ومصطفى بكي معاها..
وكلهم يبكوا ...
حتى سالم ماقدرش يقاوم وقعد يبكي حتى هو...
صفيه فدارها :عزوزتي توفت ياناااري عليها...
❄❄❄❄❄
وفات النهار..
والناس مابطلتش مشي وجي..
لعند الساعه 11:00..
واقفه في الكوجينه تغلي في اليانسون لأمها..
ع خشة اختها نجلا:بالله رابعه مديلي باكو الدوا متاع كمال من الثلاجه..
مشت رابعه للثلاجه وفتحتها..
نجلا:جلال كلمك..
رابعه اضايقت:تليفوني راح معاش نندري عليه..
نجلا تنهدت وقالت :ماكلم حد من العيله هو اصلا..
رابعه طلعت الدوا وصكرت التلاجه..
ومشت لأختها مدتلها الدوا...
خداته نجلا..
فجأة..
سمعوا صوت مأمون يقول..
"عدنان جي ..عدنان جي"..
قلب رابعه قريب طلع من مكانه...
مشت طول لروشن الكوجينه وقعدت تتفرج...
شافاته..
بالبدله العسكريه واقف يحضن في محمد..
دموعها طول نزلوا...
❄❄❄❄
عظم الله اجرك خالتي خديجه..
خديجه وهي تصافح فيه:اجرنا واجرك ولدي..
عدنان وعيونه معبيات دموع:اليوم الصبح بس عرفت جيت طول من الجنوب
خديجه :حمد لله ع سلامتك..
عدنان :الله يسلمك..
شبح للبنات:خالتي وين..
فجرة:تعالى معاي..
مشي مع فجره..
وكلهم عيونهم معاه...
عطيه:يوجع القلب..
بعدقالت كلمتها ..
فنصت وعيطت طول:اااااااه..
كلهم انفجعوا..
عطيه:ووووك عليا ووووك...احمد...ساااااااالم..
سالم كان مقعمز برا يندب ع حاله..
سمع صوتها ناداه..
نسي كل شي...كل شي..
وطول خشلها يجري..
وصل في الصاله لقاهم متفلوشين وواقفين عليها..
وهي تبكي وتعيط..
سالم:بسرعه احمد ولع السيارة..
طول احمد طلع يجري لسيارة بوه..
وهو قدم لمرته..
عطيه بألم :سالم..
سالم :هي حبيبتي هي بنرفعك للمستشفى ..
عطيه:ااااااه..
سالم :ساهله ياقلبي ساهله..
حضنها وطلعها وهو يديدش فيها..
ابتسموا وهما يشوفولهم..
هديل:امي نمشي معاهم..
محمد:بري بنتي..
نجلا:هي تعالي نمشوا معاهم..
خدت نجلا بنت اختها وطلعوا يجروا..
التفتوا البنات لأمهم لقوها مبتسمه ابتسامه خفيفه..
في الكوجينه..
كانت رابعه تشوفلهم من الروشن وع وجهها ابتسامه..
لين طلعوا..
بعدين التفتت للشاهي..
طفت عليه..
وحطاته فصفرة فيها ماكله خفيفه وتوجهت بيها لدار التقعميز..
في الدار..
صفيه وهي شاده وجهها بإيديه :شن حالك وليدي شن داير..
عدنان:الحمد لله ماشي حالي..
ع خشتها هي بالصفره..
جت وراه وحطتها وقالت:العشي..
هوشبح بطرف عينه للصفرة وقال:صحيتي..
صفيه:وليدي مازال بتمشي وتخليني..
عدنان:نكمل الشهر هدا...رجع شاف بطرف عينه وكأنه يوجه في الكلام لحد بعينه وقال...بنروح ونستقر هني ونقعد معاك..
رابعه قلبها قعد يدق بقوة ووجهها ولااحمر..
طول انسحبت من الدار..
هوابتسم ع جنب..
❄❄❄❄❄
الساعه 1:00ليلا..
كانت لامه بناتها بحداها..
خديجه:حنقسم عليكم ورث بوكم وكل وحده تاخد نصيبها وتتصرف فيه..
فجره ابتسمت بفرح..
خديجه؛خالكم معقب ارض قالي كان غبت ع الدنيا بيعيها وقسمي حقها ع البنات..
هاجر من الفرح لين دموعها نزلوا..
خديجه:ربي يهدي سركم بنياتي..
قدمولها طول حضنوها...
وهي مبتسمه....
شويه وخشت نجلا عليهم:عطيه جابت بنيه..
ابتسموا بفرح..
قدمت وهي تقول :ترا وسعوا..
قعمزت وحضنت امها..
ضحكوا..
وخديجه مبتسمه..
❄❄❄❄❄
واقف في الفيراندا..
يشوف لأحمد وهديل كيف يهدرزوا مع بعض..ابتسم..
