كسر الروح

البارت الأول

#كسرة_روح

#البارت_الأول

#الكاتبة_هيله

عريان يگول :🍃
أحبك من صدگ من الزمان الفات
مو حب هالوكت والعشگ طياري ..🖤

_________________________________

اليوم أول يوم ليه سنة ثانية جامعة / كلية تربية
فتت وسميت بسم الله ودعيت الله يجعلها سنة خير عليه واتفوق بيها..

چنت امشي وحدي كالعادة ما عندي صديقات مقربات حيل مجرد على گد السلام والدراسة وهالشي لأني هادئه وقليل أحچي ودائما احب اضل وحدي مرات اهلي يگولون شلون راح تدرسين بالمدارس بهذا طبعج

فتت عالقاعة وعالأغلب يصير اول يوم بس تسجيل حضور ومو چثير بيها طلاب جت بنية وگفت يمي

هاجر : مرحبا

ودق : مراحب

هاجر : اني جديدة هين عادي نصير صديقات لأن ما اعرف احد

ودق : اي صحيح اول مرة اشوفج هلا بيج، اكيد عادي اتشرف بيج.. اسمي ودق وانتي

هاجر : عاشت الأسامي بس شنو معناه اول مرة اسمعو.. اني أسمي هاجر

ودق : هههه تعيش ايامج، يعني المطر لأن من جيت عالدنيا چانت زخ مطر عاد اهلي سموني ودق .. عاشت الاسامي اسمج هم حلو

هاجر : هاا حلوو هيج عجل شبي حضي سموني على اسم جدتي لا وهم لو تحبني والله يا الله من نروح عليهم تريد تاكلني.. ترا احب اگرگ عادي تحمليني

ودق : ههههه جيتي عالشخص الغلط ما احب اسولف چثير اني اكثر الگعدات اكون مستمعه بس ههههه

هاجر : لا بالعكس بعد احسن اضوج من احد يگرگ على راسي بس احب اگرگ هههههه

ضحكنا ثنينا وضلت تحچي ما خلت واحد بعشيرتها ما حچت عليه سطرتني بس حلوه سوالفها وحبيتها

رجعت عالبيت فاطسه من الحر.. ورا الغده صاحني بابا طلع جايبلي موبايل وخط لأن هذيج السنة تبهدلت من يتأخر الخط او يصير ضرف معايه ما اگدر اتواصل معاهم بس طرت من الفرحة شلون الجاهل وجابولو لعبة يحبها

الأب : هاج بنتي اني حطيتلج اياه علمود ما تحتاجين احد غيرنا اذا صار معاج شي لا سامح الله واني واثق بيج واريدج تكونين گد الثقة ماشي بنيتي.

ودق : ان شاء الله بابا.

فرحت حيل بي و گلت هم اخذ رقم هاجر لأن عدنا البنت ما يجيبولها خط الا تتزوج أو تنخطب

وسويت فيس بوك ودخلت عالگروب مال قسمنا همين ما احجي بس ادحگ على سوالفهم ونزلت كل أغاني ماجد المهندس حيل احب صوتو وأية تگول شگد قديمه

،
،
،
،

احنا عيلتنا متكونه من بابا وماما وخوات ٢ اكبر مني متزوجات ووحده بصف سادس اعدادي اسمها أيه واخويه بصف ثاني متوسط حياتنا بسيطة وهادئه الحمد لله..