بقلم : دنيا زاد
احمد بعد كم يوم من الاجتماع الفات اجتمع بيهم تاني والمرة دي لميس وآدم كانو معاهم لانهم رجعو من شهر العسل احمد بدا يتكلم معاهم
احمد:اول حاجة حمدالله على السلامه لي العروسين الما كانو دايرين يرجعو
لميس حمرت ليهو :هوووي يا احمد اييي ما كنا دايرين نرجع عوضنا التلاتة السنة الكنا متافرقين فيها بي سببك
احمد:بسببي انا؟انا عملت شنو راجلك براو اجل العرس انا قلت ليهو يقرا المجالات الحنقراها في اثيوبيا عشان يستفيد اكتر لكن ما ادخلتا في عرسكم
لميس:انت رسلتو هو هناك بعد ما انا سجلت في المعهد لو كان كلمتنا من البداية كان سافرتا معاهو
احمد:انا ما عندي دخل دا راجلك الاجل العرس
لميس كعوجت لي خشمها كدا وسكتت والبنات ضحكو فيها
احمد:المهم انا الليلة اجتمعت معاكم عشان نبدا نخطط لاول خطوة اتفقنا عليها الاجتماع الفات
هدى:انت ما قلت بعد عقدنا
احمد:لا الموضوع دا اصلا حاطبقو انا براي بس داير استشيركم فيهو لكن انتو ما حتعملو فيهو حاجة
هدى:اهااا طيب اتفضل
احمد: الموضوع الحاقولو هو موضوع اعدام ناس الحمومة وايي زول شارك في قمع المتظاهرين
لميس:قصدك الكيزان وناس ال(ق.أ.ج)
احمد:الكيزان بس وناسهم اما ناس ال(ق.أ.ج)ديل بنهتم بيهم بعدين
هديل:لكن ديل خطيرين يا احمد اكعب من الكيزان وعندهم سلاح يعني ينخاف منهم
احمد:انا عارف انهم كتار ومسلحين وخطيرين واي حاجة لكن لازم عشان اتخلص من اي تهديد امني في البلد دي اول شي اقطع راس الحية الي هم الكيزان لانو الكيزان هم البوروهم يعملو شنو نتخلص من الكيزان اول ديك ببقو ما عارفين يسو شنو لكن لو نفذنا القصاص عليهم اول الكيزان حيحاولو يستغلو الحاجة دي باي طريقة
منى:كيف يستغلوها
احمد:اتخيلي انا قتلت اي زول قتل متظاهر وطبقت القصاص عليهم الباقين الما قتلتهم حيخافو وانا اكيد ما حاصفيهم كلهم ساي فحيقومو الكيزان يستغلو الحتة دي و يقولو ليهم انو نحنا حنقتلهم كلهم فاحسن حاجة انهم ينقلبو عسكرياً علينا واتخيلي كمية الفوضى الحتحصل في البلد ،انا لو داير اتعامل مع ايي زول عندو علاقة بالكيزان ابعدهم هم اول عشان هم خبيثين شديد وممكن يعملو ايي حاجة عشان يرجعو للحكم
منى:اييي صاح طيب انت حتعمل شنو
احمد:اول حاجة حاشوف اسامي كل الناس الشاركو في القمع وقتلو المتظاهرين ،هم الحاجة دي عندهم سهلة انهم يطلعوهم لي وبعديها حاشيل منهم اسامي ناس ال(ق.أ.ج) القتلو برضو والاغتصبو البنات ومن غير ما يوروهم انهم حيشيلو اساميهم وبعدين ابدا انفذ القصاص،،اها انتو رايكم شنو
ايمن:فكرة كويسة شديد لكن انت ضامن انهم حيكونو واثقين فيك
احمد:اييي هم حالياً واثقين فيني
ايمن:اييي لكن برضو لازم تعمل حسابك لانو الناس ديل خطيرين فحاول انتبه ما يشكو
