Angela

بستغرب اوي البني ادم اللي بيقول للبنت هاي ممكن نتعرف وبعدين يقول اصل بصراحه انا عاوز نكون صحاب بس مش اكتر او انا مش بتاع ارتباط وحب والكلام دا ..اه تقصد انك بتاع تسليه ولعب ببنات الناس ..المشكله انه فاكر نفسه كدا صريح وانه طالما موعدش البنت بأي حاجه من الاول يبقى هو زي الفل وهي اللي غبيه ومغفله علشان فتحت قلبها ليه او افتكرت انه مع الوقت ممكن يكون حبها فعلا وهيكون ليها ..ولو اتخانقت معاه هيقولها انا مالي ما انتي اللي علقتي نفسك بيا وانا موعدكيش بحاجه ..موعدتهاش اه اومال كنت بتسأل عنها كل يوم ليه وبتسمعها وبتحكيلها عنك وتفضل ترغي معاها بالساعات وتقولها دا انا برتاح لما بكلمك او انا بكون فرحان وانا بكلمك وملقتش غيرك احكيله اللي حصل ..بتحسسها انها مهمه عندك ف قلبها يحن وتحس انك مميزها عن ناس كتير ..وانت اساسا بتقول لعشرة غيرها نفس الكلام يا كلب البحر !! 

متخفش امتحان بكره هيعدي زي باقي الامتحانات اللي عدت ومتقولش لا دا اللي هيحدد مصيري وهينقلني من كلية لكلية وهيغير توقعاتي وهينقصني درجات كتير وانا اصلا ناقص كتير في اللي فات 
          
          ششششش هدي نفسك انت مش هتقل في نظر اللي حواليك لو جبت مجموع وحش يعني هو اه هيأثر على حياتك ونفسيتك ونفسيه اهلك بس عادي هتتعود على اللي حصل وتتقبله وهتكمل عادي وهتحاول توريهم نجاحك في شغلك وفي حياتك
          
          ايوه ادخل الكلية وحاول تنجح فيها ..نفسيتك هتخليك كارهها انا عارفه وهتكره تذاكر فيها وهتقول دا مش مكاني بس مش يمكن دا الاحسن ليك مش يمكن الكلية دي هتكون سبب في تغيير حياتك 
          
          انت لازم تكون ناجح مش مهم المجال ايه المهم انك تكون منور كدا ومتميز فيه ..خلي بالك ان في ناس كتير كانوا جايبين مجموع عالي بس فشلوا اه فشلوا في حياتهم ..وبعدين بزمتك انت مش شايف الاشكال اللي ع السوشيال ميديا دا في ناس جاهله اساسا ومعاهم فلوس ب الكوم وعربيات وبيسافروا في اي حته براحتهم ومشهورين وشايفين نفسهم احسن مني ومنك ومن اي واحد كان ممرمط نفسه في التعليم وجاب مجموع عالي ودخل طب او هندسه
          
          ف العبرة من دا مش انك تستسلم وتقول خلاص ايه لازمه التعليم وايه لازمه محاولاتي الفاشله دي .. لاااا انت احسن منهم صدقني ..انت انسان مثقف وواعي ومجتهد وبتسعى في حياتك وكفاية انك عاوز تنجح وتكسب فلوس حلال في المستقبل 
          
          سيبك من اي حد يحبطك او يحسسك بالفشل حتى لو اهلك خليك واثق في نفسك وفي قدراتك مهما حصل وخلي عندك حسن ظن بربنا انه اكيد شايف محاولاتك وتعبك وهيرزقك ♡ 
          
          بكره هتدخل ع اللجنه بقلب جامد وكأنك داخل السنتر عادي وبتحل وانت مش هامك حاجه وفكر بس هتاكل ايه بعد ما تخلص او هتخرج فين مع الشله ولو مفيش شله كلمني وانا هنزل اخرج معاك عادي بس عاوزه ايس كريم بالفراوله 
          
          (الى الطالب او الطالبه المطحونه من اول السنة) 

