اختارتك انت

12

#الحلقة_12
#رواية_اختارتك_أنت❤
#بقلم_ايمان_جمال❤
رامي ولسة الصدمة مأثرة عليه: انت قولت مين ياعز
عز: قولت 'هنا' في ايه يا ابني
رامي مش مستوعب خالص وقاعد يكلم روحه من غير صوت: طب ازاي دا انا سامعه وهو بيقول بحبك يامليكة
الكل كان فرحان بقرار عز وعلى عكس قرار رامي
رباب: الف مبروك ياحبيبي 'هنا' بنت كويسة وكلنا بنحبها
اشرف: عرفت تختار صح ياعز ربنا يسعدكم
رامي لسة في صدمته وامجد مركز معاه وعنيهم اتقابلوا مع بعض وكأن امجد بيقوله مش قولتلك حاسس انك هتندم واسامة نظراته كلها لوم وعتاب ، رامي قام من مكانه
اشرف: رايح فين يا رامي
رامي: انا خلصت فطار هنزل استناهم في الجنينة
اشرف: مش هتبارك لإبن عمك
رامي بص لعز: مبروك ياعز ربنا يسعدكم
عز: الله يبارك فيك ياحبيبي
رامي سابهم ونزل تحت وعز ومليكة طلعوا البلكونة
عز: مش عارف اقولك ايه يامليكة بجد لولا ماكنت حكيتلك ماكنتش هاخد القرار دا
*فلاش باك*
عز لما كان قاعد مع مليكة عند خالها
عز: انا بحبك يامليكة
مليكة: وانا كمان ياعز بحبك
طبعا رامي سمع الجملتين دول ومشي وعز فضل يرقص من الفرحة لحد ما مليكة كملت كلامها
مليكة: انا بحبك ياعز بس ذي اخويا
عز بعد ما كان فرحان انصدم: انتي قولتي ايه
مليكة: اقعد واسمعني كويس ياعز
عز قعد وبيسمعها بإهتمام
مليكة: انت ابن عمي واخويا وبجد بحبك اوي بس حب اخت لأخوها انا بحب فيك حنانك وخوفك عليا وبحب هزارك معايا
عز: بس انا بحبك
مليكة: ممكن كلامك نصه صح والنص التاني غلط
عز: ازاي
مليكة: يعني ياعز انت عشان معرفتش بنات في حياتك يمكن اختارتني انا ، يعني البنات اللي في حياتك انا ومريم وامل وبس عمرك مافكرت في اي بنت وعشان انا اتربيت معاك وقريبين من بعض دا اللي خلاك تحس انك بتحبني
عز ساكت وبيسمع كل كلمة بإهتمام
مليكة: انا هخليك تفتح عينك على حاجة ، في بنت بتحبك وانت تعرفها كويس وبجد لو انت فكرت فيها كزوجة صدقني هتبقى اسعد انسان
عز بيبصلها وكأنه بيقولها عاوزة تقولي مين
مليكة: 'هنا' ياعز
عز: تصدقيني لو قولتلك اني كنت حاسس بحبها دا
مليكة: طب كويس اوي صدقني ياعز فكر فيها شوية هتلاقي الحب اللي جواك دا مجرب حب اخ لأخته او حب صديق لصديقه المقرب
عز بيفكر في كلامها وشايفه صح: اوعدك اني افكر في كدا واني ادي لنفسي فرصة و ل'هنا' كمان
مليكة: انا بجد فرحانة انك فهمت كلامي وقدرته
عز: عشان احتمال كبير انتي تبقي صح في كلامك
*عودة من الفلاش باك*
مليكة: انا ماعملتش حاجة ياعز غير اني وضحتلك حاجة انت ماكنتش شايفها صح
عز: تسلميلي ياقلبي

*تحت في الجنينة*
رامي قاعد وحاسس انه بيحلم ومش مستوعب اللي سمعه معقول عز مش بيحب مليكة ولا هي بتحبه بالطريقة اللي هو كان فاهمها دماغه هتقف من كتر التفكير ومش عارف يعمل ايه ورفع ايده اليمين وبص للدبلة اللي كانت نتيجة اختياره
-مش قولتلك جوايا حاجة بتقولي انك هتندم يا رامي
وطبعا دا كان صوت امجد جاي عليه هو واسامة ، رامي بص لأمجد بس المرادي نظرته كلها حزن ووجع وندم ودمعة نزلت من عيونه ومسحها بسرعة
اسامة: انت اتسرعت اوي يارامي
رامي مش عاوز يسمع اي كلام ولا تأنيب لأنه مش مستحمل اي حاجة وسابهم واخد عربيته ومشي
اسامة: احنا هنسيبه لوحده كدا
امجد: ماتقلقش انا عارف رايح فين تعالى معايا نروح وراه
اسامة: حاضر بس بلاش نقوله كلام يضايقه اكتر هو مش مستحمل