احمد: إنشاء الله طيب خلاص انا حابدا انفذ وانتو خليكم مركزين مع خطوبة عبدالله وهدى وبعد ازبط الموضوع دا بنرجع نجتمع تاني نواصل تخطيط لي باقي المواضيع الاخترناها
كلهم قالو ليهو تمام وطلعو من المكتب رجعو لي بيوتهم واحمد بدا ينفذ في فكرتو بعد رجع البيت طوالي ضرب لي داوود وقال ليهو انو لازم يلاقيهو في مطعم وانو الموضوع دا مهم وداوود طوالي وافق وجو المطعم ،اتغدو وشربو عصير و بعد داك بدا احمد يتكلم مع داوود يستدرج فيهو
احمد:انت يا داوود عارف ناس الحكم المدني ديل مفكرين في شنو
داوود: مفكرين في شنو
احمد:دايرين يحققو في قضايا الناس الماتت في المظاهرات ويحاكمو الناس القتلتهم و الكيزان الكبار المعتقلين
داوود اتخلع وقلع عيونو وخاف شديد بعدين سال احمد وهو بتمتم:وحنعمممل شنو
احمد:لازم ننقذهم قبل ما يعتقلوهم ديل ناسنا
داوود:ناسنا شنو تنقذهم عشان ما يفضحونا ويفضحو سرقاتنا
احمد كان داير يديهو كف في اللحظة ديك بس مسك نفسو:المهم انا هسي فكرت في خطة اطلعهم من المصيبة
داوود:والخطة شنو
احمد:انا ما بقدر اوريك ليها هسي عشان حالف قسم ما اجيب سيرتها حالياً لكن بعد انفذها بوريك
داوود:طيب
احمد:وانا داير منك انت خدمة عشان اقدر انفذ الخطة دي
داوود:اها دايرني اعمل شنو
احمد:دايرك تجيب لي اسامي كل الناس القتلو في المظاهرات سواء كيزان او ناس ال(ق.ا.ج) وكل الدلائل على انهم هم القتلو عشان اتخلص منها من غير ما الناس تحس بي، بس اسمع هنا اعمل حسابك ناس ال(ق.ا.ج)ما يعرفو انك شايل معلومات عنهم فتش من غير ما يعرفوك
داوود:لييي
احمد: عشان هم يمكن ما يثقو فيني وما معروف ردة فعلهم حتكون كيف لو كشفوك ممكن يخربو لينا ايي حاجة
داوود: خلاص تمام اديني بس اسبوع ازبط ليك الموضوع دا
احمد:تمام انا معتمد عليك
داوود: خلاص تمام يلا مع السلامه
احمد ودعو وطلع من المطعم على مكتبو عشان يكمل خطتو
اما باقي الشلة فالاولاد انشغلو مع عبدالله في تجهيزات عرسو لانو بعد كم شهر من الخطوبة اما البنات فبجهزو للخطوبة واتلمو في بيت دلال عشان يتفقو على التجهيزات
لميس:يا دلال ياخ لمي ولدك دا قطع لي شعري
دلال: مصطفى امشي العب مع الشفع
اريج:ياخ خليهو هنا بدق لينا اولادنا
دلال: يعني انا ولدي متوحش
لميس:متوحش بس دا شيطان عديل فتح لي شنطتي شال القروش الفيها كلها
منى:هههههه احلى حاجة انو قال داير يعرس بيها سما بتي
البنات قعدو يضحكو في ولد دلال
ريان قبلت على هدى:احساسك شنو وخطوبتك قربت
هدى:خايفة والله يا ريان
لميس:هو عبدالله جاكم البيت متين ما حكيتي لينا
هدى:شفتي جانا تاني يوم الصباح لي خطوبتكم انتي وريان
لميس:صحي!! غيتو يحليلنا انا و انتي احمد طير لينا رجالنا الاتنين انا طيرو يقرا اقتصاد وانتي قال ليهو يقرا علوم شريعة
