ආදරණීය නේත්‍ර,  බොහෝ මිනිසුන් ආශව සමඟ ප්‍රේමයෙන් බැඳුනද එදත් අදත් හෙටත් මම ප්‍රේමයෙන් බැඳුනේ,බැඳෙනුයේ ඔබ සමගය.ඔබගේ අවිහිංසක පිරිමි හිතට මා තරම් ප්‍රේම කරන අයෙකු නොවූවද,මට වැඩියෙන් ප්‍රේම කරන අයෙකු සිටින වග මම දනිමි.නුඹේ සැබෑ දිවිය තුල සිටින නුඹගේ ආදරබර ආශව හැරුණුකොට නුඹේ ලෝකයට සමාන්තර ලෝකයක සිටින මම නුඹට වැඩියෙම බැඳුනු තැනැත්තා විය හැකිය.

ඕනෑම කටුක දේශගුණයක පිපෙන,සුවඳ හමන ගැටපිච්ච මලක් ලෙසට ආශව නුඹව නිර්වචනය කල දා සිටම මමද ගැටපිච්ච සුවඳට ලොබ බඳින්නට වූයෙමි.ආශව ජීවමානව විදින නුඹගේ සුවඳ මම පිපෙන ගැටපිච්ච මලකින් සොයා විඳීමට වෙහෙස වූයෙමි.ආශව කරන ලෙසටම නුඹ වෙනුවෙන් නිසදැස් ගොතන්නට වෙහෙස වූයෙමි.නේත්‍රගේ සැබෑ අයිතිවාසිකම ඇත්තේ ආශවට වග දැන දැනම සමාන්තර ලොවක සිටින මම නුඹට බෙහෙවින් ප්‍රේම කරන්නට පටන් ගතිමි.  

ප්‍රේමය මුවාවෙන් කාන්තාවන්ගේ සිරුරු මෙන්ම හදවත්ද තලා පෙලන දහසකුත් යක්ෂ පිරිමින් අතර නුඹ වැන්නෙකු මා හට ප්‍රේම කිරීමට ඇත්නම් යැයි මම නිතිපතා සිහින දකින්නෙමි.නුඹ වැන්නෙකුගේ අවිහිංසක වදන්,සැනසුම්බර සිපුම්,ආදරබර සැනසීම් වලින් මගේ දිවිය පුරවාගැනීමට ඇත්නම් යන ස්වප්නය තුල මම සතුටින් ජීවත් වන්නෙමි.මගේ වන් ගැහැණු හිතකට නුඹ වැනි පිරිමියෙකුගේ සැනසිලිදායක වදනක් හෝ ලැබීමට ඇත්නම් යන අවිහිංසක ආශාවෙන් මම බෙහෙවින් පෙලෙන්නෙමි.ගල් හිත් ඇති පිරිමින් දහසක් මැද මලක් වැනු සුපින්බර හදවතක් ඇති නුඹව මම දේවදූතයෙකු මෙන් දකින්නෙමි.  

ඉතින් ආදරණීයය, මා හට කෙදිනකවත් ආශව වීමට අවැසි නැත.නුඹව ආශවගෙන් උදුරා ගැනීමට කිසිදු දුර්ජන හැඟීමක් මගෙ හදවත කොතනක හෝ ගෑවීවත් නැත.නුමුත්,මදක් දරඳඩු දඟකාර ගැහැණු හිතකට උරුමකම් කියන මම මගේ ලොව තුල සිටින නේත්‍රව සොයමින් වෙහෙසෙමි.මගේ ලොව තුල කොහේ හෝ සිටින අවිහිංසක නේත්‍රව සොයෑගැනීමට හැකි වුවහොත් එය මගේ දිවිය තුල සිදුවන අතිමහත් වාසනාවන්ත අවස්ථාව වන බවද නොඅනුමානය.  

එලෙස සොයාගැනීමට නොහැකි වී වෙන පිරිමි සිතක් සමඟ මා ප්‍රේමයෙන් බැඳුනද,සමාන්තර ලොව සිටින ආදරණීය නේත්‍ර,මම ඔබට දිවි ඇති තුරා ප්‍රේම කරමි.                                             

 කැමීලියා