_ ها يا بنتي قررتي هتقابلي صاحبتك فين ؟! كل دا و لسة مالقتوش مكان؟!
أرتشفت رشفة صغيرة من مشروبها المفضلة، لتجيب على سؤال شقيقتها و هى تعبث بشعر معاذ:
_ اه لقينا مكتبة حلوة اوي و فيه قاعدة لطيفة جدًا هنتقابل هناك.
استفسرت منها شقيقتها بفضول:
_ فين و هتروحي الساعة كام و هترجعي الساعة كام ها؟!
ضحكت من اسئلة شقيقتها الكثيرة، فشقيقتها فضولية من الدرجة الأولى:
_ حيلك حيلك، المكان فين .. هو في شارع جابر بن حيان ، و هنروح أمتى .. على الساعة 5 كدا ، و هرجع أمتى ممكن على 9 مثلًا .
تدخل معاذ في الحديث، يتسائل و هو يلهو :
_ ليه اسم الشارع جابر بن حيان و ماسمهوش معاذ بن مصطفى؟! .
تعالت ضحكات والدته و شقيقتها عليه، لتجيب عليه والدته بتهكم:
_ و هيسموا الشارع باسمك ليه يا حسرة، دا انت بتجمع بالعافية.
هبَّ معاذ متخصرًا ، قائلاً مدافع عن نفسه:
_ لا بعرف أجمع كويس اووي و بطرح كمان، و يعني هما سموا الشارع على اسمه علشان بيعرف يجمع بس؟!
تشدقت والدته من سخافته، لتقول و هى تخرج من الغرفة:
_ خالتك هتحكيلك هما ليه سموا الشارع على اسمه، و انا هروح أحضر الغدا قبل ما أبوك يجيي.
نظر الى خالته بإهتمام ينتظر منها الإجابة على سؤاله، لتتنهد هى قبل ان تسرد كل ما في جعبتها:
_ بص يا سيدي جابر بن حيان دا كان عالم مسلم كبير أوي، كان بيبحث في حاجات كتير زي الكيمياء و الطب و الفلك و الهندسة و الصيدلة، فيه ناس بتقول انه مولود في الكوفة و ناس بتقول انه مولود في حران، والده هاجر الى اليمن و كان بيشتغل صيدلي، و دا من الأسباب اللي خلت عند جابر حب معرفة الكيمياء بسبب والده، و هو برع في الكيمياء جدًا، في الوقت دا كانت الكيمياء بتتبني على أساطير و حاجات كلها وهمية زي ان المعادن كلها أصلها تراب، ماء، نار، و هواء، بس طبعًا الكلام دا كان غلط، بس جابر كان زيه زي بعض العلماء العرب اللي تأثروا بنظرية العناصر الأربعة التي ورثوها من اليونان.لكنه هو و أبو بكر الرازي عملوا دراسات علمية دقيقة ليها؛ و كانت النتيجة انهم دخلوا العلوم التجريبية، في محاولة معرفة مدى صحة نظرية العناصر الأربعة ساعدت علماء العرب والمسلمين في التعرف على عدد كبير جداً من المواد الكيماوية، و برضو ساعدتهم انهم يعرفوا بعض التفاعلات الكيمائية، و يرجع الفضل لكل المخترعات اللي بنشوفها دلوقتي للعلماء المسلمين اللي منهم طبعًا جابر بن حيان.
أخذت رشفة أخرى صغيرة من مشروبها لتستأنف حديثها قائلة:
_ من كتر ما هو كان بارع في الكيمياء أخد لقب " ابو الكيمياء" ، ابن خلدون اتكلم عليه في مقدمته لما كان بيتكلم عن علم الكيمياء فقال: «إمام المدونين جابر بن حيّان حتى إنهم يخصونها به فيسمونها علم جابر وله فيها سبعون رسالة كلها شبيهة بالألغاز»، و قال عنه أبو بكر الرازي في «سر الأسرار» :«جابر من أعلام العرب العباقرة وأول رائد للكيمياء»، و كتاب كتير جدًا غربيين أشارو انه من العلماء اللي مش ممكن يتكرروا.
سأله معاذ بإنبهار مما يسمعه:
_واو! الراجل دا شاطر جدًا، طب هما عرفوا منين انه شاطر كدا؟!
عبثت بشعره مرة أخرى و هى تجاوب:
_ من كتبه و مؤلفاته، هو ألف كتب كتيرة جدًا من أشهرهم: كتاب "الكيمياء الجابرية" و كتاب "الخواص" و كتاب "أسرار الكيمياء" و كتب تانية كتير ، ها عرفت هما ليه سموا الشارع على اسمه!
أومأ لها بالإيجاب، لتقول و هى تهم بالخروج من الغرفة :
_ يا دوب ألحق أنزل علشان اروح لصاحبتي.
إبتسم لها معاذ ببرائة :
_ خالتو ممكن أخرج معاكي؟!.
قبلته على جبهته، و هى تمسح على رأسه بحنان، قائلة:
_ الأسبوع اللي جاي هخدك و نخرج انا و انت، لكن الأسبوع دا مش هينفع، اتفقنا؟!
هز رأسه لها بالموافقة، لتخرج هى من المنزل مودعة شقيقتها، و هى تخطط في ذهنها لنزهتها المنتظرة.
المصادر في اول تعليق👇👇
أنت تقرأ
على مر العصور
Historical Fictionالتاريخ بيعيد نفسه و كذلك التجارب، مش بس التجارب الناجحة كمان التجارب الفاشلة ممكن تلهمنا للنجاح. إسكريبتات قصيرة لعدة شخصيات ملهمة.