هدى:اييي والمشكلة هو قال لي بمشي وبرجع نعرس طوالي ما كان متخيل انو حيقعد تلاتة سنة كان متخيل انو اكتر شي يقعد سبعة شهور وفي المسافة دي انا اتجهز للعرس بتذكر لي هسي لمن جانا في البيت يخطب وانا من الخلعة بقيت ببكي واخواتي ما عارفني ببكي مالي بقو مهجومين وامي شغالة لي مالك ما دايراو قامت قالت لي خلاص بمشي برد ليهم وأقول ليهم مخطوبة ما تبكي وانا اتخلعت ونطيت مسكتها لمن لقيتها ماشة على ناس ابوي في الديوان وقلتا ليها لالا دايراهو دايراهو واخواتي قعدو يضحكو فيني
دلال:ههههههه غيتو احسن من ريان الفضحتنا
ريان:اعمل ليك شنو انا لمن عرفت انو احمد داير يخطب ما ختيت انو دي انا العايز يخطبها ولمن جانا البيت وجاني عمر فوق قال لي انو زميلك احمد مع ابوي جاي هو وابوهو عشان يخطبك
انا من الخلعة نسيت نفسي ونسيت عمر الواقف قدامي ونسيت انهم تحت وبقيت اصرخ احمد خطبنييي احمد خطبنيييي الا عمر نطا مسكني وقفل خشمي وبقا بكورك فيني
احمد بعد عرسنا وحكيت ليو كدا قعد يضحك وقال لي سمعتك انا وابوي وعملنا رايحين بس ابوك كان بتكلم بالتلفون وما سمعك وبقا بترييق على لي الان بالحاجة دي
لميس:انتي كنتي منفسنة اخر السنة عشان كدا
ريان:اييي والله حاجة مؤلمة انك تحبي زول وما يكون بحبك ولا شغال بيك
هديل لمن سمعت جملة ريان حزت في نفسها لانها حاسة نفسها مكسرة في ايمن وهو ولا جايب خبرها
المهم البنات كملو كلامهم عن الخطوبة وكملو تجهيزاتهم وبقو منتظرين اليوم المرتقب بس
و بعد اسبوع جا يوم العقد والبنات كلهم جو نظمو البيت كويس ورتبوهو مع ام هدى واخواتها ومشو اتقفلو معاها في اوضة عشان يمكيجوها واولادهم خلوهم مع دلال في اوضة تانية
دلال قعدت ولدها مصطفى وحسن ولد منى في كرسي وادتهم تلفون منى يلعبو بيهو (ما بتفرط في تلفونها)وقعدت البنات التومات بنات اريج وعمر نور ولجين ومعاهم بت ريان واحمد ورد وبت منى سما كلهم في كنبة وادتهم تلفون ريان يلعبو بيهو وقعدت جنبهم تشتغل بي تلفونها وتصلح في مكياجها
اما باقي البنات فخلصو مكياج هدى وصلحو مكياجهم هم ولبسو واتجهزو هم واخواتها واتاكدو من انو اي حاجة تمام بعدين طلعو برا ينتظرو عبدالله واهلو
بقو منتظرين كدا ربع ساعة وبعدين اهل عبدالله وصلو البنات طوالي مشو استقبلوهم و ضيفوهم وقعدو يتونسو معاهم اهل عبدالله كانو ناس طيبين لي درجة وما مدينين بس لكن تحس وشهم دا منور من الايمان الفيهم النوع البحببك في الدين بالجد المهم هم اتوننسو معاهم وطبعاً اهلو حبو هدى شديد وشكروها هي واهلها وبقو بتعرفو عليهم نفر نفر لحدي ما سمعو صوت الطلقة برا واصوات الرجال بكبرو عرفو انو عقدو خلاص فبقو بصفقو وبزغردو واتلنت في هدى وبقو بباركو ليها
والحريم الكبار نادو عبدالله عشان يلبسا الدبلة و عبدالله جا و قعد جنبها ولبسو بعض الدبل والبنات صفقو ليهم وزغردو وقعدو يصورو فيهم ويتصورو معاهم وبقو بغنو لي هدى اغاني السيرة واي وحدة من البنات استرجعت يوم عقدها .