امجد: انا كنت هقولك كدا الوقتي عشان انا زعلان عليه ودايما كنت بنصحه انه يقولها بس هنعمل ايه كل حاجة بتحصل خير لينا
اسامة وامجد ركبوا العربية وراحوا ورا رامي
عز ومليكة نزلوا وراحوا الشركة وامجد كلم عز وقاله انه يتصرف في الشغل النهاردة ، وبسمة استغربت من تأخير رامي واستغربت اكتر لما عرفت من عز انه مش جاي (بس هي لسة ماتعرفش ايه السبب) ولسة باقي عالسفر يومين ، والمفروض ان مليكة ورامي وعز هيسافروا ورامي عاوز بسمة معاهم
________________
رامي فضل بارة البيت من الصبح لحد بالليل وامجد كلم اشرف وطمنه ان رامي معاهم
رامي واسامة وامجد قاعدين في جنينة الڤيلا عند امجد ورامي كأنه مش معاهم خالص وسرحان
امجد قطع تفكيره: ممكن تهدى وتفكر بهدوء
رامي بصله وسكت
اسامة: كل حاجة ليها حل يارامي
رامي بوجع: انتوا عارفين انا عملت ايه انا خطبت بنت وانا عارف انها بتحبني يعني انا الوقتي لو سبتها هكسرها يعني هخليها تحس بالوجع اللي حسيته واكتر كمان
اسامة: معتش عارف اقولك ايه
رامي: قول اني غلطان ، قول اني استاهل اللي بيحصل فيا دا ، قول اني اتسرعت ، قول اني ماسمعتش كلامكم ، وبص لأمجد: ايه مش عاوز تقولي انك قولتلي اني هندم
امجد زعلان على صاحبه: كفاية يارامي بلاش الكلام دا وكل حاجة هتتحل
رامي بوجع: انا استحالة اوجع حد ولا أخلي حد يعيش اللي عيشته دا احساس وحش اوي
اسامة: يعني انت ناوي تعمل ايه
رامي: هكمل في اللي اختارته وهتحمل نتيجة اختياري
امجد: انت كدا هتوجع قلبك لتاني مرة
رامي: صدقني معتش يفرق معايا
امجد سكت ومش عارف يعمل ايه لرامي ومش هيعرف ياخد اي قرار غير برأي رامي واسامة بيبصله وكأنه بيقوله هنعمل ايه وامجد اصلا مش عارف ، رامي قضى الليلة معاهم ودخل اوضة من اوض الڤيلا واسامة نام هو كمان وامجد نزل الجنينة ومسك فونه ورن على حد ومن كلامه واضح انها بنت
امجد: ايه صحيتك
المتصل:........................
امجد: كنت قاعد مع رامي واسامة وماكنتش عارف ارد
المتصل:......................
امجد: زعلان عشانه اوي ، ومش عارف اعمل ايه او اساعده ازاي
المتصل:..........................
امجد: ماشي يالا نامي بقى وانا هطلع انام لأن اليوم كان طويل اوي
المتصل:...............
امجد: وانتي من اهلي يارب
_________
*تاني يوم الصبح*
رامي صحي وخرج وامجد واسامة لسة نايمين ، مليكة وعز فضلوا سهرانين عشان دراسة الجدوى اللي المفروض تتسلم بكرة وكل واحد فيهم طلع شقته وجهزوا للشغل ، ورامي رجع البيت ومش بيدي اي فرصة لحد يتكلم معاه ودخل اخد دش وغير هدمه ونزل اخد عربيته ومشي
الفطار كان في شقة محمد والكل متجمع واشرف قاعد زعلان
صالح: مالك يا اشرف
اشرف: مافيش ياحبيبي قلقان بس شوية على رامي
عز: هو تليفونه لسة مقفول باردوا
اشرف: اه هو قافلة بس هو مشي من شوية
عز: هو جه !؟
اشرف: اه غير هدومه ومشي
عز: طب ماطلعش يفطر معانا ليه ومش استناني انا ومليكة
اشرف: مش عارف دا حتى معرفناش نتكلم معاه
مليكة: معلش ياعمي يمكن فيه حاجة مزعلاه بس
اشرف بصلها وابتسم بحب ومن جواه عاوز يقولها انتي راحة ابني وسعادته بس للأسف مش عارف يعمل كدا من غير رأي رامي وعاوز يشوف ابنه هيتصرف ازاي
عز: احنا هنمشي احنا ياعمي وماتقلقش عليه هو هيبقى كويس
اشرف: يارب
صالح: هنروح امتى ل'هنا' ياعز
