@_Ruqaya
سون اعليك الحرم ،، بالصحاري قراية
طفلة ماتت عالطشت ،، هاضمتها حچاية
الگبل چانت كل فرض ،، تفرش مصلاية
سمعت اشباه الزلم ،، كاسرين الراية
عفناها عطشانة .. ماردت ويانه ..
ــــــــــــــــــــــــــــــــــــــــــــــــــــــــ
ردنه ننصبلك عزه ،، من دخلنا الكوفة
وحيل رايدله اللطم ،، والحرم مچتوفة
هسه ردينه بهضم ،، گبر أخونه نطوفه
جينه ننشد كربلا ،، والحنين نشوفه
شفنه الگبر ماله .. والتمت اعياله
بچي مال مدلله حايرة منين ...
ـــــــــــــــــــــــــــــــــــــــــــــــــــــــــــــــــ
خوية تذكر من گلت ،، انه عنك رايحة
بهزل والوادم غرب ،، والسوالف جارحة
حيلي خلص بالدرب ،، من كثر ماطايحة
مااجيتك اشتكي ،، جايه اقرا الفاتحة
من سوگ الولاية .. ردينه مشاية
روحي ضيم محملة حايرة منين ...
ـــــــــــــــــــــــــــــــــــــــــــــــــــــــــــــــــ
ردت الاگيك شكثر ،، حتى اخبرك حالي
وأنت چثة بكربلا ،، ورمح راسك عالي
وياك چنت مدلله ،، وما نشاف خيالي
الرابيه بديرة علي ،، بالخرايب تالي
من هيبة خواني .. رحت بضعن ثاني
ارد يم راعي الهلا حايرة منين ...
ـــــــــــــــــــــــــــــــــــــــــــــــــــــــــــــــــ
ـــــــــــــــــــــــــــــــــــــــــــــــــــــــــــــــــ
جيت مشتاگة وعلي ،، يل شبگتك عازة
كون باب اعله الگبر ،، حتى اشوف اعزازه
ولو صدره المنطحن ،، مالگوله جنازة
الجيش كله بكربلا ،، عالحُسين توازه
لچفوفه مشتاگة .. ماخلوا ملاگة
منين احضنك مشكلة حايرة منين ..
ـــــــــــــــــــــــــــــــــــــــــــــــــــــــــــــــــ
مااشوف من العطش ،، ياهو اليدليني
حسين تيهت الگبر ،، أگعد وحاچيني
خاف اسولف عل يسر ،، والحچي يأذيني
راح اسلّم بالگلب ،، ماامد چفيني
ماامدهن اعذرني .. چف ايدي يهضمني
بيه أثر للسلسلة حايرة منين ...
ـــــــــــــــــــــــــــــــــــــــــــــــــــــــــــــــــ
بذمتچ يا كربلا ،، هل وصلنا الحومة
اذكر هنا حشمت ،، واهلي كلهم نومة
هنا حسين المنذبح ،، سلبوها هدومه
ماكو بالدنيا بعد ،، يوم يشبه يومه
دايرته عدوانه .. وتريده نسوانه
بخيمة وحدة العايلة حايرة منين ...
راده بدرب اليسر ،، زينب ومحتارة
ظهري مايل منكسر ،، خلصتها دوارة
شوكت نوصل كربلا ،، حتى اعرف اخباره
هاي مو جيت عتب ،، ناويتها زيارة
جيتك يبو الشيمة .. شيخلص الهيمة
بالدروب معلعلة حايرة منين ...
ـــــــــــــــــــــــــــــــــــــــــــــــــــــــــــــــــ
الـقصـيدة : حايرة منين
اداء : سيد فاقد الموسوي
كلـمات : سيد محمد الموسوي
وسيد محمود الموسوي
☆☆☆☆☆☆☆☆☆☆☆☆
مااندل ياكربلا حايرة منين
گبر الحسين ..
تراب بعده لو عله گبر الحسين
ـــــــــــــــــــــــــــــــــــــــــــــــــــــــــــــــــ