=انا مقتنعتش خالص ! يعني لما يوحشك تنسى كل حاجه حصلت وترجعيله كدا بكل سهوله ! دا اهانك جامد 
          -بحبه 
          =حبك برص 
          ^صدق اللي قال ان الحب اعمى فعلا 
          *اه البت نسيت كل حاجه في ثواني
          -منستش علفكرة بس هحاول اسامحه لأني بحبه 
          =اين الكرامه انا لا اراها ؟
          -لا كرامه في الحب 
          *مين الاهبل اللي قالك كدا بقى 
          -قريتها قبل كدا على الفيس 
          =بطلي هبل يا حور انتي رجعتيله ليه ! اديني سبب مقنع غير الهبل اللي قولتيه دا لأنه مدخلش دماغي 
          -متعوده عليه وهو متعوده عليا ف مش لسه هنتعرف على ناس جداد ونجرب تجربه جديده والاقي واحد بيقولي احكيلي عنك وبتحبي لون ايه وساكنه فين وبتحبي تسمعي اغاني لمين واحكيله عن مشاكلي ولسه يحاول يستوعب م الاول ف لاااا طبعا انا مش قادرة ابدأ م الاول ..فقررت ارجع لتميم ..اصل مبقاش في صحه عندي لكل دا ..صحتي يدوبك ع القد 
          =اه كدا اقنعتيني شوية 
          -ها بقى ساعدوني انقيله هديه اصالحه بيها 
          *لا لا كدا كتير حد يناولني الشبشب اديها ع دماغها
          ^انتي اتجننتي يا حور ! وكمان انتي اللي هتصالحيه ؟!! 
          =دا اللي كان ناقص فعلا ..
          -اصل انا بردو غلطت فيه كتير لما كنا بنتخانق
          =طب ما هو غلط وقال كلام ميصحش خالص وخلاكي قعدتي يومين تعيطي لينا لغايه ما جبتي لينا اكتئاب وصداع !
          -معلش انا عاوزه اجبله حاجه يفتكرني بيها 
          ^لا متقلقيش اللي يعرفك يا حور عمره يا يقدر ينساكي عارفه ليه
          -ليه 
          ^علشان هتجبيله عقده من الستات اصلا ف هتفضلي معلمه في حياته ! 
          -تقصدي ايه يا مريم بكلامك دا !!
          *متزعليش يا حور هي اكيد متقصدتش انك هتكرهيه في حياته بسبب نكدك وهرموناتك المتقلبه مثلا
          -اه بحسب ..ايه انتي بتقولي ايه انتي كمان !!
          =انا هقفل يا جماعه علشان لو كملت اكتر من كدا هتجلط 
          *وانا كمان 
          ^انا بردو زهقت من حوارات استاذ تميم دا
          -يعني محدش هينقى الهديه معايا 
          =اسكتي يا بت بدل ما اجيلك
          -طيب خلاص

-جماعه الحقوني
          =استر يارب 
          *البداية دي انا عارفاها كويس 
          ^اه فعلا بيجي بعدها مصيبه
          -لا بس بجد المره دي صدقوني مش مصيبه كبيرة يعني 
          =اومال ايه 
          *اخلصي يا حور
          -انا ...
          اناا ..
          ^هااا يا بنتي ؟!
          *ايه جو التشويق دا 
          -انا رجعتله 
          =الهاء عايده على مين معلش علشان منفهمش غلط !!! 
          -هو في غيره اللي ملك قلبي :)
          *اوعى يكون اللي في بالي يا حور !! انتي رجعتي للواد دا تاني !! 
          ^غبية وتعملها !
          =ازاي بس دي قالت ابقوا تفوا عليا لو رجعتله
          *هضربها وربنا !
          -استهدوا بالله بس 
          =حور اخلصي فهمينا .. انتي رجعتي ل تميم بجد ولا دا هزار 
          -امممم
          *يبقى رجعتله فعلا 
          ^مش بقولكم غبية وتعملها !! 
          -اصل بصراحه وحشني 
          =لا يا شيخه بجد ..طيب يا جماعه احنا مكبرين الموضوع ليه دا يدوبك وحشها 
          -متتريقيش عليا يا فرح ..اه وحشني وبعدين انا وهو كنا اقرب اتنين لبعض وبنتكلم كتير اوي كل يوم ف طبيعي اختفاءه من حياتي يكون مشكله بالنسبالي و احس بسرعه اني متفقداه
          ^تراني اقتنعت 
          *انا بردو اقتنعت بصراحه 
          

-بتعيطي ليه دلوقتي ! وبعدين افرض انا بقول كدا علشان اغيظك مش اكتر تقومي تتجنني كدا وتهربي !
          =ما انا اصل .. اصل ..
          -بلا اصل بلا فصل اتفضلي صالحيني يا هانم
          =ها ..
          -اه يلا هاتي بوسه 
          =اتلم يا عمر احنا في الشارع 
          -والله هي دي بس مشكلتك ؟!
          =اه لااا انت بتقول اييه يووه اكيد لاا طبعا انت محرم عليا 
          -هههههه بحب اشوفك متلغبطه اوي 
          =انت رخم علفكرة 
          -انا رخم ؟! بقى كدا مااشي خلاص متشكرين ياستي
          =اه رخم ودمك تقيل وبحبك ومستفز وغلس
          -ها انتي قولتي ايه 
          =رخم 
          -لا اللي بعدها 
          =مستفز 
          -لا اللي قبلها بقى 
          =دمك تقيل 
          -يوووه في حاجه وقعت في النص يا بنتي 
          =هي ايه ؟
          -خلاااص
          =هههههههه بحبك 
          -ايوووه هي دي ...وانا كمان بحبك يا مجنونه
          =اتفضل وصلني بقى !
          -ماشي بس هتدفعيلي اجرة ..البنزين غالي 
          =والله ؟ مستخسر لترين بنزين فيا !! 
          -لترين بحالهم يا مفترية !
          =بقى كدا ماااشي انا هشوفلي تاكسي تاني 
          -لا لا خلاص انتي ايه مبتقبليش هزاري كدا خالص 
          =هزارك دمه تقيل
          -شكرا يا روحي 
          =العفو يا قلبي