عز: بعد مانرجع من السفر ان شاء الله ، وانا هقابلها بعد الشغل وهروح لباباها عشان يبقى عارف بشكل مبدأي
صالح: ماشي ياحبيبي
معتز كان واقف في البلكونة وشاف عربية عز وصلت وبعلو صوته: ياعز عربيتك جات تحت
عز بفرحة: واخيرا
صالح: انا كلمت التوكيل امبارح وعرفت انها خلصت بس انت كنت مشغول معرفتش اقولك وطلبت منهم ان حد من عندهم يجيبها لحد البيت
عز باس ايد ابوه: انت احسن اب في الدنيا
صالح: يابكاش
عز ضحك: عيب عليك ياحاج دا انت حبيبي والله
رباب جات من وراه: وانا ايه بقى ياسي عز
عز ضحك: انت حياتي يا امي ، وحضنها
صالح بغضب مصطنع: ابعد ايدك عنها احسنلك
عز ضحك اوي: انت بتغيير عليها مني ياحاج دا انا ذي ابنك باردوا
مليكة بضحك: اه ياعمي دا ذي ابنك باردوا
عز: لا بقولكم ايه انا فرحان برجوع عربيتي ومش فايق لتحفيلكم دا
مليكة: خلاص يازيزو ويلا ننزل وعقبال ما اركب عربيتي تاني ، وبصت لأبوها
محمد فاهمها: يالا يالوكا مع ابن عمك
مليكة بزعل: طيب
عز ومليكة نزلوا وركبوا العربية وعز فرحان بيها اوي ومليكة فرحانة عشانه بس من جواها زعلان عشان عاوزة تسوق عربيتها تاني وعز ملاحظ دا
عز: هتسوقيها تاني يالوكا ان شاء الله
مليكة: يارب ياعز اهو انت خلاص هتخطب 'هنا' ورامي خطب بسمة وكل واحد فيكم هينشغل مع خطيبته
عز: عيب عليكي يالوكا انا انشغل عنك باردوا
مليكة ابتسمت: ربنا يخليك ليا يارب
عز: ويخليكي ليا يا أحسن أخت
فضلوا يتكلموا لحد ماوصلوا الشركة وكل واحد دخل مكتبه ، مليكة خرجت من مكتبها وراحت لرامي مكتبه وخبطت ودخلت ، رامي كان مشغول في الملف اللي على المكتب ولما مليكة دخلت بصلها ورجع بص للملف
مليكة قعدت: كنت عاوزة اتكلم معاك شوية
رامي بصلها وساب الملف: اتكلمي
مليكة: عمي قلقان عليك ومش عارف مالك
رامي: ماتقلقيش انا هتكلم معاه لما ارجع
مليكة: ماشي المهم في اجتماع بعد شوية عشان نقدم الملفات عشان المشروع الجديد قبل مانسافر وانت عارف ان معتش غير يوم
رامي: ايوا امجد قالي على الاجتماع وهحضره ان شاء الله ، انتي ظبطي اللي طلبه منك؟
مليكة: ايوا انا وعز سهرنا على الملف وظبطنا كل حاجة عشان تكاليف المشروع
رامي: تمام
مليكة: كنت عاوزة اخد رأيك فيه
رامي: كفاية رأي عز
مليكة زعلت من رده: صح كفاية رأي عز ، عن اذنك
رامي اضايق من رده عليها بس كالعادة بيتعامل بقسوة (رغم انه عرف ان عز هيخطب 'هنا')
_____________
*في شركة اسامة*
قاعد على مكتبه وتليفونه رن ورد بسرعة
اسامة: ها طمنيني عملتي ايه في الامتحان
امل: الحمدلله كان ساهل والله
اسامة بفرحة: عقبال الباقي وتخلصي ياقلبي
امل: يارب يا حبيبي
اسامة: انتي قولتي ايه
امل اتسكفت: انا ماقولتش حاجة وبعدين انا هقفل عشان مريم جايا عليا اهي وهترخم
اسامة ضحك: بتهربي ماشي بس هسمعها منك قريب بس لما اشوفك
امل قفلت من خجلها ومريم جات عليها
مريم: ايه خدودك حمرا ليه
امل: بس يارخمة
مريم ضحكت اوي عليها
_____________
* في شركة امجد*
امجد قاعد في مكتبه وطلب مليكة وعز وشوية ودخلوا
امجد: ادخلوا عاوزكم
عز ومليكة قعدوا
امجد: كنت عاوز اتكلم عن سفركم
مليكة: هو اتأجل ولا ايه
عز: ياريت عشان اعمل خطوبتي
امجد ضحك: مستعجل علي ايه يا ابني اصبر خلينا في الأهم ، الوقتي انت ورامي ومليكة وبسمة هتسافروا سوا
مليكة بضيق: هي باردوا هتسافر معانا
امجد: للأسف رامي عاوزها تسافر معاكم وانتوا عارفين رامي مش بيرجع في كلامه
