اما ليلى دي زي م عارفين يوسف بحبها و بحبها بجد من م كانو صغار و هي بتحب احمد برضو من م كانو صغار و يوسف عارف انو احمد م بحبها و انو زول بتاع لعب م اكتر... يوسف م قدر اصارح ليلى بي مشاعرو لانو كانت بتعتبرو اخوها و صاحبها الشديد و ودخالتا م اكتر غير انو احمد م شايفا اصلااااا و هو عارف و متأكد انو هي بتحبو..
دايما كان بزعلا و احرجها و طبعا يوسف كان بطبطب عليها و بقيف جمبها و بهديها يعني كان ملجأها الوحيد و بتحكي ليه اي شي على اساس انو حيفهما لانو اخوهو و دايما يوسف بحزرها من أحمد و هي م كانت بتشتغل بيه..
و طبعا هي م مقصرة جارية وراه و تقعد تتمسكن و تتخافف و احمد كان شايفا يعني بت تافهة م اكتر يلعب بيها يوم يومين و ينساها بس لمن عرف يوسف بحبها قال لازم بس كدا يقهرو و يغيظو يعني كانو بس م اخوهو كأنو العدو بتاعو و لمن وافق و قال حيتقدم ليلى قايلاه بحبها و هي م عارفة اي شي..
ليلى يعني ماشاءالله الطول و الجسم و الشعر و اللون والروقة و اللبس يعني كدا بت سمحة شديد النصيحة ليه حق يوسف يحبها لكن شخصيتها م على قدر كدا زي م بقولو من برة هلّا هلّا و من جوة يعلم الله يعني أنانية و مصلحجية و م بتحب غير نفسها و خسيسة و بتاعة ناسات يعني يوم مع د و يوم مع داك...
يوسف دخل اوضتو و خاطرو مكسور قعد في السرير و هو بتزكر في كلام ليلى مسح العرق الفي جبهتو و قلع القميص قام و ختاه على حافة الكنبة و اتجه على السرير و رما نفسو و نام.
-في جانب تاني -
ليلى:تتخيلي بس ي امي؟
هدى:والله لو بتسمعي كلامي؟ اخير ليك يوسف والله احلى من أحمد زاتو و ود واعي كمان و بحبك و بريدك لكن احمد! م عارفة م اظن يحبك ي ليلى.
ليلى:اميي انا م عاوزة غير أحمد فاهمة ولا لا؟ لو م بحبني م كان أتقدم لي و تقفلي السيرة خلاص.
هدى:هي ها قصري حسك د ي بت جنيتي؟ قايلاني يوسف ولا شنو قومي غسلي العدة دي عدة التهردك انشاءالله قال بحبني قال حبك برص انتي.
ليلى:متين اعرس وارتاح من البيت و عدتو دي ياخ..
هدى:و يعني في بيت راجلك م بتغسليها؟
ليلى:احمد حيجيب لي شغالة ي امي انا ايدي دي م بتهبش موية بعدا.
هدى:وأولادك المن بطنك ديل اها حتجيبي ليهم مربية؟ بنات آخر الزمن قومي خلي الكلام الكتير.
ليلى:قايمة قاايمة..
-في جانب تاني -
حياة:غايتو الشغل د م مقتنعة بيه انا.
انا:امي امي جنيتي؟ دي بتديني يوميتي في أيدي طوالي و اليومية بي 1000 اذا انا مرتبي كلو الف في الشهر!
حياة:طز في القروش ي بت تشتغلي خدامة ليه؟
انا:مالا؟ عيب ولا حرام؟ امي انا مرتاحة في الشغل د انتي م تشيلي هم.
حياة:والله م عندي طاقة زاتو اتكلم.
انا:دواكي خلص مش؟
حياة:اي.
انا:خلاص بكرة بي الصباح بنزل اشتريه ليك.
حياة:عملتي شنو مع معز؟
انا:ولا شي بس قلت ليه بينا المحاكم.
