#محكمه_خاصه
#قصص_عراقية_حقيقية
جزء الاول الى الاخير
للكاتبه فردوس عبد اللطيف
انا ايمان اعيش مع عاءلتى المكونه من امى واخى صلاح واختى نوال والدى متوفى نعتاش على راتب تقاعد والدى لكن لا يكفى المعيشه واخى يشتغل ويصرف على البيت كملت دراسه الاعداديه دخلت جامعه كليه ادارة واقتصاد قسم الادارة
اجواء الجامعه تختلف عن المدرسه لان بيهه جميع المستويات وكل الطبقات ومناطق مختلفه بينما بالمدرسه نفس المنطقه ومابينه كشخه وتميز طبقي
الجامعه عبارة عن استعراض للازياء والسيارات والمكياج بالنسبه للطالبات لكن بسيط الحال مثلى لايستطيع دخول المنافسه يبقى يتفرج فقط والمجموعات والكروبات هم حسب التقارب الفكرى والاجتماعى
بالنسبه الى من شفت هالوضعيه قررت ان ارتبط بشخص يخلصنى من الفقر والحاجه واكدر البس ما يعجبنى واصرف براحتى وانا كنت جميله طويله بيضاء عيونى واسعه كل الزملاء يحاولون التقرب الى لكن انا هدفى المال وليس الحب لذلك كنت متانيه باختياري بمن ارتبط
بوقتها كانت الحرب العراقيه الايرانيه وفارس احلام كل بنت هو يكون ضابط بسبب ميزات الرواتب والمكرمات والقطع الاراضي والسيارات
التى تهدى لهم مما كان رغبه كل بنت ان تتزوج ضابط
زميلي جلال يحاول يتقربلى واحسه بعيونه متعلق بي ويحبنى ويريد الارتباط بي لكن انى ما اريد انتظر طالب وابقى بوظعى هذا مع انى حبيته وتعلقت بي لكن هدفى اكبر من الحب وبعدين اهله موظفين يعنى طبقه وسطى وانا طموحى اكبر من هذا المستوى نجحت للثانى وصارت العطله الصيفيه وبدو الطلاب يحجون عن كيفيه قضاء العطله والسفر وانى ساكته شاحجى عالبيت لو على غسل المواعين
بقيت ادور شغل بالعطله حصلت سكرتيرة عند دكتورة نساءيه دوام من 2 ظهرا لغايه 8 مساءا وكل المراجعات نسوان كلت اجمع كم فلس حتى اشترى ملابس بالدوام وما اكلف اهلى شي
تجيلنا حلات هوايه والدكتورة معروفه وشغلهه هواى
للحكايه بقيه
#قصه_محكمه_خاصه#
الكاتبه فردوس عبد اللطيف
جزء 2
فد يوم دخل علينه بالعياده ضابط برتبه نقيب لابس ملابس العسكريه وشكله شخصيه واله هيبته الكل ظلو يباوعون عليه والنسوان سكتن من اللغوة ابيض طويل عيونه عسليه خفت منه ظل كلبي يدك سريع
مساء الخير
اهلا استاذ تفضل
الوالده بالسيارة وصحتهه تعبانه ممكن تحجزيلهه واشكد وقت واجيبهه
اخذت اسمهه وكتله فد نص ساعه وجيبهه
كال سهله نص ساعه كون تدخل بسرعه لان تعبانه ومتكدر تنتظر
ميخالف التسهيل من الله
بس انى شنو دخت هيبه وجمال وشخصيه هيجى واحد كون نصيبي مو وين ما تعبان
ورة نص ساعه بالضبط اجه وياه امه وبنيه ياربي بس لا ز وجته
تفضلى خاله دخلى دخلتهه بسرعه
هو ابتسم وكلى شكرا
يا يمه احلى شكرا سمعتهه بحياتى بس انى وين وهو وين شجاى افكر سكتى ايمان لا تحلمين وتوكعين
ورة شويه دخل صار كبالى ظل يباوع على بتركيز ويبتسم
يمه كلبي راح يوكع معقوله