عبدالله بعد خلصو تصوير قام وودع اهل هدى وودع هدى وطلع هو واهلو رجعو البيت والبنات بعد ساعدو خالتو ام هدى في النضافة والمضايرة طلعو يرجعو بيوتهم برضو ما عدا لميس الاصرت تبيت مع صحبتها زي ما هي باتت معاها يوم عرسها
نرجع ليي أحمد بعد داوود ودا ليهو بيانات وسجلات كل الناس الكانو شاركو في قمع المتظاهرين ودلائل ادانتهم كلها احمد مسك داؤود ودخلو في اوضة وقال ليهو كان فتحت خشمك بي حاجة حتلقى نفسك ميت زيك زيهم ومن الليلة لا تضرب لي ولا بعرفك
داوود اتخلع وبقا بحنس فيهو ويقول ليهو حيقتلوني حيقولو انا الفتنت ليهم
احمد:اتحمل مسؤولية الحاجة الدخلت نفسك فيها ودا انتقام مني عشان تاني تعرف تستغلني وتغشني كيف
وطردو برا وبعدين شال الملفات دي كلها وبدا شغلو مع باقي مجلس الوزراء المدني وبدا ينفذ في اخر جزو من خطتو
مشا لي رئيس ال(ق.أ.ج)وفهمهم انو الكيزان وبما انهم حزب منحل فحيتحاسبو على عمايلهم وانو هم ما المفروض يدخلو لانهم يمثلو امن الدولة حالياً فالمفروض يتابعو اوامر الدولة الجديدة وما بيحصل ليهم حاجة او يدافعو عن الكيزان وفي الحالة دي حيضطرو يواجهو قوات الجيش وتبقى حرب أهلية
وطبعا هم جبنا حدهم المواطنين العزل بس فوافقو طوالي وباعو الكيزان في ثانيه
احمد لمن سالوهو باقي ناس مجلس الوزراء هل حتحاكم المسؤولين المعتقلين كان جوابو كالاتي
احمد:هل هم كانو بحاكمو الناس المنقلبين عليهم ؟لا كانو بقتلوهم طوالي على اساس انو الخروج على الحاكم حرام وانا بعاملهم بي سياستهم وقوانينهم انتو اهتمو لي بي محاكمة ناس الامن القتلو المتظاهرين واغتصبوهم وانجزو لي باسرع وقت اما المسؤولين الكبار ديل فما في حاجة اسمها محكمة من بكرا تضبحوهم في القيادة قدام الناس كلو يوم اعدمو 10في خلال شهر داير الناس ديل ينتهو من العالم دا عشان يبقو عظة وعبرة لاي واحد داير يمسك الحكم في السودان بي نية فساد وظلم ولازم وزارة التربية والتعليم تغير مقرر التاريخ برضو في ظرف الشهور الجاية وتدون عمليات الاعدام دي عشان نفهم اولادنا انو الظلم بلف وبرجع على سيدو
مجلس الوزراء اتخلعو في الاول لكن اتقبلو القرار دا وطوالي بدو التنفيذ وبدو يحاكمو في الناس القتلت المتظاهرين ويعدموهم واي واحد يحاكموهو على قدر عملتو اما السياسين الكبار فكانو عبارة عن اضحية يومية كلو يوم ضابحين فيهم10نفر في القيادة قدام الناس عسى ولعل يكونو رجعو شوية من حق الناس الهم ظلموهم ويخاف الناس اللسا طامعين في السلطة ودايرين يكابرو عشان يصلو ليها
و مع انو الودانيين بطبعهم ما دمويين لكن الاعدامات دي حضروها كميات وكبرو وهللو فيها بي حماس وانفعال
و بعد تلاتة شهور ونص تقريباً انتهت سلسلة الاعدامات و كلو صاحب حق اخذ حقو ، والكيزان المعزبين البلد دي بقو ذكريات واسامي بس واي زول كان بفتخر انو كان معاهم زمان بقا بنكر هسي والناس حقيقة حست نفسها اتفشت وشالت حق اولادها الاستشهدو في المظاهرات.
https://www.facebook.com/روايات-نور-ولجين-108149510945200