حياة:هي ي شجن انا مش قلت ليكي انسي؟ مش قلت ليكي شيلي الموضوع د من راسك؟ و كمان مشيتي قلتي ليه؟ شاطرة ي بتي شاطرة واصلي في البتعملي فيه د لحدي م يرمينا في الشارع!
انا:امي اهدي م تعصبي ،م بتستحملي انتي !و م تخافي اصلا م اشتغل بي كلامي قايلني بخوف فيه لكن م عارفو جد.
حياة:قلبي د قابضني ي شجن و حاسة انو في شي م طبيعي و حاسة بي شي حيحصل و انا احساسي عمرو م كان غلط حاسبي ي بتي و انتبهي من معز د الزول د م هين.
قامت و دخلت الأوضة و بقيت قاعدة براي:امي والله م اسكت الا اجيب ليك حقك د لحدي عندك و اعيشكم احسن عيشة!
-صباح اليوم التاني
في نفس الصفرة
رشا:طارق تفضي روحك عشان بعد بكرة انشاءالله حنتقدم لي ليلى.
طارق:و قررتو و م كلمتوني والله لكن!
احمد:ابوي انا الاصريت عليها.
يوسف:ليه بتلعب بي البت؟
رشا:ي ود جنيت؟
يوسف:م حرام تعشما و توهما؟ و بعد كم شهر تخليها؟
احمد:و منو القاليك اني م بحبها؟
يوسف:لانو اخوي و عارفك!
احمد:انت قول بس..
طارق:الله! بتتشاكلو قدامي؟ ماف احترام خلاص؟ و انت ي أحمد حتلعب بي بنت الناس؟ اخير م نمشي و تفضحنا.
احمد:طبعا م لازم م انا الشافع و القليل الادب و م بعرف احب.
يوسف:م تطلع نفسك انت الضحية زي كل مرة ي أحمد قبل م تكون مرتك دي بت خالتك يعني اختك م تكسر قلبها لانو م حترضى د يحصل لي علا.
ساب الاكل و قام و هو زهجان و عروقو خلاص ظهرت و عيونو حمرت ركب العربية و في أقل من 5 دقايق وصل المكتب..
يوسف:سجود و ابراهيم تعالو لي المكتب.
سجود:الليلة م عاجبني زهجان شديد!
ابراهيم:قومي قومي نشوفو.
يوسف:جانا شغل جديد.
ابراهيم:كويس والله كنت قايل حنقفل الشغل و نقعد🤣.
يوسف:م وقت هظارك.
ابراهيم رفع ايدينو و قال:متأسفين ي باش مهندس.
سجود:وين وحنبدا متين و حينزل الموقع منو؟
يوسف:مدرسة.
ابراهيم:اها؟
يوسف:ركزو معاي لاني م حعيد الكلام عاوزين نغير واجهة المدرسة د حتشتغلها سجود.
سجود:اوكي.
يوسف:الكهربا حنفكها و نعمل ليها توصيلات من اول و جديد.
ابراهيم:و دي طبعا انا.
يوسف:اما ديكورات الفصول و المكاتب حعملا انا عشان استاذ احمد قال م عاوز شغل
ابراهيم:الحينزل الموقع مع العمال منو؟
يوسف:انا +الاجتماع خلص!
سجود طلعت و فضل ابراهيم قاعد و بعاين لي يوسف:مالك؟
ابراهيم:انت المالك؟!
يوسف:م فيني شي.
ابراهيم:ليلى؟.... يوسف سكت و مسح وشو.
ابراهيم:احكي.
يوسف:بكرة احمد حيتقدم لي ليلى.
ابراهيم:و انت كنت متوقع شنو غير كدا؟ انت عارف احمد.
يوسف:معقولة؟ معقولة في اخو بكره اخوهو للدرجة دي؟
ابراهيم:القصة م قصة كره بالعكس بحبك و شديد كمان بس انتو في حاجز بيناتكم حاجز كبير كمان كلو حقد و غيرة و غل.