بس انى من الخجل اباوع عليه وادنك لو اسوى نفسي ملتهيه بس انى اباوع من جوة لجوة
انجذبت لقيافته وملابسه العسكريه مرتبه ونجماته صحيح انعجبت بي سويت نفسي اروح يم المختبر كلت خلى يشوف طولى يباوع على
طلعت امه من الدكتورة
انطيتهه كارت العياده بي رقم تلفون الارضي
هو باوعلى ابتسم وكلى مع السلامه الله شكد حلوة بحلكه
ابتسمت واشرت براسي مع السلامه
مر يومين وانى اتحلم بي ما راح من بالى
رن التلفون والعياده هوسه والنسوان يلغن بصوت عالى
الو
مساء الخير
اهلا مساء النور
تفضل اخى تريد حجز الاسم
على كيفج لا انى ما اريد حجز انى معجب
العفو غلطان بالرقم هنا عياده دكتورة نساءيه
وسديت التلفون انى اصلا ما توقعته يتصل وهو نفسه
رجع دك التلفون
اعرف عياده دكتورة بس انى اريد احجى وياج واعرفج
اوووو شتريد اخى ماتسمع الهوسه ومنو حضرتك
انى النقيب ابراهيم الى اجيت ويه الوالده قبل يومين
انى منا هوسه النسوان وجهالهن ومنا ما مصدكه الى جاى اسمعه بقيت فاتحه حلكى وساكته
الو الو
العفو وياك
شوكت تخلصين من العياده
ليش
حتى اجى عليج اوصلج لاهلج انى قصدى شريف بس اريد اتعرف عليج اكثر
وانى مو من النوع الى يلعب على بنات العالم
سكتت بقيت افكر كلت فرصه وجايتنى ليش اضيعه من ايدي
ها شكرا يخلص دوامى ب8
مع السلامه
مع السلامه
خلص الدوام طلعت لكيته واكف كبال العياده ولابس قاط سفارى نيلي وهو ابيض طويل ويخبل بقيت اباوع عليه وانى ارجف
فتحلى باب السيارة وصعدت من غير شعور كانى مسحورة بجماله ظل يسالنى عن دراستى ووضعى وكال انا كل شهر انزل اسبوع واريد بهالاسبوع نطلع ونتعرف على بعض اكثر
انى ساكته بس اهز براسي
احجى سولفى اشبيج
الحقيقه انعرضت على هوايه بنات بس انى ما اقتنع بسهوله وانت اول ما شفتج كلت هى هاى الى لازم اتزوجهه بس اريد اتعرف عليج اكثر
سالنى انت مرتبطه بشخص مخطوبه لاحد
ها لا انى لا مخطوبه ولا احب احد
جيد يعنى كلبج فارغ
ابتسمت وخجلت
وصلت للبيت نزلت براس الشارع حتى محد يشوفنى
كانت ذيج الليله احلى ليله بحياتى ما مصدكه نفسي معقوله احلامى تتحقق
وبصراحه ما الكه مثله عريس
يعتبر فرصه لكل وحده بس الجامعه لازم اكمل دراستى
خلى اشرط عليه بس اول مرة خلى يتعلق بي وبعدين اتشرط
بقينا تقريبا 6 شهور كل ما يجى اجازة نطلع بالاماكن العامه
صارت عطله نصف السنه كالى راح ادز اهلى يخطبوج
طرت من الفرحه الكاع ما توسعنى بس الكليه برهومى
حبيبتى كملى اشو انى ما اجى الا اسبوع وراح نعيش يم اهلى يعنى ما كو اعتراض على دوامج بالجامعه
شكرا حبيبي
اجتى امه وخطبونى واهلى وافقو وتمت الخطوبه
للحكايه بقيه
#قصه_محكمه_خاصه#
للكاتبه فردوس عبد اللطيف
جزء 3
بقينا مخطوبين كم شهر لحد العطله الصيفيه عشت بيهه احلى ايام ويه ابراهيم فلوس وصرف ودلال ولبس كل احلامى جاى تتحقق صرت بالكليه من الكشاخات والكل يباوع على من ادخل
