منتدى فتيات الجزائر

اكثر المواقف المضحكة والمحرجة التي تعرضت لها

المهم حاولو تحبسو الضحكة تاعكم اذا كنتو من جماعة نص ليل وحاولو ما تموتوش من الضحك وتخليوني وحدي 😽المهم نبداو على بركة الله
الموقف رقم ١
هاذا صرالي كي كنت في السنة الخامسة ابتدائي يعني عامين قبل الآن
المهم كنت ماشية انا وزوج صحاباتي في رحمة ربي من القسم نتاعنا كنا نمشيو حتى وصلنا للقسم اللي قدامو الدروج وقدام هذاك القسم كان واقف عمي بابا استاذ مع وحد الاستاذة ام طفل يقرا معايا المهم انا جيت هابطة قد قد ونطيح طيحة تاع كلاب في الدرجة الأولى ومن الضحك بزاف والاحراج غطيت وجهي وماقدرتش نتحرك صحاباتي والاساتذة خلعو جا  عمي وبدا يحرك فيا ومبعد كي نحيت يدي على وجهي بان وجهي حمر حمر واش نقولكم والدموع تاع الضحك يهبطو وانا نضحك واش نقوللكم زدت شفت وجوههم الملونة زدت طرطقت بالضحك مليح المهم جبتها نهار كومبلي وانا نضحك
الموقف رقم2
هاذا صرالي كي كنت في الأولى متوسط جيت مروحة من المدرسة المهم انا وزوج صحاباتي لانتيم اللي نحبهم بزاااف 😜😍وتحية ليكم اذا راكم تتفرجو فيا المهم نمشيو ونضحكو وانا كارتابلي ثقيل يقتل وفي هاذاك النهار قاعدة نحكيلهم باللي الطبيب قاللي ظهرك تعوج يعني العمود الفقري مال شوية برك المهم انا نمشي ونضحك معاهم حتى نتعكل ما نعرف كيفاه ونطيح على وجهي مزية ما جاش وجهي في الارض وطحت قدام وحد العتبة تاع باب ماعلاباليش تاع شكون المهم انا نطيح قدقد والراجل يحل الباب يلقاني طايحة قدامو 🤣😂المهم من شدة الاحراج والضحك عييت نوظ قعدت نضحك وصحاباتي مساحت
ن يضحكو ضحك هستيري ومبعدا عاونوني نضت قاتلي صاحبتي بتول راي عندها واتباد تابعوها حتاهي راهي دير قصص ملاح المهم قاتلي هاذ الخطرة يتكسر عمودك الفقري موش يتعوج برك وحنا نضحكو نضحكو ومبعدا درنا ڨدڨد نلقاو وحد الكلب كحل ڨد عزرين وانا كون هشوف كلب نموت في جلدي المهم هو ينبح ينبح وصاحبتي بتول تطلقها صفارة ⁦🏃🏼‍♀️⁩
تخبات ورا واحد الحيط كاعاد هي خفيفة ودير كاراتي ربي يبارك قاعدة منهيه وتتفرج وفاسخة بالضحك علينا وانا ونهاد صاحبتي الثانية ڨاعدين نظورو على بعضانا والكلب بغا ياكلنا وانا نعيط بوحد الصوت يبان جعير الابقار وبتول منهيه فاسخة ضحك ونهاد مسكينة خايفة وتضحك من هول الموقف المهم ندورو علابعضانا حتا تعملت انا على رجل صاحبتي نها وطحت في الارض مبعدا جا مول الكلب داه وراح وانا مازلت في الارض قشي مبهدل والخيمار معوق واش نقولكم مبعد جات بتول وهي مش قادرة تمشي من الضحك عاونتني نضت ومبعدا حنا نمشيو وفاسخين ضحك مبعدا دارتليةبتول هما :سمعتي اسم الكلب
قلبتلها لا لا ياربي نسمع صوت عياطي وبدينا نضحكو قاتلي راني سمعت مول الكلب يقولو هيا هيا يا قصي
انا درت عندها قلتلها سبحان الله العظيم نتي عندك بارابول واللا وذنين تسما انا نعيط وهاذي تضحك (على نهاد)ونتي سمعتي اسم الكلب سبحان الله انا كملت هدرتي يابعد هوما ناضو يضحكو هههههه
الموقف رقم3
هاذا صرالي السنة في السنة الثانية متوسط و لأنو كورونا تاع الهم جات فرقو الاقسام وكان التقسيم مأساة حقيقية صح طحت معا صحاباتي نهاد وهديل في نفس القسم بصح بتول في القسم المجاور المهم حنا نهار مدولنا الكتي كنت هازتهم في يدي ومروحة انا وصاحبتي نهاد وبتول ما خرجتش عندها حصة اضافية روحت انا ونهاد صاحبتي وكي وصلت لدارها قاتلي ربي يصبرك قتلها آمين ومبعدا انا ماشية وحدي وكنت تعبانة ميتة وانا داري بعبديدة بزااف وبتول اللي تسكن قريب ليا مازالت تقرا المهم انا نمشي نمشي نمشي حتا وصلت وحد البلاصة في الطروطوار نلقا فيها وحد الرمل هكا يزلق انا عفست في قدقد ونجي طايحة في الارض ومش اي طيحة طحت قدام استاذة الفيزياء اللي كانت مروحة من نفس الطريق وكي طحت طحت وانا مربعة رجليا والكارتابل ورايا والكتب قدامي موزعين نبان راني نبيع فيهم المهم نضت وانا نضحك وننفض في قشي والكمامة تعوجتلي والخيمار تڨلب وما حسيتش بيه 😂المهم وانا نمشي والعبد اللي نفوت عليه يشوف معايا ويضحك المهم وصلت لواحد الرود في باتنة يوصل للاري آش فيه السياغ بنات باتنة اكل تعرفوه علابالي المهم انا مروحة من عميروش وصلت لهاذاك الرود شفت في وحد المراية تاع واحد السايغي ونلقى خيماري مقلب المساك في جبهتي الخيمار مقلب زربت عدلتو وكملت طريقي😘
الموقف الأخير
كنت مروحة انا وبتول عندها ياربي يومين وللا ماعلاباليش قداه نمشي انا وياها ونهاد معانا وانا نقوللهم راني حاسة بللي راح نطيح غير عسوني
المهم كملنا طريقنا وما طحتش حتا وصلن دار نهاد هيا راحت وكملت انا وصاحبتي بتول حتى كنا نمشيةو وصلنا الابتدائيه تاع فاطمة بن عاشوراء نمشي كنت نمشي في الطريق انا بغيت نطلع للرصيف وننلق نطيح وبتول لابسة كمامة حمرا ووجهها حمر وانا تبالي فيها نحات الكمامة كاعاد كنت في الارض ووحد المرا كانت تمشي وراني فاسخة ضحك المهم نضت وانا ميتة بالضحك انا وصاحبتي بتول
وهاذا ماكان من المواقف اللي تعرضت ليهم وبلييز ديرو تصويت