@Novella_97
چیدی خەریکە تێدەگەم هەندێک وشە هەن لە قوڕگمدا زیندانی ئەبەدی کراون ، گەرچی هەمیشە وا خەیاڵم دەکرد پێنووس و تێنووسەکەم دڵ و ناخم خاڵی دەکەن لە جەنجاڵیەک کە وشەکان دەیخولقێنن هێندەی فێرکردم کە من هەڵەم ، تێنووسەکەم جگە لە شایەتیەکی چکۆلەی ڕوحە تاساوەکەی من هیچی دی نییە پێنووسەکەشم جگە لە وەرگێڕێکی بێ زمان و دەنگ هیچی دی نییە ، هێندەی لێ دەزانم تەنها وشەکان لەسەر شێوەزاری ناخمەوە دەگوازنەوە سەر شێوەزاری خۆیانەوە ئیدی هەر هێندەیە ...
ماوەیەکی زۆرە دەستەکانم وشەیەکیان لە قوڵایی ناخمەوە دەرنەهێناوە ، هەست بە پڕ بوونی لوولەکانی خوێنم دەکەم لەو وشانەی کە دەمێکە بۆ پەڕەکانیش نەمدرکاندووە هەست بە خنکان دەکەم لە قوڵایی ئەم تاریکیە ، هەست بە گێژ بوون دەکەم لەم گێژاوەدا ، فرمێسکی چاوانم وشکیان کردووە ئەوەی لەسەر زمانم بوو بۆ درکاندن ئێستا لە قوڕگمدا زیندانی کراوە وەکو دەستێک توند توند گەرووم دەگوشێ بۆ ئازادی ، ئازادی؟ چی جۆرە ئازادیەکی دەوێ کام ئازادی ئەوەی کە لە گوێیەکانی کەسێکدا پەنگ بخواتەوە تا دەگاتە سەر زمانی و پاشان وەکو گەڕۆکێک لەسەر زمانی ئەم و ئەو هاتوچۆ بکات ؟ ئایا زیندانە بە حورمەتەکەی باشتر نییە لە گەڕۆکیە بێ وچانەکەی لەسەر زمانی ئەم بۆ ئەو ؟ ، ئەمە ئازادیە ؟ پێناسی ئازادی زۆر جودایە لە گەڕۆکێکی بێ حورمەت ، ناخم توند دەگوشێ خوێنە ڕەشەکەم زیاتر دەچۆڕێ لە دەستە بێ بەزەییەکانیدا بۆ گەڕۆکیەک کە چارەی دەردی نییە؟ ئەمە چی جۆرە دەرمانێکە کە چارەی دەردی نییە هێشتاکەش پێناسی دەکا بە دەرمان؟ ، شتەگەلێک لەم گێژاوەی من تێی کەوتووم ڕوو دەدات کە ئیتر پەنجەکانیشم نازانن پێناسی ئەم حاڵە بکەن ، سەرە پەنجەکانم هاواری ماندووبوون دەکەن لە دەست نووسینەوەی ئەو زۆرداری و جەنگەی لە ناخی من گیرساوە .
