ريم:شفت الدم ينزل بقطرات غزيره على الفيلو خذيت كلينكس وحطيته ع خشمي ...مخفتش ولا انفزعت هاذا شي خلاص تعودت عليه ! ديمه هكي لما يبدا الجو مصقع هلبا قمت راسي لي فوق عشان يخف النزيف ومسمعتش غير باب الجناح تسكر بقوه لدرجة روشن الغرفه دار صوت قوي !!
مسحت خشمي كويس وبديت نفك في خيوط الفيلو شوي شوي لين قدرت نطلع منه اخيرا !! فتحت الشنطه الصغيره يلي جبتها معاي وكان مفيهاش غير ملابس داخليه وروب شفاف كله ولوشن للجسم و و و ....بي اختصار كانت شنطة دخول ! خذيت الملابس الداخليه وسكرتها وانا منزعجه خشيت للحمام ورميت جسمي في الدوش الدافي يلي كانو مجهزينه لي ليلة العمر ع اساس ...هه مسكين اكيد ركبه الرعب من منضري بي المكياج المعفن والرخيص يلي شافني بيه !! غرقت تحت الميه نحاول نمسح يلي في وجهي وشعري يشم ريحة الميه وينسى المثبت يلي خلاه زي الصخره !
_______________________________
ناصر:كيففففف فهمني اللقطه هيا كيف هكي لعبو علينا محترمونيش لا انا ولا بوي ولا عمامي يلي رافعهم خطبت بنتهم الصغيره وعابي على روحي بناخد وحده زي الورده تجيني وحده منضرها يركبك الرعب !؟ كريم:قداش مواليدها يلي خديتها ؟ ناصر:تي وين نعلم بي امها انا !!؟...لكن واضح عليها شارفه من الخطوط يلي في وجها كريم:سكت ناصر:كريم انت خوي الكبير وتزبط فهمني كيف نتصرف توا نجبدها من شعرها ونلوحها عليهم ؟؟ كريم:بلع ريقه...لالالا سلم خوي اهدا مديرهاش في النهايه الناس تحب الدوا والقصه هاذي مفيش حد يصدقها كلهم رح يحطو في راسهم انك لقيت البنت مش شريفه والشي هاذا مش حلو لا في حقك انا گ دكتور ولا حق البنت اهدا ناصر:خذي نفس وطلعه بي ضيق وهوا بيتفجر ....كيف بنقول لي امي وخواتي بس !!! كريم:عندهم علم ناصر:قام وجها بصدمه ....كيف؟؟؟؟ كريم:شنو يلي كيف؟خواتك مشو جابوها من الصاله وامك شافتها وقالو بكرا بيمشو يفهمو من اهل البنت على السبب! ناصر:فك القرواطه ووجها احمرررر كريم:اهدا انت توا وتعود من الشطان الصباح رباح ارجعلها متخليهاش بروحها في الفندق ناصر :معندي نيه حتى نشوف لي خليقتها كريم:مقتلكش ارقد معاها قتلك ارجع تريح ومتخليهاش بروحها في الفندق مهما كان هيا بنت في النهايه ! ناصر:خذي نفس عميق وهوا يشوف لي اعلى كريم:طبطب ع كتفه ....هيا ناصر:خذي مفاتيحه ورجع لي السياره .
