و انكسر قلبي ( روايات ليبية )

حلقة 3 🔥

#وانكسر_قلبي
#بقلم:#منى_المجبري
#part3
__________________________
_لايك قبل ماتقرو و بعد القراءه رايكم في تعليق دعمكم ليا يهمني وديرو دعوه للاصدقاء💙
___________________________

"ثاني يوم"

_خشت يسرا وقبلتها امها وحكتلها الى صار

يسرا" بِ زعل": ماما انتِ عارفتيها متحملش خلاص صالحيها
فوزيه : هيا استغفلتني
يسرا: حتى لو كان خذيتي الارضي وفهمتيها هيا في سن المراهقه هي خشي راضيها وخليني نمكيجلها ونعدو للفرح كلنا ماتنكديش عليها
فوزيه: هي أمري لله

_رتاج... كنت مقعمزه ومتنكده ودموعي ينزلن خشت ماما ويسرا حضنتني ماما وقالت انها خايفه عليا وغيره من ه الكلام واصالحنا وطلعت

يسرا : غبيه ماتعرفش تصرفي
رتاج: كنت نكلم فطنتلى نبي نكلمه نبي نسمع صوته
يسرا: خلاص فوتي توا وتعالى نبدالك في شعرك لان طويل يأخذ وقت وبعدها نمكيجك خفيف والمكالمه خليها المره الجايه لما نجيكم لان توا ماما مشيعه العين معاك خليها تنسه شويا
رتاج" بٍ اقتناع": به

_ جابت رتاج الستشوار واستشورتها يسرا وبعدها دارتلها ميك اب بناتي ولبست فستان تب وطلقت شعرها على خشت فوزيه

فوزيه" بِ اعجاب و خوف": مشاءالله غزاله سلم بنيتي لمي شعرك راه تجيك اعوينه
يسرا "بٍ اعناد": لالا نحبه مطلوق ونحب جمالى وانتِ عارفه كويس يا ماما
يسرا : خليها يا ماما براحتها

_تنهد فوزيه بِ قلت حيله وقالت :

فوزيه: به اقرى المعوذات وخفن ارواحكن شويا ونطلعو
الكل: حاضر
وصال "بِ اعجاب": ياريتني نشبهلك يا رتاج
رتاج" بِ ضحكه " : انا طرف واحد في العالم مفش اثنين وبعدين شنو رتاج قولى خالتى ديريلي هيبه شويا
وصال "بِ غرور": اصلا انا احلى منك وبعدين عيب نقول لِ طفله خالتى
موده" بِ تأفف ": اسكتن شويا شن هضا
رتاج: معرفتش تربي يا يسرا
يسرا : هههههههههه

_ لبسن البنات وكملن وطلعن للفرح كان جنب حوشهم خشن للخيمه ولقت رتاج غزاله قعمزن وقعدن يهدرزآ

غزاله "بِ اعجاب": الله أكبر مشاءالله عيني وعيون الناس مأضرك الحق عندك جمال مميز وحظور يلغي حظور الجميع
رتاج" بِ احراج": ياعمري انا احرجتيني توا فكيني من المجاملات وقوليلي شن صار في اسماعيل
غزاله: والله ما انجامل ربي يجمعك بيه وتقعدي كنتنا قاعد 24 ساعه يفكر فيك وبس
رتاج: اه ربي يصبرنا
غزاله: يارب حبي
رتاج وهيا "تشم زي الاطفال": اه بنه الوكال بعدك جعت نوضي نقعمزو جنبهم بيش الحقو
غزاله" بِ هبال": هي قبل مايكلونا

_ وقعمزن البنات تعشن وبعد كملن جت وليه كبيره في السن شويا وصبت فوق راس رتاج وتشوفلها بِ تفحص

رتاج" بِ ارتباك ": تفضلي تبي حاجه؟
الوليه: وين امك حبيبتي
فوزيه: نعم انا امها
الوليه: نبي نطلب ابنيتك لِ ولديها تعطوها ولالا