بسم الله
#معاناة_يتيمه_1
قصه واقعيه 🔥معاناة يتيمه🔥
.
.
.
.
جوري : 😭😭
خوله : خشت للدار لقيت جوري تبكي هي انتي امك ماتت و شبعت موت نوضي اغسلي وجهك و طيبي الغذي بلا دلع زايد 😤
جوري : حرام عليك كل يوم اني نوض نغسل و نطيب من اول ما ماتت ماما واني علي هالحاله 💔😣
خوله : شن تحسابي روحك اني نوض نغسل و نطيب وانتي راقده 🤨 نوضي خير منحرش فيك خوك وانتي عارفتيه 😏
جوري : بقلة صبر ناضت حاااضر
نعرفكم علي جوري
جوري مواليد 1999 طبعا يتيمة الاب والام .. امي توفت ليها 6 شهور وبوي من زمان متوفي من اني و صغيره طبعا خوله تكون مرت خوي الوحيد طبعا من اول ما تزوج خوله انقلب رأسا علي عقب و من بعد وفاة امي زاد عليا حتي القراية بطلني منها و بديت نخدم فيه هو و مرته و صغاره
طبعا ما عنديش خوات عندي اخ واحد اسمه (علي) و زوجته خوله اللي هيا بنت عمي خذاها غصب حتي علي امي يعاملو فيا كأني خدامه و كل مره تحرش فيا خوي و يضربني
طبعا احني من الغرب بس بسبب مشاكل صارت للعيله انتقلنا للشرق ان شاء الله رح تعرفو القصه في باقي الروايه
_________________________
للكاتبة ❤
🔥 بقايا الحنين 🔥
.
.
.
.
بيسان : نعم بابا
أحمد (اب بيسان): هيا طولتي مش بتمشي لصاحبتك
بيسان: نلبس وشاحي بس .......هي سلامات
سالمه (أم بيسان ) : سلميلي علي عايشه
بيسان : حاضر ...باست امها وطلعت ❤
نعرفكم علي بيسان
بيسان مواليد 1997 وحيدة امها وبوها . تقرأ هندسه بنت شاطره و ذكيه . طبعا احني نسكنو في الغرب ... وبدون ذكر مناااطق😅🧡
________________________
جوري: نطيب في الغذي واني مقهوره💔ليش اني من دون البنات يصير معاي هكي معقولة هكي ننذل ونعيش مع خوي ومرته حتي قرايه ما نقرا 💔
خوله : هي انتي ينهارك الاحرش كان نلقي الغذي مالح زي العادة
جوري : كان مش عاجبك تعالي طيبي وريحيني😞
خوله : نعم نعم ...... مسكتها من شعرها وتهزب فيها ..... والله مزال نسمع الكلام هذا نحرش فيك خوك وانت عارفتيه .... غير امتي يجي بس 😏 .... وطلعت..
جوري : 😭😭حرام عليكم اني يتيمه و تعاملو فيا هكي 💔.......
________________________
امل : اهلا اهلا انستيناا❤
بيسان: الله يآنسك ❤
امل : تفضلي تفضلي شرفتينا
بيسان: كيف حالك خالتي عايشه
عايشه(أم أمل) : الحمد لله.. كيف حال امك
بيسان :الحمد لله كويسه ... تسلم عليك❤
عايشه : الله يسلمك ❤
بيسان: خشيت و قعمزت
أمل : كيف حال حمزة 😉
بيسان : هني روحك قتلك صديقي مش أكثر من هكي و فكيني من حركاتك البايخه🙂
أمل : طول النهار مكالمات وفي الاخير تقوليلي صديقي
بيسان: علي راحتك متصدقيش😒
_________________________
خوله : حبيبي جوري تقلل في أدبها معاي و نقوللها علي الاقل تعالي ساعديني في الضم وطيبي معاي تقولي مدخلنيش فيك😐
علي : 😠😠 تو نشوفها قليلة الأدب.... وطلع
علي : جوري يااااااجوري😠😠😠
جوري : سمعت صوته ينادي فيا عرفته خوله نفس كل مره تقلب في الكلام و تخبر فيه ... 😩نعم
علي : جبدها و بدا فيها ضرب و ضرب لعند ارتخت من بين يديه
جوري : مسحت وجهي لقيت خشمي ينزف دم نضت بقلة حيله نمسح الدم
علي : حس بتأنيب الضمير اتجاه اخته لانه قبل لما يضرب فيها تقعد تسب فيه وتتحسب فيه عند ربي بس المره هذي ناضت بدون و لا كلمه ولا قاوماته لما ضربهاا💔
