رواية "ساكت و كنشوف" مقتبسة ( أنتيخريستوش بالدارجة)

الحلقة الأولى 🤞

ساكت و نشوف، هاكا كعيطو ليا خوتي و حتا تريكة الشياطين لي ساكنين حدانا.
اوا نعرفكم براسي، معاكم ساكت و كنشوف انا جن عقلت على راسي و انا في هاد الارض قبل من الديناصورات، في عمري دابا 7031 سنة، فيا 33.5 ميترو، معنديش الشعر، و هادشي لي معقدني حيت خوتي عندهم و انا لا، ولكن انا عندي ربعة العينين و هادشي لي معندهمش، بعض الاساطير كگولو انا كنشبه لجدنا التاني لي كان حاكم ما تحت الارض، و هادشي كان كخليني نفرح فاش كنسمعو، نكمل ليكم عليا، في اللباس ديالي كنلبس قشابة كنصاوبها من وراق النخل و ناري و تشوفو معناتي معاها ديما النحل تا بعني حيت فيها العسل 😅.

انا مكنهدرش بزاف أو مكنهدرش گاع، غا ساكت و كنشوف و كعجبني نسرح  ماشي نسرح نعاج ههه لا كعجبني انا لي نسرح، كنشد طريق الغابة و نبقا غادي فينما داوني رجلي، كنبقا غادي و كنتأمل في الطبيعة غا بوحدي، كنبقا حاضي نمل كفاش كعيش و كفاش كجمع المونة ديال العام، كنطلع للشجر و كنبقا حاضي الطيور كفاش تا كتفيق في صباح و كتبدا تغرد و تصفر و كفاش كطير و تلعب من شجرة لشجرة حتا كطيح الشمس و دخل لعشها.
و بعد المرات كنبقا حاضي القمر مني ككون هلال حتا ككمل و يولي قمر، في قبيلتنا كان عدنا عيد سميتو مكامل كحتافلو فيه بالقمر فاش ككمل، انا مكنحتافلش معاهم كنطلع للجبل و نبقا نتأمل في القمر و هو كامل مكمول، و النجوم لي كتكون دايرا بيه و كتلمع هادوك النجوم في قبيلتنا كرمزو لينا حنا، و فاش كطيح شي نجمة لغد ليه كموت شي واحد و انا لي كنت مكلف مني كطيح شي نجمة كنمشي للقبيلة و نبرح بيها.
وبعد المرات كنبقا حاضي الغيوم كفاش كتجي من بعيد و كدوز من فوقي و كتمشي و تلاشى.

هادي هي حياتي كلها غير سكات و تأمل.

حتا لواحد نهار جاو كائنات لعالمنا جاو و ستعمرو أراضيني صافي ولاو هوما الاصل ديال الارض، غادي يكونو هوما لي كتسنطو ليا دابا أو هوما لي كتبو قصتي،  جاو بصداعهم هاد الكائنات هوما بني أدم ولا الإنسان كيف كسميو راسهم، صغار و ضعاف و عمرهم محدود و مع دلك مكحشموش، فاش جاو مقديناش عليهم و كلشي بينا رحل و خلينا ليهم كلشي انا بقيت كنتلاوحه وكل مرة فين عايش. و ليت كل مرة عايش مع وحدين كندخل لديورهم  و كنعيش معاهم أغلب أوقاتي كنگلس في البلايص الخاوين لي مكعمروهمش و بعد المرات كنطلع لقنت السقف و نبقا خاضيهم ( 🔔صوت ضحكة شريرة)، و بعد المرات كندخل لبيت الشقا و نبقا حاضي العيالات والبنات كطيبو كان طيابهم بنين بزاف حسن من ديال الواليدة،
بقيت هكا كل مرة عايش من وحدين حتا تلفت على عائلتي و نسيتهم گاااع.

من النمل و الطيور و القمر و الغيوم تخليت على هادشي ووليت حاضي هاد بني أدم، دخلو قلبو ليا حياتي.