-بحبك
          =اممم وانا كمان 
          -مالك يا جميلة ؟
          =مفيش
          -اخلصي قولي كل حاجه
          =مفيش يا عمر 
          -بوزك ممدود مترين قدام وشك وبتقوليلي مفيش يا عمر ! ما تنطقي يابت ! 
          =اممم هي مين البنت اللي كانت واقفه معاك قبل ما اجي
          -اااه قولي كدا بقى م الاول 
          =مين يا عمر 
          -واحده معجبه ياستي كانت عاوزه تاخد رقمي وسألتني مرتبط ولا لأ
          =امم وانت قولتلها ايه 
          -قولتلها لأ طبعا وادتها الرقم 
          = اه طب كويس ....ايه هااا قولت اييييه ؟! 
          -اصل البت جامده بصراحه يا جميلة عينيها زرقا وشعرها تحفه لا وكله كوم وجسمها بقى يالهوي 
          =......
          -بت ! جميلة !! استني بس هفهمك خلااص ! 
          خدي هنا يا بت !! 
          =.......
          -لاااا اوعي تركبي .. جميلة ... كلامي يتسمع بقولك .. متركبيش معاه 
          اتفضل يا كابتن اتكل انت على الله مش هتركب خلاص
          =ابعد عن طريقي يا عمر وسيبني اروح البيت
          -والله بهزر معاكي يا عبيطه
          =ابعد عني يا عمر بقولك 
          -همشي التاكسي دا ونشوف الحوار دا مع نفسنا يا جميلة واوعى تعندي !
          =.......
          -اتفضل امشي يا كابتن معلش عطلناك معانا 
          =ها عملت اللي في دماغك ومشيته ! بردو مش همشي معاك !
          -....
          =اااه ايدي !  انت ازاي تمسكني كدا ! احنا اتفاقنا مكنش كدا 
          -بلا اتفاق بلا زفت ..هو انتي احترمتي الاتفاق اللي بتتكلمي عليه ! 
          =طب ممكن تهدى وتسيب ايدي علشان كدا حرام 
          -في اتفاقنا كان انك تسمعي كلامي بس انتي معملتيش كدا يا هانم 
          =ما انا لما بدايق بكون عاوزه ابعد 
          -اتفاقنا مكنش فيه البند دا .. شكلك انتي اللي محتاجه تراجعي شروط الاتفاق !
          =....
          -كتبنا انا وانتي اننا مهما اتخانقنا وزعلنا مش هنبعد وانتي في اول خناقه مقدرتيش تنفذي اتفاقنا 
          =.....
          

=في الجنه يا روحي 
          -اكيد في حد عايش ع الارض بالمواصفات دي علفكرة 
          =اه طبعا بس مع المواصفات دي هتلاقي صفات تانيه للأسف هتخليكي ترفضيه زي انه بخيل اوي مثلا او خاين و عينه زاغيه وبيحب النسوان الكتير حواليه او مبيحبش الستات اصلا ودي مصيبه اكبر او ابن امه يعني معندوش شخصيه اصلا وامه اللي بتتحكم فيه او مسيحي تخيلي فعلا تلاقي مواصفاتك دي وفي الآخر يطلع اصلا تبع دين مش دينك ! هتبقى حاجه وحشه اوي بصراحه !  او مريض نفسي في مرحله خطر وملوش علاج او مش عاوز يتعالج اصلا او مدمن او قاتل او  ...
          -ايييه كل دااا خلاااص يابت فصلتيني خلاااص مش عاوزاه خلاااص 
          =لا لا مش قصدي اكرهك في الصنف كله لا سمح الله ..انا قصدي بس اوضحلك ان مفيش انسان كامل وان الكمال لله وحده
          -ونعم بالله بس انا عاوزه واحد مميزاته اكتر من عيوبه وميكونش من اللي انتي قولتي عليهم دول 
          =اهم حاجه لازم لما تختاري حد لازم تعرفي انك هتتقبليه بعيوبه ومميزاته وتكوني راضيه وفرحانه بيه وبتحبيه علشان شخصيته واسلوبه مش علشان غني او عنده فله وعربية ولا علشان مز وطويل وعريض 
          -اممم فهماكي ..طيب انتي فعلا معاكي حق دوريلي بقى 
          =ادورلك اه ! مش لما الاقي لنفسي انا الاول يا بت ! 