جوري : نمسح في الدم و نبكي معقول هذا خوي اللي من بوي و امي معقول المراء تقدر تغير الراجل علي خواته لهدرجه يحبها و يسمع في كلامها 💔💔ااااه من بعد غيبتك يا أمي 💔💔
خوله : جوي يا هم تعالي غيري لحمودي
جوري : حاضر 💔......مسحت الدم و طلعت
______________________
خوله : بالله زوجها وريحنا منها خير متجيبلك العار و تبقي طول عمرك نادم
علي : لكن صغيره علي الزواج
خوله : اي صغيره وهيا مشاء الله تعرف اطيب ز حتي الجمااال مشاء الله زوجها خايفه ديرلك فضيحه ياراجل
علي : ان شاء الله خير وتغطي ورقد
خوله: نبي نتريح منها و من نكدها😏
_______________________
بيسان : بابا قاعد برا
امل : مزال الوقت خيرك ☹
بيسان: بيجونا خوالي اليوم نبي نروح نجهز مع ماما
امل : عاوديها مرة ثانيه بالله
بيسان : ان شاء الله حبيبتي❤
بيسان روحت بدلت و شديت النقال كلمت حمزة
بيسان: هلا وينك اليوم مسمعناش حسك
حمزة : شدت في طرف لنم😂
بيسان: 😂😂مش ناوي تبطل صياعه
حمزة : الحمد الله انتي من الغرب واني من الشرق كنهذا متخليش فيا نطلع
بيسان: بس متنكرش انه اصلك غرباوي
حمزة : 😂😂مش ناكر بس متقدريش توصلي فياا❤😂
بيسان : حصلت رقمها؟
حمزة : حتي جواز سفرها مش رقمها بس❤😂
بيسان: 😂😂الله عليك
حمزة : بنعرفك علي صاحبي
بيسان: فكنا ياراجل معنديش خلووق لحد
حمزة : والله حيعجبك غير شوفيه قبل
بيسان: بعدين ساهل من ساعد ماما في الليل نتفاهمو
حمزة: تم❤
________________________
الساعه 12 ونص في الليل
.
.
.
.
علي : اليوم صاحبي الدكتور صهيب يدور في بنت بيخطبها قتله عندي اخت صغيره قالي نشوف العيله ونرد عليك
خولة : الدكتور صهيب😨دكتووور الجراحه!!!!!!
علي : ايه .... علاااش
خوله : معقوله تجوز جوري لدكتور صهيب بالك تحشمك معاه
علي : مافهمتكش مره تقولي جوزها ومره تقوليلي لا ..... شن الحللل
خولة : جوزها بس مش للدكتور هذا .... عندي رأي نعطوه ل ابتهال اختي مشاء الله عليها احلي من جوري
علي : اني قتله من جوزك اختي
خوله : وشن الفرق يعني في النهاية بنت عمك هياااا
علي : يصير خير
خولة : فرحت في داخلها .... مش جوري تاخذ دكتور وتقعد تلعب بالفلوس لعب كان ما جوزتها شيباني ما يسمي اسمي خوله و ناضت سكرت الضي ورقدت و هيا فرحانه انه وحده من خواتها بتتزوج دكتوور☺
نعرفكم علي عيلة خوله
بوها متوفي ... عندها اخ واحد (ابراهيم) و ثلاثه خووات (ابتهال . مسره . حميده) وامهم ...... كانت عيله كل غرضها الفلوس والمظاهر عيله مليانه حقد وحسد متحبش الخير للناس 💔
________________________
للكاتبة❤
🔥بقايا الحنين 🔥
.
.
.
.
حمزة: نعرفك عليه بعدين احكمي
بيسان: ماخاطريش نتعرف علي حد قتلك
حمزة : هههههه خيرك حكمتي عليه قبل ما تشوفيه
بيسان : به عرفني عليه🙂
حمزة : رح نديرو قروب احني الثلاثه بعدها اذا انسجمتوو عدو خاص
بيسان: اوكي
نعرفكم علي حمزة
صديق بيسان تعرفت عليه من الانترنت هو غرباوي بس يسكن في الشرق مواليد 1992 انسان محبوب وصايع 😂❤
نضال : السلام عليكم
بيسان: وعليكم السلام
حمزة: الله علي اصحابي المؤدبين😂
نضال : 😒😒
................يتبع
حبيباتي ❤
هذي الروايه كمقدمه و تعريف للشخصيات اللي معانا في الروايه❤
مش رح نوعدكم انه كل يوم حلقه كيف الروايه الاولي بسبب ضروفي
وروني تفاعلكم كيف قبل عارفتكم مش رح تقصروا
اذا التفاعل ضعيف رح نوقف نشر💔💔
نحبكم😘😘
