واحدة صاحبتي مرة قالتلي انها عاتبت أهلها قالتلهم انتو علمتوني في أحسن مدارس في البلد وعلمتوني لغات و دخلتوني أحسن جامعة ودفعتوا عليا دم قلبكم ، ومحدش فكر يعلمني ازاي أتوضى صح ! قعدت سنين في البيت مبصليش ومحدش كان بيكلمني لييه؟ هسألكم قدام ربنا !
مبنساش كلامها ده أبداً ..
د.هالة معلمتي بتحكيلنا عن الناس الي بتتوب وهي عندها ٣٠ او ٤٠ سنة وبتيجي تسألها وهي بتبكي : أقضي الصوات الي عليا دي كلها ازاي ؟ (لأن الصلاة هي الفرض الذي لا يسقط أبداً)
بتحلف لنا انها شافت ناس بتصلي مع كل صلاة ٥ صلوات ، يعني في صلاة العصر تصلي ٦ عصر ، وفي المغرب تصلي ٦ مغرب وهكذا !
واحد بيسأل على إسلام سؤال وجواب ينفع أصلي بالفاتحة فقط بدون سورة قصيرة وأقول تسبيحة واحدة في الركوع وفي السجود ؟
ليه تعمل كدة ؟ عشان بقضي الصلوات الي عليا وهي كتير جدا.. 💔
مرة قعدت انا واخواتي وبنت عمتي نفكر هنقضي السنين الي علينا في قد ايه ؟ وقعدنا نحسب لو صلينا مع كل فرض فرضين ؟ سنين كتير ، طب لو صلينا مع كل فرض ٣ فروض ؟ كتير علينا ..
ونحسب ونحسب ، قلنا يااااه لو كنا بنصلي من الأول !
أنا من فترة قريبة وانا بدرس الفقه، اكتشفت اني عندي غلطات في الوضوء، واني بغلط في ركن من أركان الصلاة بقالي سنين !
كارثة !!
منساش د.هالة وهي بتقولنا : "بتصلي ولا مبتصليييش ؟
لو بتصلي أخبار النوافل والقيام اييه ؟
طب مبتصليش، سايبة نفسك ليييه ؟ عندك كام سنة؟ هتقضي الي فات امتى وازاي؟ ملكيش حجة العالم كله في ايدك النهاردة افتحي يوتيوب دوري على فيديوهات تساعدك ، نزلي كتب واقريها تشجعك ، قولي لأهلك في البيت خدوا بالكم مني وساعدوني ، هتقعي وماااله ارجعي تاني . جاهدي نفسك مرة واتنين وعشرة
ع الأقل لما ربنا يسألك تقوليله يارب كنت بحاول !"
"وأنذر عشيرتك الأقربين"
إلا الصلاة .
رفقاً بأولادكم واخواتكم وأهل بيتكم ،
لو ليك ابن مبيصليش اقف على راسه لحد ما يصلي قدام عينيك ، خليه يُسقط فرض ربنا بس من عليه حتى لو مش هيجيب الخشوع المطلوب . بكرة هيدعيلك
حتى لو مش هيدعيلك بس عشان ميوقفكش قدام ربنا ويسألك .
عشان منلاقيش سيدات محترمات ورجالة محترمين في الأربعينات من عمرهم ومبيعرفوش يتوضوا ويصلوا صح ! أو مكانوش بيصلوا أصلا ولسة عايزين يقضوا اللي عليهم من سنين !
بلاش ننسى الغاية الي ربنا خلقنا عشانها ،
ربنا مش هيسألك على مدارس اللغات ولا الجامعات المرموقة لكن هيسألك عن صلاتك .
فإن صلحت صلح سائر عملك ، وإن فسدت فسد سائر عملك 🌿
