كسر الروح

البارت الثاني

#كسر_الروح
#البارت_الثاني
#الكاتبة_هيله

-لو تجاهلت الرسالة الأولى لَسَلِمَ قلبي.. -

_______________________________

داومت ثاني يوم جنت واگفه اني وهاجر وشفت الولد اللي سوالنا مكان البارحه متقدم بإتجاهنا مدري شنو شايل بأيدو وگال 

عمار : صباح الخير

ودق وهاجر : صباح النور

دحگت على ايدو شايل السوار مالتي.. انتبه اني ادحگ عليه گال

عمار : اا هذا وگع من ايدچ البارحه من نزلتي

اخذتو منو : شكراً

عمار : ولو.. ااني وياكم نفس القسم بس غير قاعه

ودق : اهاا

عمار : هه اي.. يلا من رخصتكم

ودق و هاجر : اخذ راحتك

.
.
.

هاجر : حلو مو

ودق : اي طبعاً حلو غير ذوقي

هاجر : يا فطيرة الولد مو السوار

ودق : هاا زين شكلو

- في البيت-

أيه : ودق عفيه تعاي اشطفي الحوش عني لحد الآن كلشي ما درست وباچر عندي امتحان

ودق : هسع ابدل واجي روحي انتي

بدلت وطلعت شطفت الحوش وعاونت امي بالغدا

ودق : ها ماما شسوي بعد

الأم : روحي اگعدي ما ضل شي ربع ساعه يجي ابوج وبس نفرغ
.. وو ها قررتي بعد

ودق : على شنو... هااا ماما قررت من هذاك اليوم وگتلج لأ

الأم : براحتج.. ابوج كال لا تحچين معاها انتي خلي هي تقرر بس ترا خوش ولد ويفوتج وهم يطلعج بيت وحدج شتريدين بعد

ودق : ههههههه ترا والله من يكول اطلعها بيت وحدها مو معناها خوش ولد وحتى لو خوش ولد ما يناسبني والله نختلف من السما للگاع

.
.
.
.

من موقف السوار يوميه اشوف هذاك الولد وشوكت ما ادحگ اشوفو يدحگ عليه واضل مرتبكه طلع اسمو عمار واكبر مني بسنه ومن عشيره معروفه طبعاً هاجر هي الاستخبارات جابت معلومات عنو 

يوم من الايام چنت امشي واقرأ بالملزمه ما احس الا احد لطخني وتكربست ووگعت والطلاب كلهم يدحگون رفعت راسي واشوف عمار گدامي

عمار : اسف اسف مو متقصد خوما تأذيتي

تعصبت ومن الفشله دمعت وگتلو : انت شگد ما تستحي

هو ماكو ربط بس ما عرفت شگول انوب كل الطلاب واگفين

راد يساعدني حتى اگوم گتلو ما يحتاج