Folding a Tissue Rose

[1]

တစ်ရှူးနှင့် နှင်းဆီပွင့် ခေါက်ခြင်း
~티슈로 장미 접기~

Characters
Wang Yibo as ChenYu (ချန်ယွီ)
XiaoZhan as GuWei (ကုဝေ့)

အပိုင်း (၁)

******

[Unicode]

"သောက်လိုက်ပါတော့လား ဒီတိုင်း..."

ပြောပြီး လက်ဖမိုးကို ဖြတ်ခနဲ လာရိုက်တဲ့ ဆရာဝန်လေးရဲ့ အေးစက်စက်မျက်နှာကို ချန်ယွီက မော့ကြည့်ရင်း ရယ်ကျဲကျဲ လုပ်ပြလိုက်သည်။ ရေခဲရေလိုမျိုး အေးစက်နေတဲ့ မျက်နှာနဲ့​ကို ဆူပူနေတော့ ထပ်ငြင်းလို့ရမယ် မထင်တာကြောင့် ချန်ယွီ ပါးစပ်ပိတ်လိုက်သည်။ ဒီရက်ပိုင်း ချန်ယွီ စိတ်ဝင်စားနေရတဲ့ ဆရာဝန်လေး ပြောတဲ့စကားဆိုတော့လည်း..။ ဒီနေ့တော့ ချန်ယွီ့ မျက်လုံးတစ်ဖက် ယောင်နေတာကြောင့် မြင်ကွင်းက မထင်မရှားမို့ ဆရာဝန်လေးရဲ့ မျက်နှာကို တိတိကျကျ မမြင်ရပေ။

ကုဝေ့က ချန်ယွီ့အခြေအနေကို အကြမ်းဖျင်း စစ်ဆေးပြီးနော​က် အရေးပေါ် ရောက်လာ​တဲ့ ကလေးငယ်လေးဆီကို ပြေးထွက်သွားသည်။ အလျင်အမြန်ပြေးသွားတဲ့ ကျောပြင်ကို ချန်ယွီ အထီးကျန်စွာဖြင့် ကြည့်လိုက်သည်။ သူ့အလုပ်က ချက်ချင်း ဆေးရုံဆင်း၊ အိမ်မှာ ပြန်နား၊ ပြီးရင် အလုပ်ပြန်တက်၊ ပတ်ချာလည် ရိုက်နေရမယ်​​​့ အလုပ်ဖြစ်သည်။ သူ့မှာ အချိန်မရှိပေ.. သူ့အလုပ်က အချိန်နဲ့တပြေးညီ လှုပ်ရှားနေရတာမို့ ချန်ယွီ ချက်ချင်းလက်ငင်းကို ဆေးရုံဆင်းချင်သည်။ ဒါပေမယ့်လည်း ကုဝေ့ရဲ့ အေးစက်စက်မျက်နှာကြောင့်သာ သူငြိမ်ငြိမ်လေး ကုတင်ပေါ်ပြန်လှဲလိုက်သည်။

လက်မောင်းမှာ ထိုးပေးထားတဲ့ ဆေးပုလင်းက ဆေးရည်ကျနှုန်းက အပျင်းရောဂါတက်နေတဲ​့ ပက်ကျိနဲ့ တူတာကြောင့် ဆေးရည်အကျမြန်အောင်လို့ သူနာပြုဆရာမတွေ အလစ်မှာ ခိုးပြီး လှည့်လိုက်တာတောင် ကုဝေ့က မြင်ဖြစ်အောင် မြင်လိုက်သေးသည်။ ဒါလေး နှေးတာတောင် သည်းမခံနိုင်ရင် ကတ်ကြေးယူလာပေးမှာမို့ ညှပ်ပြီး ပုလင်းလိုက် မော့ချလိုက်ပါတော့လားတဲ့။