ادوار وهميه

ادوار وهميه ~ الحلقه 4

#ادوار_وهميه 4 (حقيقيه ممزوجه بي خيال)

ريم:كأنه حلم !!
كيف ناصر يموت ؟؟جديات خلاص هادي نهاية زواجي الفاشل !
تمنيت نطلق او يصير اي شي لكن مش يموت ناصر💔
برغم ان طول السبوعين يلي كنا متزوجين فيهم معاملته معاي اكتر من سيئه لكن سخفني💔
كان متمني البنت يلي عجباته ومات بحسرته 💔💔
كنت مقعمزه في الخيمه مسبوها مش مصدقه !
الناس خاشه طالعه تعزي وجو اهلي يعزو حتى هما
نسمع في بنات العيله والجيران يحكو عليا
هاذي يلي قالو عليها خطب اختها البيضه وعطوه السمراء الشينه
ناس تانيه ردت عليهم وقالو اي سمراء لكن قنينه
ردو ناس تانيه واصرو اني مش قنينه لان لون بشرتي حنطي مائل لي السمار ...هاذي كانت حجتهم
ناس تانيه تحكي عليا وتقول منزلتش منها حتى دمعه مسكين ضحكت عليه الخايبه هيا واهلها !

مكنتش مدوره كلامهم وقعدت اليوم كله وانا نحاول نستوعب ان ناصر توفى !!!.
لفت نضري من بين الناس يلي في الخيمه بنت تبكي من وسط خاطرها وعيونها منفوخات من البكي ...ممكن تكون وحده من العيله بحكم عيلته كلهم منعرفهمش لان محدش فيهم طايقني !
كملت يومي وانا مقعمزه في الخيمه ساكته حايره مصدومه والناس تعزي فيا

__________________________________

فاطمه :مقدرتش نفسر نضرات اهل انور ...
فرحانين لان انور نقدهم من كلام الناس وخداني !
وفي نفس الوقت قلبهم واجعهم على خطيبة انور 💔وولدهم يلي هاجر الله اعلم وصل ولا مات في البحر؟؟
في نضر هلبا ناس كنت حقيره وانانيه كيف ناخد خو خطيبي يلي خديته بعلاقه ؟؟
لكن محدش يعرف ضرفي 💔
محدش فيهم فاهم المصيبه يلي خلاها خطيبي وعالقه فيها بروحي !!
قلبي طاح مني لما وصلت لي الدخول وتواجهت عيني في عينه 💔
شافلي بنضره حسيتها زي السم 💔
كأنه يلوم فيا لاني خربتله حياته !!
حافضت على اعصابي وخليت عيوني في الارض طول الوقت
في داخلي نقول يالله يا فاطمه هانت معش مزال الا دقايق بس وتتسكر علينا دار وحده والولد يلي في بطني يبدا ليه هوا وننفذ من ها القصه

سميره:ترش في الزهر  وتشوف لي ولدها بكسرة خاطر ....ربي يفتح عليك ويسترك ياولدي
انور:ساكت مدارش ولا اي ردة فعل !
سميره:مسحت دمعتها يلي كانت على طرف عينها ....توكل على ربي وخود عروستك وروح لي حوشك
انور:هز براسه ....طلعوها انتم مش قادر نخش لعند داخل
سميره:طبطبت على كتفه .....تمام اسبقنا لي السياره
انور:رتب الجاكيت الرسمي يلي كان لابسه وطلع

_________________________________

لمياء:واقفه من بهيد تحكي بي الهاتف ...قربت منها مروه
مروه:لمياء؟
لمياء:اوكي تو نهدرزو هي .......سلام
مروه:مع منو تحكي ؟
لمياء:امي مش رفعت صغاري معاها ؟قلت نسأل عليهم
مروه:الجو مخنوق داخل ونحس في روحي مضايقه
لمياء:من شنو ؟
مروه:نفكر في الخريه هاذي يلي راجلها مات شنو بدير ؟
لمياء:شنو بدير يعني ؟بتقلب وجها لي حوش بوها
مروه:سكتت وهيا سارحه
لمياء:انا خاشه بندير قهوا قالو تمت عليهم
مروه:لمحت شاب من بعيد قلبها فز من مكانه ❤️...شويه ونلحقك
لمياء:تساوي في وشاحها .....تمام