وانى ما مصدكه نفسي بحلم ولا حقيقه بطلت من الشغل يم الدكتورة بعد ما احتاج لان ابراهيم غركنى بالفلوس وشما اطلب يتنفذ
بالعطله الصيفيه تزوجنه وسوالى احلى حفله عرس بنادى القاده وجاب حميد منصور يغنى وكانت احلى عرس كنت سعيده واتمنى سعادتى تدوم
عشتنا بيت اهله طابق الفوك غرفه نوم وحمام والاكل ويه اهله لان بس امه واخته واخو طالب بعده يدرس
علمنى سياقه واشترالى سيارة وصرت اروح للكليه بالسيارة... بعد ما كنت اتبهذل بالمصلحه
جلال اجه يباوع على نظرات غريبه مبروك عليج الزواج من الضابط انى مدرتله بال
استهزاء بي ومشى بس احسه مقهور شسويله هاى فرصه اجتنى خو ما ابقى انتظرو ياحب يابطيخ
حملت بطفل واداوم وانى حامل وبالبيت خالتى تطبخ وانى انظف واغسل مواعين ونتعاون بالشغل الامر ما يخلو من التنغيصات بس مشيتهه لحد ما اخلص الجامعه صادفت ولادتى قبل الامتحانات بشهر اخذت اجازة الولاده اسبوعين اجتنى بنوته حلوة سميتهه شهد بدت الامتحانات اخليهه يم عمتى واروح للدوام
كملت الامتحانات وعطلت وتفرغت لتربيه بنتى
ابراهيم يجى كل شهر 7 يوم ومكانه بارض المعركه يجى تعبان وينقصه النوم والراحه ماعنده خلك يطلعنى ويونسنى مثل ايام الخطوبه
يجى بس يريد ينام
وانى طبعى احب الطلعه والونسه وابقى اتعارك وياه طلعنى ونسنى
يكلى لو تشوفين الجنود بارض المعركه تبجين على حالهم وانت تفكرين بالونسه والله بطرانه
طلعت النتيجه ونجحت وصرت بالثالث اجه الدوام بنتى نشنشت شويه بس تبجى وراى من اطلع كمت اتختل وافلت لا تشوفنى وتبجى على
صحيح اداوم قليل بس احس متعتى بالدوام اخلص من روتين البيت والبس ملابسي الى باقيات بالكنتور المن واشوف صديقاتى واكظى وقت ممتع بالكليه
حملت بطفلى الثانى وبدت معاناتى ويه الحمل ودوام الكليه وبنتى ومن يجى ابراهيم هم يريد اتفرغله
والدراسه تعبت حيل ما اكدر اركز واسيطر على كل هذة الامور بوقت واحد
بس هدفى اكمل الجامعه ولازم احققه واخذ الشهاده
زوجى كان مستلم قطعه ارض بالكاظميه 600 وكال ابراهيم اشلو تردين البناء احجيلي حتى افهم المهندس
كتله اريد حديقه حلوة والبيت طابقين ودخله عالمطبخ ودخله عالصاله وجوة غرفه مكتب وحمامين وفوك حمام واحد
راح للمهندس كله اسبوع وتعال استلم الخريطه
طبعا هو اسبوع ويروح يبقى على الاجازة الثانيه
صارت ولادتى ودتنى عمتى للمشفى وخابرت زوجى واجه للمستشفى وانخبصو بي زوجه الرائدلان تكرم وترفع الى رتبه رائد
جبت ولد سميته صهيب فرحو بي عمتى وابراهيم كان يتمنى الولد واجاله ودانه للبيت ورجع للواجب كال ما اكدر ابقى لان هجوم ومعارك قويه بمنطقه قصر شيرين
الله يستر ظلت عمتى تندعى ربي يحفظه
بلشنا ببناء البيت اخذ قرض وحصل نوط شجاعه وتكريم بعد الانتصار بالمعركه والحمد لله كل ما تخلص الفلوس الى مجمعهه تجينه غيرهه
