السلام عليكم...شلونكم احوالكم... نشاء الله بخير...
اذا مو الك اكتب مااحس بشوك
واني على مودك اكتب بشعري.....
جربتك اهواي وشفتك اوفه الناس
يااول حبيب تحملت قهري.....
تسالني بحياتي شكد تمر اشكال
ليش انت الوحيد الساكن بفكري...
وتسالني بحياتي شبيها من اهموم
ليش اني من اشوفك ينطفي جمري....
يااول محطه قلبي بيها ارتاح
يانهر الحنان وبالقلب تجري.......
...........
بغرامك دوم خليني ...وخليك
أبد للدوم ماعوفك ....وخليك
اريد افتح جفن عيني..وخليك
وشوفن بيك ونته تشوف بيه
..........
ذبل ورد المحنة ومات بيه الشوگ
تمنـيـتك گــبل مـو هسة تلگـيـني
جـوعـانة السنين ويـوم ياكـل يوم
عصرن ماي عمري وشربن اسنيني
وجفت وجهي الملامح والفرح مغتاض
وأجة خـيط الصــبر يم نـار سچـيني
واكل عيني السهروكمت ما أحلم بيك
ولا طـارش وصـل مـنك يـواسـيـنـي
قـفل بابـه الگـلب لا لا تمـر خطـار
انطفى ليل الشمع وغمض جفن عيني
ومشيت بلاية خطوة وروحي تنضح خوف
وعـثـرت بـذكـريـاتـك باقـية اسنيني
چنت مثل السطح مكشوف كلي وياك
ظـنيــتـك سـمـة وتـفــهـم مضـامـيـني
..........
الشعر اليوم لجنتي وحبيبتي رحمها الله
گوميلي ييمه وداعتچ تعبان
بس بشوفچ ابره وتبتسم عيني
بس انتي الوحيده القادره بهالكون
بتراب الچفن يحبيبه تشريني
اسمعيني ييمه وگومي اترجاچ
مامرجيه منچ هيچي تاذيني
گوميلي آنه جيتچ ماأريد اعذار
طشرني الوكت يايمه لميني
معذوره ياامي وادري ملك الموت
مايعرف رحم لافرصه ينطيني
اخذ مني الحبيبه الحتى رب الكون
ضل طول العمر بيها يوصيني
اعذرچ والله يمه وماعليچ قصور
لوما باللحد چا والله شلتيني
احبچ وابقى احبچ لآخر الانفاس
چي من نور وجهچ كملت ديني...
كل عام وانت برحمة رب العزة والجلال ...
كل عام وانت بجنان الخلد والنعيم ...
كل عام وانت من الملبين الطائفين حول عرش الرب الكريم ....
لامواتنا وامواتكم رحم الله من قرأءه سورة الفاتحه
مسبوقه بالصلاة على محمد وال محمد........
في أمان الله