واحد النهار كنت غادي في الغابة و داوني رجلي لواحد القرية سميتها بابل, ( 🔔صوت الطبيعة فراخ و طيور + صوت الماء) لي عجبني فيها هي الطبيعة الزوينة، و فيها واحد الواد كبير و الما ديالو صافي عجبني الحال تما، بقيت كنعمر بزاف في هاداك الواد، وكان واحد الراجل ديما كجيب نعجياتو كانو عندو تلاتة و زوج ماعز و كلب،
وحيد عايش في واحد العشة في جنب الواد بوحدو صارحة رتاحيت ليه بزاف كل صباح كنبقا نتسناه يخرج باش يونسني واخا هو مكشفوني ما كسمعني ولكن انا حاس بلي كحس بيا، هاد الراجل كانو كقولو ليه إيشما و انا كنقول ليه عمو إيشما كنحتارمو بزاف حيت كبير في العمر و عزيز عليا.
عمو إيشما كان فاش كجي لجنب الواد باش يسرح نعجاتو كجيب معاه گفة فيها الماكلة باش يدوز النهار و داكشي عندو على قد الحال ماشي بحال العائلات لي كنت كنسكن عندهم كياكل اللحم غير في المواسم لي كدارو في القرية و مرة مرة فاش كبيع الحليب كشري فروح و يدبحو صارحة نهار لي كبدح فيه ككون عندي عيد حيد كاع هاداك الدم كنشربو بوحدي ككون حسن من دم الحيوانات لي كنصيد.
عمو إيشما ديما فاش ككون في جنب الواد فاش كسهن عليه الحال كهبط ليه باش يبرد.
و كخلي الگفة في جنب الشجر، واحد الوقيتة كجي الحمام للگفة كحط عليها و يطير تاني كنبقا حاضيه بعيني حتا كحط في واحد الجنان مبعيدش بزاف خاوي فيه غا شجر و الحجر، و كعاود يرجع تاني للگفة و يمشي لنفس البلاصة، عمو إيشما لاحظ هادشي و طلع من واد و مشا قاصد هاداك الجنان تبعتو حيت تا انا درني راسي و بغيت نعرف أشنوكاين تما، دخلنا كنشوفو الحمام كتير مجموع في وسط الساحة على شي حاجة، قربنا كتر طار الحمام ( 🔔 صوت رفرفة الحمام) بقا لوسط واحد الزيف وسطو شي حاجة قربنا كتر حتا تصدمنا، كنشوفو و كنگولو واش بصح هادشي لي كنشوفو.  كانت بنيتة صغيرة زوينة بزاف و ضحكتها ساحرة ( 🔔 صوت ضحك طفلة) هي كضحك و انا كنقز غا بوحدي ههههه و حتا الحمام غير كضحك كبدا يرفرف بجناحو حتا هو فرحان بيها، عمو إيشما بقا مصدوم كفاش بنيتة في هاد الجمال وهاد العمر بوحدها وسط الخلا كون مكان الحمام لي حماها كون كلاوها الكلاب و الدياب، هزها و داها لعندو. في طريق الرجعة مبغاش يفرقنا الحمام بقا تابعنا تاوصلنا للعشة ديال عمو  إيشما.
دْخل حطها و خرج باش يدخل النعاج، و انا مقديتش نبعد عيني عليها و دخلت للعشة و كانت أول مرة ندخل ليها مضيقة بزاف فيها بيت واحد فين كنعس و فيها واحد المساحة صغيرة كطيب فيها مسكين عمو إيشما عايش في قفز، واخا داكشي مضيق دخلت و صبرت طلقعت للسقف كيف عادتي، طاح الليل عمو إيشما شعل شمعة و مشا يطيب الحليب باش يرضعها، وانا فوق السقف كنشوف فيها و نتأمل في عينيها لي كلمعو و خدودها الحمرين، و شعرها الحريري، كانت بحال الملاك.
عمو إيشما جاب ليها الحليب و رضعها كانت جيعانة بزاف مسكينة كتشرب بجهد كملات إترو ديال الحليب و نعسات.
غطاها، و گلس حداها و بدا كهدر بوحدو و الدمعة في عينيه:
غادي نسميك سميراميس، (🔔موسيقى درامية) معرفتش كفاش سخاو بك وعطاتهم خاطرهم يلوحوك و نتي هاكا صغيرة بزاف و ضعيفة، كفاش حتا بنت في الجمال و البراءة ديالك عطاهم قلبهم يتخلاو عليك، إيييه مابقا ما يعجب فاش تشوف أم لي معروفة بالحب و الحنان كتلوح كبدتها لخلى بلا رحمة ولا شفقة أش بقا ما يعجب في هاد الدنيا، تفكرت غير قصتي انا لي مني عقلت على راسي و انا بوحدي لا أم ولا أب، لا حنان ولا عطف، كبرت وسط عائلة متكونة من جد و جدة كبار في العمر همهم الوحيد هو تكابل ليهم غير النعاج و البگر و تسرحهم من صباح حتا ليل، و تجي بالليل متلقا ما تاكل و تصبر حتا لصبح باس تاكل من الأراضي لي مزروعة، و في الاخير تكمل حياتك غا بوحدك من جديد ما درت أسرتي تا انا وما ولدت ولادت لي يهزوني مني نكبر اوا كبرت وحيد و كملت حياتي وحيد و غنموت وحيد، اوا انا كبرت في العمر و الموت طلات عليا صعيب عليا نشدك عندي و نربيك صعيب نوفر لك لي ناقصك من حنان و عيشة مزيانة غادي غير نكرفصك معايا و تعيشي حياة فراغ كيف عشتها انا و انا مبغيتش لك هادشي، غدا غادي  نديك للسوق و نبيعك أحسن لك من العيشة معايا.((((🔕))))

