#أدوار_وهميه الحلقه 1 (مقدمه)
ريم:راسي صداااع بيتفجر 🔥حاسه دوشة المنضومه قاعده في دماغي صدري مغموم من ال7كيلو يلي لابستهم والكتله الحجريه يلي فوق راسي وفوقها الطرحه
من غير الالف لون يلي كان على وجهي !!
كانت اكتر مزينه سيئه موجوده في البلاد
بس كانت الوحيده يلي تطلع للحوش بحكم خوتي ميبوش المزينات والكلام الفارغ هاذا
ندور في شقت الفندق بعد ما نحيت الكعب متعي عشان رجلي تتريح شويه وتاخد وضعها الطبيعي '
وقفت قدام المرايا نتفرج ع روحي ...بديت نحكي داخلي وفي عيني نضرة هزوه
لو كانت بنت غيري راهو توا ميته خووف وترعش مع بعضها ! لان بعد دقايق رح يكشفو انهم انخدعو
وح يكشفو اني لعبت عليهم او بمعنى اصح اهلي هما يلي خططو لكل شي بدون موافقتي حتى!!
على عكس يلي حاسه بيه توا !..برووود مخاطري في شي ولا حاسه بي اي حاجه ولا حتى هامتني اي حاجه !
متت او عشت عاملني عريس الغفله كويس او عاملني بي استحقار مش هامني شي لان في الدنيا البائسه هاذي مفيش شي يفرح فيها .
سمعت باب الجناح انفتح ❤️وسمعت خطوات سريعه تتقدم لي الدار كأن الخطوات هاذي فرحانه ومش مصدقه امتى توصل لي الغرفه
انفتح باب الدار وسمعت صوته وهوا يحكي بي لهفة فرح !
ناصر:اهلا بي عروستي الغاليه ❤️
ريم:تلفتت وانا على وجهي علامات الجمود وواضح من ملامحي اني كنت متوقعه ردة فعله اول ما يشوفني !
ناصر:تلاشت ابتسامته وقعد دقايق يشوفلها بدون ما يرمش ومركز في تفاصيل وجها كأنه يبي يكذب عيونه !! بعد قريب ربع ساعه من الصمت وعيون ناصر يلي بيطلعو نطقت ريم
ريم:سبرايز صح !؟
ناصر:اءء و و وو واضح اني دخلت للغرفه الغلط !
ريم:لوحت الباقه يلي كانت ماسكتها على السرير وملامح وجها قاعدات زي ماهما متغير شي .... لا هاذا الجناح متعك يا دكتور ناصر !
ولي سوء حظك انا عروستك اليوم
ناضر:ناقر حواجبه ويشوفلها بتمعن ...معقوله البنت يلي خطبها تغيرت هكي ؟؟مستحيل هوا حافظ ملامحها كويس !!!
يلي خطبها بيضه ويلي قدامه حنطيه مائله لي السمار الخفيف
يلي خطبها شعرها بني فاتح وقصير ويلي قدامه شعرها اسود زي الليل وواضح انه طويل
يلي خطبها طويله زي عارضات الازياء ويلي قدامه قصيره ❤️
يلي خطبها عيونها خضر ويلي قدامه عيونها ع الاسود 🔥
ريم:خلي نريح راسك من الاسئله يلي في بالك وقريب تجيبلك جلطه دماغيه !
انت خطبت واعجبت بي ريماس اختي واهلي غيرو العروسه من كيفهم لاني انا الكبيره وغلط تتزوج الكبيره قبل الصغيره
ناصر:صاح فيها بي حاله هستيريه ....شن تقوووولي انتي مستحيل الشي هاذا
ريم:ببرود تام ....هاذا يلي صار اسفه بي النيابه عليهم !
ناصر :معش قدرو رجليه يحملوه اكتر من هكي !!
طاح ع الصالون يلي كان وراه وراسه بين يديه
يحاول يستوعب يلي صار في الليله يلي استناها بي فارغ الصبر !!
اما ريم عطاته بي الضهر وهيا تنحي في الطرحه وباقي اكسسوارها وتتكلم بكل برود وثبات !!
أنت تقرأ
ادوار وهميه
General Fiction.. روايات بنووتةة الشيخ .. 🔥رِوايَــــــاتْ بـــّـــنـــوتِـةْ الشـِـــــيــــــخْ🔥 🔥اروى الطـــــّـاهــــِرْ المـــســــــلاتـــــــــي🔥