نجحت من الثالث وصرت بالرابع اخرسنه وهم حملت بالطفل الثالث لان ابراهيم يحب الاطفال
خلصت السنه بحلاوتهه ومرارتهه وتعب الاطفال ودوام الكليه بس ما عندى مشكله سيارتى جواى يمته ما يعجبنى اروح ويمته يعجبنى ارجع
فد يوم كنت راجعه من الدوام ودايخه دعمت سيارة ثانيه بس ما تاثر هو بس سيارتى تفلشت بقيت 3 ايام نايمه بالفراش بوقتهه ما حسيت بحمه الضربه لكن وراها اوجاع بكل جسمى بقيت نايمه لحد ما صرت زينه كلى ابراهيم لاتنقهرين اجيبلج سيارة غيرهه
شكرا حبيبي
للحكايه بقيه
#قصه_محكمه_خاصه#
للكاتبه فردوس عبد اللطيف
جزء 4
بعد حادثه السيارة صرت اخاف اطلع قللت طلعاتى وخصوصا انى حامل
كملت اشهر الحمل وتعسرت ولادتى سوتلى الدكتورة عمليه قيصريه وجبت بنت حلوة ابراهيم كال اسميهه شيرين بعدهه تفرغت للامتحانات النهايه وامتحنه وكانت عمتى طول الوقت تساعدنى بتربيه الاطفال ورعايتهم تخرجت وخلصت من الدراسه لكن ابراهيم ما يقبل اتعين باى وظيفه كال تفرغى لتربيه الاطفال ...صحيح تربيه الاطفال شيء ممتع لكن طبيعتى احب الحريه والاستمتاع بالحياة ولولا عمتى وتساهل ابراهيم ماكان كدرت انجب 3 اطفال وادرس لكن الحمد لله كملت وحققت اهم هدف بحياتى
بعد بقى بناء البيت لازم نكمله بلشنه نبنى وكل الى مجمعي انصرف على البناء
وترفع ابراهيم وحصل تكريم وكل تكريم بي فلوس وسيارة وترفيع بالرتبه العسكريه لحد ما خلصت الحرب الا ابراهيم وصل عميد وراها تحولنا بيتنا الجديد كملنه البناء واثثنه البيت باحلى اثاث وكل فترة اغير سيارتى على موديل السنه صرت اعيش بيت وحدى وفلوس وسيارة ولبس ومركز اجتماعى انتقل زوجى لبغداد يمنه صار دوامه بوزارة الدفاع بس على طول مشغول وما موجود وانى وحدى صحيح شنو الى اريده يتوفر بسرعه لكن اكو نقص بديت اسد النقص بالطلعه والطبه سجلت بنادى الصيد وعلى طول اخذ جهالى مابين نادى الصيد لو نادى القاده باليرموك حفلات وملاعيب اطفال....
كبرو اطفالى بنتى صار عمرها 18 سنه وصار الخطابه يخطبوها يمه ولج بعدج صغيرة تقدملهه ولد من اقارب ابوها وهى موافقه الظاهر تحبه حجيت ويه ززجى كال والله الولد زين وعاءلته زينه ليش لا ماكو مانع حتى لو زغيرة خليهه بذمه رجل
وافقنه على مهند اسمه خريج هندسه وابو هم ضابط وصارت الخطوبه وبعد لازم نتسوك للعرس
التهيت بهالفترة بتحظيرات زواج بنتى وانى اصلا احب السوق واستمتع بي اهملت حياتى مع زوجى والتهيت بغير عالم بحيث ما اعرف شوكت يجى وشوكت يطلع صارت رتبته لواء وحمايات ومركز عالى بالدوله وتم ترشيحه ليكون محافظ للحله بس بقى على توقيع القياده
عندى بنت اختى اسمهه استبرق جميله وشابه تزوجت وما توافقت ويه زوجهه وتطلقت
على طول تجى يمى بالبيت تساعدنى بالشغل واعتمد عليهه بكلشي لانهه شاطره ومرتبه وانى ملتهيه بونستى وخليت حمل البيت عليهه
