(اقرأو للآخر...)
لا بجد انا عايزة افهم هو ليه فيه صلاة،بجد يعني الصلاة ضافتلي ايه يعني،فين الفايدة ولا انا خسرت ايه لو مصليتش،ما انا عايش اهو و زي الفل ولطيف جدا مع الناس والناس كلها بتحبني وخدوم جدا وبعمل خير يعني مش شرير ، يعني ليه بقا عشان ابقي كويس عند ربنا لازم أصلّي ، و ليه دايما لازم دلوقتي، ليه مثلا مش ف آخر اليوم كدا لما افضي اصلي ركعتين خُفاف وتبقي الدنيا خفيفة ظريفة، ولا ف الويك اند حتي،ليه دايما لازم اسيب اللي ف ايدي واقوم او ابقي نايم وأصحي وبعدين حتي لو انا تعبان يقولولي صلي وانت قاعد ،ي جماعة مش قادر تعبان،خلاص صلي وانت نايم بعينك،يااه...اصلي بعنيا، هو فيه ايه الأهمية القصوي دي ليه بجد...انا عايز اقولكم ان مشكلتي كبرت فعلا لما قالولي اسمع فيديوهات عن الصلاة وأهمية الصلاة، ي جمااعة والله معترضتش الصلاة جميلة جدا وعبادة بتقربني من ربنا وكل حاجة بس انا مش هقدر ألتزم بيها خمس مرات ف اليوم ،انا هي دي مشكلتي اساسا اللي محدش فاهمها ان انا مش قادر ألتزم اصلا بالحاجات الصح والحلوة ف حياتي بشكل عام،ما المذاكرة والنجاح حلو ومبذاكرش، ليه بقا عشان فيه حاجة من الحجات دي انا مش قادر ألتزم بيها ابقي بعيد عن ربنا..وسيدنا محمد عليه الصلاة والسلام قال:"العهد الذي بيننا وبينهم الصلاة فمن تركها فقد كفر " يااه دانا بعيد اوي بقا..اكيد فعلا في حاجة انا مش فاهمها ،فدروت ف المصحف لقيت:"ان الصلاة تنهي عن الفحشاء والمنكر"..بقيت مش فاهم اكتر دا اللي هوا ازاي يعني، يعني بجد ايه العلاقة بين اني لما اصلي هبطل اعمل حجات غلط،لا وسيدنا محمد عليه الصلاة والسلام كان بيقول لسيدنا بلال:"ارحنا بها يا بلال"..اكيد يعني سيدنا محمد مكانش بيبالغ والموضوع بالنسباله كان مريح فعلا بس ساعتها الكلام هيبقي عن حاجة تانية غير الصلاة اللي انا اعرفها،الآية ف القران بتقول:"واستعينوا بالصبر والصلاة" يعني المفروض فيه حاجة معيّنة انا اقدر أستعين بالصلاة عليها،لا لا لا الصلاة اللي انا اعرفها مفيهاش الكلام دا خالص ومفيهاش اي راحة ومفيش حاجة معينة بستعين عليها بالصلاة ،ومن الاخر كدا انا مش هقدر ألتزم بالموضوع دا خمس مرات ف اليوم ولا ف الويك اند لما افضي ،وعلفكرة دا مش قراري لوحدي..ناس كتيير قرروا كدا ،مننا اللي مفضيش بقاله عشرين سنة ومننا اللي مات وهو لسة مفضيش لاننا استغلينا وقتنا ف حجات تانية اهم بكتير،مواعيدنا ف الشغل كانت شارب جدا ،لأن دا شغل،والشغل شغل..لمة الصحاب بالنسبالنا بالدنيا كلها ،قدرنا بجد نِدّي لكل حاجة حقها بالذات الحجات اللي بنحبها اديناها حقها بزيادة فملاقيناش وقت احنا استغلينا وقتنا احسن استغلال في الحجات اللي كنا عايشين عشانها،اللي ربنا كان طول المدة دي بيفكرنا ان مش هي دي الحجات اللي هو خلقنا عشانها، خمس فرص ف ظروف مختلفة عشان نقدر نحدد احنا بنحب ايه اكتر واحنا فعلا حددنا، وأعتقد إنها كانت رسالة واضحة جدا مننا لربنا اللي هو شكرا يارب خلاص احنا عارفين نتصرف،فربنا بيقولنا مش عايز تطلب اي حاجة ف الصلاة ،لا لا يارب شكرا انا تمام،طيب مش حابب تكلمني،لا طبعا يارب حابب بس حاليا بكلم حد تاني،طيب مش هتقربلي دانت لو سجدت هكون قريب منك جدا ،آنا آسف حقيقي بس انا فعلا مش فاضي...طب ملكش نفس ف حاجة،لا انا هكلم فلان هخليه يخلصلي المصلحة دي..يعني انت مبتحبنيش،لا لا طبعا يارب ازاي دانت اكتر حاجة بحبها ف حياتي...بتضحك علي مين؟بتضحك عليا دانا اللي خلقتك ..بتضحك عليا ،طب تعالي انا اول حاجة هحاسبك عليها الصلاة،هخليها اسعد لحظات اللي بيحبني وبيرمي حموله عليا ،أما بالنسبالك انت ف تعالي افرجك الدنيا اللي شغلتك عني...
مشكلتي فعلا طلعت اكبر بكتير من تخيلي لفكرة الصلاة...اكتشفت ان ترتيب الحجات اللي بحبها بجد طلع غلط فعلا،ودا عمللي خلل رهيب ف توازن حياتي ف كل الاتجاهات، وقتي والحاجات اللي بعملها و أولوياتي انا مبقيتش عارف هما مترتبين وبعملهم برضايا ولا غصب عني..اقولوكو علي حاجة؟!
انا حقيقي اسألتي دي كلها اتحلت مرة واحدة لما اكتشفت ان عمري ما سألت الأسئلة دي علي الحاجات اللي بحبها..
#ياسر_ممدوح.
