عشق الياس❤❤

الفصل التاسع عشر😍❤

الفصل التاسع عشر😍❤

اردفت خديجه بوجع:
_اتجوزها، بتبصلي كده ليه مفيش حل تاني غير ده، اتجوزها وكده يبقي ليك كل الحق انك تخلي بالك منها ومن عيالها، متنساش ان مصعب ضحي بنفسه واخد الرصاصه بدل خالد اخويا، علشان كده انا اللي بقولك اتجوزها يا شيخ الياس.

نظر لها الياس بصدمه من حديثها، عم الصمت لثواني قبل ان يهتف الياس بتهكم:
_لو كل واحده جوزها مات وأمني عليها هي وعيالها هتجوزها كحل للمشكله هتجوز كتير اوي كده، انتي هبله ياخديجه طب سؤال انتي هتستحملي اصلا اني اتجوز واحده تانيه عليكي؟

نفت خديجه ذلك بخجل،اردف الياس بعتاب:
_اومال ايه كلامك ده بقي ان شاء الله، خديجه الجواز مش لعبه ومش انا اللي اظلم واحده معايا لمجرد ان جوزها قبل ما يموت امني عليها هي وعيالها، انا عمري مهقدر اعدل بينك وبين اي ست، علشان انتي بس اللي قلبي ده بينبض بأسمك، انا مقدرش احضن ست غيرك انتي علشان حضني ده ملك ليكي انتي وبس ومش حضني بس انا كلي ملك ليكي ومقدرش ابقي في يوم ملك لغيرك، غير كده اصلا مين اللي قالك ياعبقريه ان مرات مصعب هتوافق، حبيبتي مصعب الله يرحمه كان بينه وبين مراته قصة عشق فوق الوصف هو كان حكالي عليها قبل كده، انتي اكيد اخدتي بالك دي جالها انهيار عصبي لما عرفت خبر موته، يعني استحاله توافق ولا انا هوافق فلو سمحتي يعني خلي حلولك العبقريه دي لنفسك، اتفضلي يلا قدامي علشان نروح نقعد معاها.

اومأت خديجه بسعاده لحديثه، سارت ببطي متشبثه بيديه كطفله لا تجد الامان الا بين ذرعي والدها، نظرت له بعشق لا يوصفه كلمات، نظر لها مبتسما عندما لاحظ انظارها هاتفا بمرح:
_انا عارف اني قمر بس مش للدرجادي يعني.

قهقهت خديجه بصوت منخفض هاتفه بصدق:
_ربنا ميحرمنيش منك ابدا.

هتف الياس بتساؤل:
_بس انتي ايه اللي خلاكي تقترحي الاقتراح ده؟!

ردت خديجه محاوله شرح ما جاء بعقلها:
_انا بس لما عرفت ان مصعب مات علشان يفدي خالد حسيت انه دين عليا فاهمني يعني حسيت اني لازم اعمل اي حاجه علشان اللي هو عمله ده لولاه كان زمان اخويا انا اللي مات، مجاش في بالي غير اني اقولك تتجوز مراته بس انا مقدرش اتحمل ده ابدا.

هتف الياس بهدوء:
_خديجه مصعب مات علشان عمره خلص، لو ربنا كان كتبله يعيش كان عاش، لكن ربنا كاتب انه يموت في المعاد ده، ده معاده حتي لو مكنش راح معانا كان هيموت، فداءه لخالد كان مجرد سبب لكن حتي لو مكنش فدي خالد كان هيموت لان ببساطه عمره خلص فهماني، اما بقي مرات مصعب وعياله فمن اليوم اللي مصعب امني عليها وهي بقت اختي وعياله بقوا عيالي وهشيلهم في عيوني لحد ما اروح لمصعب واقوله اني صونت الامانه.

ردت خديجه بلهفه:
_متقولش كده ربنا يطول في عمرك ويحفظك ليا من كل سوء.

ابتسم لها الياس بحب ثم حاوط كتفها بيديه، اردف الياس بعدما استقلوا السياره:
_هي اختك راحت النهارده تشوف الطفل اللي هتتكفل بيه.