ما فكرت هذا الشي غلط المراءة مكانهه بيتهه وزوجهه اذا هملتهم راح تخسرهم وجود استبرق بالبيت وتحملهه المسوؤليه لكل مفاصل حياتنه خلت زوجى ينعجب بيهه
فد يوم كنت طالعه عوزت فلوس رجعت للبيت حتى اخذ فلوس لكيت ابراهيم ويه استبرق بغرفه نومة وبوضع غير لاءق
انصدمت تفاجءت غرورى وطبعى ما خلانى ابجى ولا شي بس عيطت عليهم وطردتهه من بيتى وزوجى بده يطلع الى بكلبه
مو كافى تحملت تصرفاتج صار سنين وانى ساكت انى رجل واحتاج الى زوجه مو انسانه متسلطه ما تفكر غير بونستهه واشلون تطلع ووين تكظى اليوم ما فكرتى فد يوم بي بمتطلباتى احتياجاتى كرجل بس تفكرين بنفسج قصرت وياج
اشو صاعده سيارة سلبرتى وابنج الى عمرة 16 سنه سيارة اولدز وفلوس تلعبين بيهم لعب شتردين بعد عوفينى انى بعد راح افكر اتزوج لو ما امركزى الاجتماعى كان تزوجت من زمان بس غير وظعى ما يسمحلى
انى ما مقصرة
اى اشلون بلى جايبه بنت اختج تقوم بمهام البيت مو
انت كلج تقصير ولا تلومينى لان الى صار بسببج انت وانى بشر
وبعد ممنوع تطلعين من باب البيت والسيارة راح اخذهه وتبقين خدامه بالبيت يالى ذيج الساع تعرفين قيمه النعمه الى انت بيهه
بقيت صافنه كل هالسنين ضام هالحجى بكلبك وانى عبالى متقبل الوضع انى الك الا انتقم لكرامتى عباله افوتهه اله
غرورى واعتزازى بنفسي خلانى افكر اشلون اخلى يندم عالى كاله والى سوا بي
للحكايه بقيه
#قصه_محكمه_خاصه#
للكاتبه فردوس عبد اللطيف
الجزء 5
بقيت ما احجى وياه بس اباوع عليه وعلى تصرفاته اشوفه مداير بال الظاهر اكو شي ما اعرفه
اتصلت باختى وكتلهه هاى جزاتى بنتج الحقيرة الى جانت خدامه عندى هيج تسوى لعد الغريبه اشلون بنتج ساقطه ومو شريفه
جاوبتنى اولا سمعى منى وبعدين احجى
انى ماجنت اعرف الى بينهم وهما متزوجين عقد سيد انت تعرفين زوجج متدين وميمشي بالحرام بس كلنه ما كنا نعرف زواج بالسر والسبب انتى اهملتى بيتج وزوجج الكشخه والمكياج للشارع من تطلعين اخر كشخه وبالبيت مبهذله ومن يجى ما تهتمين بي واكثر من مرة حذرتج انى وماما حذرناج لكن انت استهزءتى بكلامنه وكلتى يحبنى ويموت على ...حتى لو يحبج هو محتاج وحده تحبه وتخفف عنه عبء العمل زوجج مسوؤل بالدوله كبير منصبه عالى والناس حاسدتج على هالنعمه
هاى انت اختى وهيجى تحجين ماخليتى شي بكلبج
يعنى متزوجهه
اى وانى تعاركت وياها وطلعت من البيت بعد ما راوتنى عقد الزواج واتصل بي هو وكال اجرتلهه شقه ويروح يمهه على طول ومن يصير محافظ راح يعلن زواجه وياخذه ويا
هيج السالفه خوش لع
بالعافيه عليكم وعليه
بس انى نار وكبت بجسمى
بديت احرض جهالى عليه
ولكم ابوكم حايعلن زواجه ويطردكم وبقيت ازن براسهم ابنى صهيب مراهق تاثر هوايه بكلامى خليته يحقد على ابو صار من يجى للبيت ميحجون وياه حتى شيرين تختل بغرفتهه ومن يصيحهه دكله اريد انام
