القهوة من كتر الكتابة عنها باخت
فيه حاجات زيادة مدحها لعنة
يارب هبنا شخص اصم يسمعنا
وادينا قلب نبوح له ما يخونناش
وادينا حضن نروحله فيساعنا
صدرك شوارع ذكريات تايهين
والحزن شاعر له هدوءهوحكمته
سألوا الكهان يال تري بتحب مين ؟
ضاق المكان ما فضلش غيرها ف رنته
اتنين ف حرب وخرجوا الاتنين مقتولين
وحضنها هربت منه رجعت حضنته
مين الي سلم للشتا المفتاح
طعم الحاجات الدافية في الليل والمطر
زهدك ف كل الهربانين من جنتك
البنت كانت حبيتك يا عبيط
حبتها ليه ساعة ما كنت كرهتك
وازاي بتعمل من سجايرك بالنوات
بتسيبها تطلع للسما دخان
البنت مشيت وانت مت عشان
دخنت نفسك في الصحاب سلطان
وعطشت من شري السما ف البحر
والبحر من كتر الغرق عطشان
فبلاش تفكر كل ماء يرويك
واياك تفكر كل حضن شاريك
فكرت يوميا ف كل الناس
ونسيت تفكر ف الي فكر فيك
في اللي مساحة اسمها ارشيف
كل الاغاني والصور والذكريات
كل الحاجات بتطل وكل المرتاحين نامين
هتمر جنبك لحظة تسوي ساعات
انا كتفي ممكن تلمسه يشوك غياب
انا قلبي ممكن تعصروا ينزل بنات
لكن لسوء الحظ او حسنه
ما بقتش غارف انسي دي بالذات
كانها كوردات عمر خيرت
ريحة الشوارع وقت فجرية
كل البنات هي وهي البنات كلهم
وانت الي بتروحلهم ما بيطلعوش هي
طيب ايه يا عم الشتا
انا تحت عيني اتهري من كتر ما حنيت
فكرت فيها ضحكت ..ضحكت فجأة بكيت
ليه الشوارع كلهم قاصدين
يفكروني باللي مش فاضلين ؟
والقهوة كرسي الاعتراف بالذنب
تشرب تقول كل الي سابك مين
ليه الشتا والبحر اتنين صحاب انتيم
طب ليه ف كل البلوكونات حكايات
فتحت عيني جدي غمذ مات
وكبرت بيتنا لم عفشه وهج
والدي ماحاجش بس شوفته يا حاج
وايديه ف خدي ختم نسر كبير
امي اللي شيلت ف حضنها جناحات
وبقيت في طيبة كل حضن باطير
وصحابي دفتر خدت صفحة ف مطلعه
منهم تلاتة توأمين وضمير
شكرا لان الشتا عرانا مافضحناش
شكرا لان الذكريات مماتتش
اكبر دليل عندك انا
انا هو منستش
شكرا ل بلة طين في ديل التوب
شكرا لمطرة تبلنا ننشف
تعرف ياعم الشتا ولا بلاش تعرف
في مثل هذا الوقت ف كل عام بيفوت
باحيا واموت مرات في كل ما احيا باموت
وعملت منك ذكريات وحنين
والقهوة سادة ووشها مظبوط
وعملت عالم من خيال الوان
وعملت صورة بالف حس وصوت
وفتحت صدري للغياب شبابيك
دخل الحمام عشش وصارله بيوت
لا البنت راجعة ولا الكلام يكفيك
زلا ضحكي باكي ولا العياط مبسوط
