Ambisyosang Manunulat, ‘yan si Maria Angela Gonzales. Ako ‘yun! Ibig ko kasing maging katulad ni JK Rowling balang araw. Hindi lang dahil gusto kong magkamal ng limpak-limpak na salapi. Well, lahat naman tayo ay nag-aambisyon na humiga sa pera ngunit hindi iyon ang rason ko kung bakit gusto kong pasukin ang pagsusulat. Ang dahilan kaya ako naririto ngayon ay dahil nais kong makilala bilang isang manunulat. 


Sa pinagtatrabahuhan kong publication, araw-araw akong gumagawa ng romance, horror, articles at nagbibigay pa ako ng advice. Siguro naman ay nakapagbabasa kayo ng BULGAR ano, ito ang aking ikalawang tahanan. Para sa akin, ang kompanyang ito ang naghubog sa akin kung ano ako ngayon. Hindi ko makakamit ang tagumpay na ito kundi dahil sa publisher, editor at mga kasamahan ko sa kompanyang ito. 

Hep, hep, kung umarte na ako ngayon ay para bang may napatunayan na ako, ah. 

Well, kahit papaano naman ay mayroon. Aba, araw-araw yatang nababasa sa BULGAR ang aking mga column. At nakatutuwang isipin na mayroon din pala akong fans. Napatunayan ko iyon dahil may mga sumasali rin sa pa-contest namin. IYong hulaan ang titulo ng aking nobela. 

Gayunman, hindi pa ito sapat para masabi kong magiging JK Rowling na ako. Alam kong marami pa akong bigas na kakainin, bago ko ‘yun magawa. Basta ang importante ay unti-unti ko iyong inaabot.