هجرنى وينام بغرفه المكتب خلاله سرير وهو على طول ما موجود قليل يجى بس حرمنى من كلشي ممنوع اطلع والمسواك يجينى للبيت وبعد ما عندى حجه للطلعه
طكت روحى
كتله صهيب انت رجال البيت ولازم تخلصنه من ابوك
يعنى شسوى
قتله
صدك تحجين
اى صدك لعد كذب
من يجى اخذ المسدس مالته وقتله بي
بس لازم اتدرب عليه
ميخالف اخذ المسدس الثانى واتدرب بالحديقه حتى من تضربه ما تخطىء ضربتك
بدء صهيب يتدرب بالحديقه ويخلى هدف امامه قواطى او اى شي لحد ما تقوت ايده
وهو احسه مرتاح وسعيد ويه المفعوصه الخدامه والله دنيا يريد يساويهه براسي
فد يوم اجه خلى سلاحه بالغرفه ودخل يسبح
صحت صهيب يالى وكتك
راح اخذ المسدس ودخل عليه بالحمام ورماه اول طلقه بعينه صاح لا بابا ليش لا بابا ثانى طلقه بكصته ثالث طلقه وكع والدم انتشر بالحمام
سحبنا انى وصهيب وصحت على شيرين كتلهه غسلي الحمام نظفى من الدم عمرها 6 سنوات راحت تنظف الدم
وانى وصهيب سحلنا للحديقه حفرنه حفرة وخلينا بيهه وذبينا عليه بنزين وحركنا الجثه
جيرانه دكو الباب هاى ريحه حرك عدكم لحم يحترك كلنالهم لا هذة القطه مالت بنتى ماتت وحركناها حتى لاتجيف
بس اعتقد ما صدكو
كمل الحرق وراه سدينه الحفرة وغطينا بالتراب
ورجعنا للبيت جيكت الحمام ما بقى اثر اطمنت
دخلنه للبيت وسحت وصهيب هم سبح وشيرين هم كتلهه سبحى لا يبقى اثر بيكم ورجعت طبخت وكان شيءا لم يكن
بس تلفونات يتصلون بي من القياده كتلهم ما اعرف ما اجه
سويت نفسي ظال بالى وقلقه ورحت لامه كتلهه ماكو ما اجه
والظاهر بنت اختى تعرف جاى علينه
ظلو تحقيق ورايحين جايين
انى اخذت راحتى وصرت اطلع واطب لاحسيب ولا رقيب
بنتى شهد من تجيلنه تسال
عرفت بالموضوع من شيرين
ظلت ساكته وماتحجى
رجعت لبيتهه وهى كانت حامل
هناك ما تحملت انهارت اعصابهه ظلت تصرخ وتهذى
بالبدايه سكتت لكن وراها ما تحملت
اخذهه زوجهه وبلغ علينه
اجوى تحقيق سالو الجوارين حجولهم على الحرق وريحه اللحم راسا راحو للحديقه وكتشفو الجثه
القو القبض علينه كلنه
الى اجرو التحقيق لجنه خاصه لان وظعه حساس وبالدوله
وصار التحقيق وبقينا بالتوقيف لحد يوم المحكمه
طبعا المحكمه كانت خاصه بيهه لجنه من الدوله
بنتى شهد ولدت بنت بالسجن
قدمونه للمحكمه
عمتى ام ابراهيم طلبت هى تتكلم بدل المحامى
ووجهت الكلام واللوم على على ابو انو كان مدللج وسياره الج وسيارة لابنج اخر موديل وفلوس وبيت ملك وهاى جزاته ليش كتلتى جان طلبتى طلاق ارجو من سيادتك اعدامهه لانهه ما تستحق الحياة سلبت حياة ابنى
كتلهه انى شعلى ابنه قتله
كالت انت حرضتى وابنج طفل مراهق انت السبب
صدر قرار باعدام ايمان باسرع وقت
تم الافراج عن شهد
الحبس 15 سنه لصهيب بسجن الاحداث لانه دون السن القانونى
الحبس 6 سنوات لشيرين فى سجن الاحداث
تم اعدام ايمان خلال 45 يوم بعد المحكمه وهاى اول مرة يستعجلون بالاعدام
اانتهت
ترقبونى بقصه جديده
فردوس عبد اللطيف