يوسف:ا...
ابراهيم قاطعو:كان منك ولا منو + و الغلط ابدا م منكم من الربوكم معليش يعني احترامي لي الوالد و الوالدة بس هم غلطو غلطة كبيرة شديد.
يوسف:ابراهيم انا م عارف اعمل شنو انا حاسي بروحي مخنوق قلت امشي اقوليها أمكن قلبي يبرد لكن اتحرق زيادة انا م عارف أشرح ليك كيف ي إبراهيم.
ابراهيم:حاسي بيك عادي م ايهي سجود بتحب واحد تاني و انا بحبها!
يوسف:اوعك تقوليها حتكسرك و تخزلك على الاقل عيش بي الأمل الجواك.
ابراهيم:اسمعني عاوز اقوليك حاجة وحدة بس انو الله م عمل الحاجة دي ساي اكيد وراها حكمة صح؟ و انو د م قدرك و انو هي م من نصيبك و انو هي م مكتوبة ليك انتو م لي بعض شوف ربنا حيعوضك ي يوسف و حتنسا ليلى دي ..حتقدر تتخطاها أمكن ربنا وراك الحقيقة عشان تبدأ حياتك و تعيشها تاني.. صدقني.
يوسف فضل ساكت و بعاين لي إبراهيم و هو بطلع من الباب و بقفلو وراهو رجع بي ضهرو على الكرسي و قال:حيجي في يوم و انساكي؟
-في جانب تاني-
ابراهيم:تشربي قهوة؟
سجود:لا شكرا.
ابراهيم:شاي طيب؟
سجود:لا لا تسلم.
ابراهيم:عصير.. بيبسي؟
ضحكت و عاينت ليه:بيبسي ممكن 😂.
ابراهيم:في محل بعمل بيبسي حلو حلا نمشي؟
سجود:😂😂طيب ارح.
ابراهيم مشا لي يوسف:اها ي مان نحن ماشين.
يوسف:تمام.
ابراهيم:حتقعد ولا كيف؟
يوسف:اي مطول شوية.
ابراهيم قفل الباب و طلع هو وسجود.
-في جانب تاني-
رانية:تاكلي فول ولا طعمية؟
انا:فول.
رانية:اها تشربي شنو؟
انا:اي شي.
رانية:لازم تتغذي ي بت و تسمني عان ضعيفة كيف.
سعيدة:عاد بنات الزمن ديل😂.
انا:والله كمان الايامات دي سمنت.
رانية:اها دي الحالة سمنت ي سعيدة😂😂.
سعيدة:عاد لكن ي بتي ضعيفووونة كدي م سمح.
انا:اخير لي هي 😂.
رانية:هي والله صدقتي عاد😂😂.
انا:خلصت شغل انا.
رانية:سريعة ماشاءالله.
.انا:الله م ضراك حببتي.
بعد اكلنا و اتونسنا و ضحكنا شلت يوميتي و لبست عبايتي و بقيت مارقة..
فتحت الباب لقيت ماف اي زول قاعد استغربت دخلت الأوضة لقيت امي بتتكلم في التلفون و موطية صوتا استغربت قلت امي دي مالا؟ سمعتها بتقول:تاني اوعك تضرب لي ي معفن ي باطل انت حسا راجل مع الرجال؟ ااا؟ قولي.. م عافية ليك نهائي م عافية ليك.
و انا مستغربة دخلت قلت ليها :بتتكلمي مع منو؟
حياة:هي انتي جيتي متين؟ ولا زول د معز د.
عاينت لي التلفون و رجعت عاينت ليها تاني :ايوااا.
حياة:اها الشغل الليلة كيف؟
قعدت في السرير و عاينت ليها:والله كويس.
حياة:خلاص انا امشي اعمل ليكي حاجة تأكليها.
انا:لا لا م جعانة ي امي داخلة انوم.
حياة:كويس حببتي ارتاحي.💕
#يتبع