عمو إيشما كهدر و كبكي و انا طاح عليا الضيم كتر منو، (🔔موسيقى حزينة)، تفكرت عائلتي و خوتي، و جيراني، تفكرت الخصومة و الصداع لي ديما نايض بين خوتي، تفكرت الوليدة لي مني كتونض تفك كضربهم توضرهم، و الوليد لي كنشوفو مرة في نهار فاش كبغي ياكل، و تفكرت راسي انا لي ديما مخشي في قنت البيت و كنتأمل في في عائلتي و صداعهم، توحشتهم بزاف😣(((((🔕)))).

تزمت الحال هنا غادي نخرج يضربني شوية البرد و نعاود ليكم على السوق لي غادي يبيع فيه عمو إيشما سميراميس، يله زيدو نخرجو. (((صمت)) 123456

(🔔صوت البرد و الرياح مع صوت بوفرططو و نار)
وااااه على بريد ضارب، تخنقت في هاداك القفز، عمو إيشما صارع البلان بهاد العافية لي شاعل هنا،  نمشي نتسرح حداها123   تفكرت أيامي لي كنت كنتسرح بحال هاكا في راس الجبل و نگابل القمر، شحال توشحت هادوك الايام، القمر ليوم كمل غتكون قبيلتي گالسين يحتافلو و انا هنا وحييييد بحال عمو إيشما،
أجي فين خليناها 123, أه عقلت، عمو أيشما بغا يبيع سميراميس و بلاتي نگول ليكم أش كتعني هاد السمية عندهم هنا بابل، إلى كان عقلي ينفعني هاد السمية كتعني محبوبة الحمام، حيت لغة ديالهم باش كانو كهدرو كنظن مغتكونش بحال لغتكم نتوما لي كتسمعو للقصة دابا.

مهم نكملو، سوق لي غادي يمشي ليه عمو إيشما غدا باش يبيعها،  سميتو سوق نينوى هاد السوق هو موسمي يعني كعمر من العام العام معرفتش واش هاد العادة غتعرفوها تقدر متكونش عندكم، ما علينا، هاد السوق كجيو ليه غا شكون و شكون، و المراد من السوق هو ان كل عازب يختار شريكة حياتو منو، كانو البنات و الشباب كتزينو و يحلقو على الحالة و يمشيو يقلبو على رزقهم تما، و كان كتباع فيه الاتات الغالي و الخيل و السلاح ( بحال السيوفة و أسهم الرماية) و كجيو ليه حتا العائلة الملكية و الخدم الملكي كان سوق عااالمي،
عمو إيشما عندو زهر مني هاد السوق غادي يعمر غدا من الاحسن يدي البنت تما و لا تبقا تكرفص معاه.

واخا بقا فيا الحال من جيهتها معرفتش علاش، اوا انا غير جنين مكنبان لحد مكعرفني حد يكفي نبقا غا كنشوف و ساكت.(🔔 صوت رياح)

سسسس تحرك البرد هنا، و الليل تناص، خاصني نوض نعس غدا تابعنا طريق لهاداك السوق، و نقدر غدا نبدل الحطة من هنا (🔕).

خليتكم على خير.