zeusea
مرات وسط الزحمة الحياتية.. بتخطريلي فجأة، زي ضربة برق بيجي وجهك على بالي. الليلة جلست لحالي، بحكي مع نفسي، تخيلت في حدا سامعني وقعدت احكي عنك، كيف تعارفنا، كيف كنا مع بعض، كيف كانت اخر ايامنا مع بعض، شو كان اخر شي حكيتيهولي قبل ما تغيبي، كيف فقدتك وبقيت ابحث عنك، كيف عرفت شو صار معك… ما بكيت، انا تصالحت مع الفكرة من سنين، انا من خلالك تصالحت مع الموت بشكل عام، وتصالحت مع فكرة ان الاشياء بالحياة كلها مؤقتة وكلها لها نهاية ما في لحظة ما وعادي، تستمر الحياة، تستمر حتى نموت نحنا، وكمان حتى هاي عادي، لا اعتراض على إرادة الله وسنة الحياة لخلقها.
بطلت حس بالفراغ لما تخطريلي وبطلت احزن. ما توقعت يجي يوم واتقبل زمان، بس تقبلت… صرت بحكي لحالي عادي انك متتي وخلص دفنوكي ورحت عند ربنا ومش حنحكي مرة ثانية، وان حياتي حتستمر عادي جدا بك وبدونك، ممكن لو ضليتي معي كان حيكون الموضوع احلى، تأثيرك فيا كثير ايجابي عموما، بس حتى بلاكي انا تعلمت اتطور واصير نفس الشخص لكنت حتفتخري به كمان وكمان.
يعني.. هي بالنهاية مجرد حياة، واحنا مجرد قصة قصيرة فيها.
شو بدي احكيلك كمان؟ انا عم ابذل جهد حتى ما انساكي، عم ذكر حالي فيكي عطول. صح الزمن صار طويل بيناتنا، صح لعشناه سوا اقصر بكثير من يلي مر هلق… بس لساتني مرات بجلس مع حالي وبحكيلها.. تتذكري لما كان في رينا في هالحياة؟ وبتبسم، بتذكر قديش كنتي شي منيح.
الله يرحمك ❤️