عز: مش مهم عادي
مليكة: ممكن يا امجد تخلي تعاملي معاها بسيط انا مش عاوزة مشاكل
امجد: هو حصل حاجة ولا ايه
مليكة: لا ، بس انا بصراحة مش بحبها ولا بحب اتعامل معاها بحس انها رخمة
عز ضحك وامجد مقدرش يمسك نفسه من الضحك و مليكة ضحكت معاهم ورامي دخل
رامي: طب ضحكوني معاكم
امجد: لا الموضوع مش هيعجبك اصلا
رامي سكت وبص لمليكة اللي هي اصلا بتبعد بنظراتها عنه
امجد: اقعد عشان نتكلم عن السفر
رامي قعد: طلاما هتتكلم عن سفرنا بقى اطلب من السكرتيرة تبلغ بسمة وتيجي عشان هي باردوا مسافرة
مليكة: امجد انا هروح اراجع الورق عشان فاضل عالإجتماع نص ساعة وعز اهو قاعد هيبقى يحكيلي اللي هيحصل
امجد: ماشي يامليكة اتفضلي
مليكة خرجت ورامي مستغرب اوي من خروجها وامجد ملاحظ دا
امجد: اصلها مش بتحب بسمة
رامي: ماشي
عز: انت مش زعلان ان بنت عمك مش بتحبها
رامي: ما انا عارف من زمان انها مش بتحبها حتى انت وامجد واسامة كمان بس عادي يعني المهم انا
امجد: انت ايه ياصاحبي
رامي: اني مرتاح
امجد: ياريت ، المهم دا مش موضوعنا دلوقتي ، انتوا هتسافروا بعد بكرة وعماد مرتب كل حاجة
عز: المهم نكون سوا وخلاص وياريت اوضتي تكون جمب لوكا عشان ابقى مرتاح بدل ما اكون جمب رامي او بسمة
رامي: لاحظ انك بتتكلم عليا وعلى خطيبتي يا ابن عمي
عز: انت عارفني بقول على لساني وبصراحة
رامي سكت وامجد هيموت ويفهم دماغ صاحبه
امجد: انتوا ناويين تسافروا بإيه
عز ورامي: بالعربية
امجد: ماشاء الله في صوت واحد
عز ضحك: بص يا ميجو رغم اننا سافرنا مذا مرة بالطيارة بس لوكا بتخاف في كل مرة نركب فيها طيارة فالعربية احسن
رامي: انا ما اختارتش العربية عشانها انا ماليش مزاج اسافر بالطيارة
عز اضايق: نفسي اعرف انت بتعاملها بالقسوة دي ليه هي عملتلك ايه ، عارف يا رامي كنت دايما بشوف في عيونك نظرات انك مضايق ان انا وهي قريبين من بعش كان نفسي اسألك ساعتها واقولك طلاما زعلان انها قريبة مني وانت لا ليه بتعاملها كدا
رامي سكت لانه معندوش رد
عز وقف وبص لأمجد: انا في مكتبي لحد مايجي وقت الاجتماع
امجد سمحله وعز خرج
امجد بص لرامي: ماردتش على عز ليه
رامي: لو في حاجة مهمة عاوزني فيها قولها لو مافيش هروح مكتبي
امجد: روم مكتبك يارامي احسن
رامي رجع مكتبه ومضايق اوي
_______________
*في شركة اخرى وخصوصا في مكتب المدير*
المدير: انت لازم تشوفلي حل مش كل مناقصة ندخل بيها شركة امجد الزيني تاخدها مننا
محامي الشركة: حضرتك عارف انهم بيقدموا شروط احسن واكفئ
المدير بغضب: المناقصة الجايا لازم نكسبها انت فاهم وبعدين العين اللي حاطينها في شركتهم ذي قلتها
المحامي: حضرتك معرفتناش نوصل لإيه هناك احنا الاخبار بتوصلنا بس امجد بيجهز ملفات المناقصة مع مجموعة موثوق هت بيثق فيها اوي
المدير: يبقى لازم ملف دراسة الجدوى يكون عندنا ونقدمه احنا وبكدا نكسب المناقصة ، انت عارف ان شركتنا من ضمن الشركات اللي داخلة في الكمباوند الجديد ولازم دراسة جدوى كويسة اوي
المحامي: يبقى لازم الملف دا يبقى في ايدينا
المدير: بالظبط كدا كلم العين بتاعتنا اللي هناك ولازم يكون الملف هنا قبل سفرهم
المحامي: حاضر
__________

*الحلقة خلصت*
-ياترى العين اللي في شركة امجد وبتنقل اخبارهم؟
-ياترى لما بسمة تعرف ان عز هيخطب 'هنا' هتتصرف ازاي مع رامي وخصوصا مليكة؟