وحده تگول ...قبل عرسي باسبوع ... صار معي موقف غيرلي كل حياتي وخلاني الغي العرس واتراجع ....
بيومها تمرضت بيبيتي ، ورحنه على المستشفى .. أول ما وصلت لگيت جدي گاعد يم باب غرفة العناية المركزة ويبچي.. گعدت يمه ولأول مرة بحياتي أشوف جدي هيچ يبچي ... گلتله: تبچي جدي ! مسح دمعته وگلي: بيبيتك. كلش تعبانة .... باوعت عليه وگلتله: أن شاء الله راح تطلع بالسلامة بس ادعيلها ... گلي: هي قطعة من جوه الگلب .... أنا طبعا استغربت يعني جدي بالعادة شخص صارم كلش ومن جيل أيام زمان اللي چنت مفكرة ما عندهم رومانسية وحب مثلنا حبيت أغير الجو وأخليه يحچي
گلتله: جدي أنت چنت تعرف بنات غير بيبيتي ... ضحك وگلي: أوووو ألف بنيه شويه وكلهم چانوا يحبوني چيف آنه حلوو وغنيي آنه هنا ضحكت وگلتله: يعني بيبيتي مو حلوة !
عدل گعدته وگلي: بيبيتك روحها حلوة، عيونها قصة، تدرين يوم چنت رايدها شفتها وهي طالعه من البستان، وكاضه خواتها بايدها وگصتها عرگانه وتباوع علي وتبتسم ! ابتسامتها خلتني أحبها ...
گلتله: جدي اسألك سؤال ... چم مرة اتعاركت انت وياها ؟! وشلون لحد اليوم انتم واحد يحب الثاني
گلي: أووووو ياما تعاركنا .... بس ولا مرة قللنا من الاحترام البيناتنه ....
هنا تذكرت خطيبي اللي عالرايحه والجاية أيقلل احترامي ويعايرني بكل شي ... وبشكلي اللي مو عاجبه ويريدني اضعف ١٠ كيلو !
بهالوقت اجه الدكتور .. جدي گام وگال: طمني دكتور شنو طلع عدها؟ گله: الحمدلله ، هسه هي بخير گله_نگدر ندخل نشوفهاا؟ *طبعا بس لا تطول...
دخلت ويه جدي عند بيبيتي وجدي چان مثل الولد الزغير اللي متلهف لشوفة امه ... والأحلى من هذا چانت نظرات بيبيتي إله اصدق من هيچ نظرة حب بحياتي ما شفت مسك ايدها وگلها: هيچ يا قطعة من الگلب تتمرضين وتركيني لاول مرة الوحدي ! ضحكت بيبيتي وگالتله: مو أنت تركتني گبل يوم عمليتك !گلها: يعني هيچ اخذتي بثارچ ... عصرت على أيده وگالتله: لا ما راح اتركك ابد ....
طول هالوقت وأنا مستغربة شلون علاقة عمرها تقريبا 45 سنة وليهسه بهالقوة والحب هذا ! برغم كل الظروف الصعبة اللي مروا بيها ....
بهالوقت اتصل خطيبي، كان معصب لاني ما جاي أرد عليه من الصبح ، واول ما فتحت الخط گلي شنو وينچ يا غبية ! بالعادة آنه چنت أمشيها أله لان حبيبي قبل لا يكون خطيبي بس تذكرت جدي لمن گلي الاحترام اهم شي ،وشلون گلي ان علاقتهم استمرت بسبب هالشي ....
گلت لخطيبي: لا تغلط علي ... رد علي: شنووو ؟؟ من يمته عندچ كرامة!
بس گال هالكلمة عصبت عليه حيل وسديت الخط ... طبعا خلال ١٠ دقايق چان داز ١٠٠ رسالة وكلهم غلط وسب وعلى شنو شايفة نفسچ ومن هالحچي هذا! !!! وبهالوقت چنت صافنة بجدي اللي ماسك ايد بيبيتي وهي نايمة ويمسح ع راسها وبيبوس ايدهاا ... طلعت من عدهم والدموع بعيوني .. بعدما احتاريت وبلشت أفكر شنو هو الحب !! هو صدگ كلمة احبك اللي يگولها الي خطيبي بالروحه والجيه ، بس تصرفاته نهائياً ما تدل على هالشي لو الحب نظرة جدي لبيبيتي ! خوفه عليها حبه الها ... وشلون هالعمر گضوه سوه باحترام !
اليوم وآنه گاعدة مع زوجي ، اجت بنتي تگلي: ماما أحبك ! گلتلها شكو ؟ گالتلي: بابا دايما يحچيلي ويگول هو يحبك و انتي تحبيه !
عرفت شنو يعني الحب والاحترام ... شنو يعني تتزوجي اللي تريدين تگضين بقية عمرچ وياه ... اللي تريدي اولادك يكون ابوهن قدوة بكل تصرفاته ! اللي ما راح تخافي من ابوهم يجرحك او يقلل احترامك گدامهم...
معنى_الحب❤
الاحترام اساس كل شيء.
الصراحه حيل عجبتني ..♥ يعني بوقتنه هذا نفتقر لهيج اشخاص بين كل ثنين ماكو اي احترام او حب صادق من اول مشكله تصير بيناتهم يبدي الغغلط من الجهتين وماكو اي ثقه او تفاهم بيناتهم .. همه يگولون نحب بعض بس الواقع عكس عدهم الحب كلام وبس