قعمز..
شبح ايمينه شاف الراديو..
مد يده وخداه...
شغله ماباش يخدم..
ابتسم وناض للدولاب بش بياخد عدة التصليح..
برا...
احمد:اخر مرة نلقاك واقفه ع حد وتضحكي معاه هكي..
هديل برفعة حاجب :وعلاش!!
احمد رفع حاجبه :تستغبي يادكتورة..
هديل :لا مانستغباش..
احمد :اممم..تمام...بنت خالتي..ولد خالتك يحبك 💓..
انصدمت ومااستوعبتش للي سمعاته..
ماكانش في قدامها غير الهروب وفعلا طول هربت تجري وهو يضحك عليها...
فجأة..
الضي هرب
احمد: ايااح حتى المولد رديناه لصاحبه..
❄❄❄❄❄
في الدار..
الولاد راقدين ويهدرزوا..
معتز:باهي شن هو اللي فالصندوق ..
مامون :سألت حناي..قالتلي حاجات قديمه ورثوها عن جدهم الكبير اللي حارب الطليان..
معاد:يعني مش دهب ..
مأمون :ضحكت عليا لما قلتلها هكي..
معتز :حيي عليك خبرت ع عمي سالم..
مأمون:لااااالااا..تبيه يجيبلي الجن!!
معاد:ايوه..ماتقولش..
♤هددهم سالم لو خبروا عليه يناديلهم الجن اللي في المخزن.."كذبه منه" والصغار مشت عليهم...اطفال♤
❄❄❄
ليلتها من فرحتهم بخبر جياب عطيه
ماقدروش يرقدوا
داروا صفرة عشي ع ضي لامبة الشحن وقعمزوا ياكلوا
بس كان في كلام في افامهم يبوا يقولوه لرابعه
رابعه:هكي باهي ندى..
ندى؛ايه..
رابعه فتحت النص وبدت تحط فيه طن بالكاشيك..
خديجه شبحت لفجره
فجرة تكلمت:احمم..رابعه..
رابعه وهي لاهيه بنفاص الصغار:همم.
فجره:اه..راجلك كلم محمد...وقاله مانراجيش اكثر من شهر..بعد شهر سفروهالي..
قامت عيونها فأمها..
امها عيونها فالصونيه..
رابعه شبحت لفجره وقالتبحزم:قولوله نبي نطلع من حوش اهلي عروسه بعد عام..عجبه باهي ماعجباش.. قاعدين ع البر..
ورجعت لهت بالنفاص..
البنات شبحوا لبعض..
اما خديجه شبحت لبنتها وابتسمت بتهكم..
وفهمت عليها كويس...
❄❄❄❄❄
هديكا الليله..
رقدوا الرجاله برا ...
والنساوين داخل ..
والضي مازال هارب..
والجو لاهو ساخن ولاهو بارد..
مع الساعه6 الفجر...
فتحت عيونها..
لقت الفرارة ادور..
ابتسمت..
شبحت جنبها لقت بنت اختها راقده حداها..
فنصت عيونها لما اذكرت ان عدنان بيولي للجنوب بعد الفجر لإن الآجازة اللي خداها بش يجي ساعات فقط..
بحذر ناضت بش ماتنوض بنت اختها..
طول طلعت من الدار..
قعدت تسكر في الضي اللي تلقاه مفتوح..
وادور عليه..
لعند.ماوصلت فم الباب ..
شبحت جنبها شافت المدخل مالقتش بوتيله عرفت انه مشي..
اضايقت ..
فجأة..
سمعت صوت موسيقي..
قعدت اتبع فالصوت لعند ماوصلت لداره هو..
لقتها مفتوحه..
شافت الراديو محطوط ع الكامدينو وموصول بالضي..
وفداخله شريط..
بدت الأغنيه..
القلب ماينساكم..
ياغاليين القلب..
القلب ماينساكم ياغاليين
ياغاليين القلب..
القلب ماينساكم.
يخطر علي كل..
كل يوم غلاكم ..
ياغاليين..
ياغاليين القلب...
اتكت ع قفص الباب وهي تضحك ودموعها تنزل..
رساله عدنان وصلتها خلاص..
وهي فيدها القرار..
ورابعه قررت وانتهي الموضوع...
والنصيب زي الموت لايمكن رده...
وهالشي فهماته خديجه امها كويس بعد كل اللي صار....
سبحانه..
بكعبة سكر نبات امره كان...
ورابعه ولت من نصيب عدنان...
❄النهايه❄
💓💓💓💓💓💓💓💓💓💓💓
القصة مقتبسه من فيلم ايراني اسمه "قطعة سكر"..
اني غيرت فيها تفاصيل ...بس اساس القصه هو نفسه...
نتمنى نكون وقفت فيها ونالت اعجابكم..
❄جمان فريد❄