-هو فييين ! 
          =هو مين ؟
          -حد يقولي هو فيييين !!!!
          =هو مين يا بنتي 
          -ما انا لازم اعرف هو فيين !!
          =وطي صوتك يا متخلفه 
          -لااا بقى ما انا مش هتهد ولا هيهدالي بال غير لما اعرف هو فييين 
          =ممكن تهدي شوية معلش وتقولي في ايه وهو مين دا وياريت تقعدي علشان فرجتي الناس علينا بدوشتك و وقفتك دي  
          -معلش انفعلت شوية
          =شوية ؟!! تخيلي في وسط هدوء المكان والناس كلها ساكته وبتقرا وفجأة واحده متخلفه تقوم تقف وتفضل تزعق تقول هو فييين هو فيين !! انتي واخده بالك ان في مليون لافته حواليكي مكتوب عليها ممنوع الكلام اساسا !! 
          -احم سوري يا جدعان انفعلت شوية مع الرواية مش هتتكرر تاني صدقوني 
          =منك لله يا ميار هتخليهم يمنعونا من دخول المكتبه تاني
          -خلاص خلاص هسكت 
          .............
          =هااا اتفضلي فهميني بقى مين اللي كنتي واحنا جوا عاوزه تعرفي مكانه دا ؟
          -دا يونس 
          =يونس مين ؟ 
          -دا حبيبي 
          =ينهارك اسود انتي بتحبي من ورايا ! 
          -اه بس للأسف ملناش نصيب مع بعض
          =ليه بقى
          -علشان هو من عالم وانا من عالم تاني
          =يخربيتك بتحبي جن !! انا من زمان وانا حاسه انك مش مظبوطه !
          -يا بت بلاش عبط 
          =اومال ايه ما تفهميني 
          -يونس دا من وحي خيال الكاتبة اساسا 
          دا بطل الرواية اللي كنت بقراها 
          =........
          -بسنت !! استني بس ! ههههه 
          طب هتروحي فين وتسيبيني 
          =سيبني في حالي يا ميار ..منك لله !
          -بس بجد هموت واعرف هو فيين ! ألاقي فين الحلاوة والكاريزما والشهامه والجدعنه والحنية دي !! 

-لا ابعتيله دلوقتي واعتذري واتعاملي معاه حلو وقوليله اللي جواكي وانك محتاجه وجوده 
          =لا انا مش هتحايل عليه 
          -لا طبعا مش قصدي كدا بس عرفيه الحقيقه وبطلي تعندي 
          =علفكرة هو عنيد اكتر مني 
          -معلش ياستي استحملي وبعدين ما هو مستحمل عيوبك انتي كمان 
          =تمام هكلمه فون 
          -مش هيرد 
          =عرفتي منين 
          -علشان زهق منك وعارف انك هتعيطي له او هتفضلي تعاتبيه وتنكدي تاني ! 
          =اوووف اعمل ايه طيب 
          -ابعتيله محتاجه اتكلم معاك كلمتين ومتقلقش انا هاديه ومش هنكد ولا هاخد من وقتك كتير لو رن عليكي يبقى حلو اوييي كلميه وقوليله بس زي ما اتفقنا من غير نكد وبهدوء ودلع بنات بسيط علشان يسامحك
          =اممم ولو مرنش 
          -قوليله هينفع اكلمك فون ولا انت في مكان مش هيسمح تكلمني فيه 
          =تمام ولو قال لا مش هينفع 
          -خلاص اكتبيله او ابعتيله ريكورد بقى ملهاش حل تاني
          =اوك 
          -من غير نكد يا فريدة !!!
          =طبعا طبعا 
          -تمام ربنا معاكي بس اعتقد انه هيتقل عليكي شوية بس هيسامحك لان الانسان اللي يستحملك بصراحه يبقى ابن ناس اوي وعنده قدرة هايلة على الصبر على الشدائد
          =ها ؟ تقصدي ايه ؟
          -لا ولا حاجه دا انتي عسل طبعا 
          =اممم بحسب 

-عرفتي منين انه مكنش بيحبك
          =مكنش بيستحمل نكدي
          -ليه انتي كنتي بتنكدي قد ايه 
          =كنت بنكد عليه ليل ونهار لمده شهر 
          -احيييه يعيني عليك يا روح قلب امك والله صعبان عليا منك لله يا شيخه اكيد كرهتي الواد في عيشته وفي صنف الستات
          = لا علفكرة انا اللي ......
          -ششششش اسكتي خالص مفيش اي اعذار للي انتي عملتيه انتي بوظتي سمعتنا كدا يقولوا علينا ايه دلوقتي 
          =بس انا ....
          -انتي تسكتي خالص لغايه ما افكر في حل للبلوة بتاعتك دي ..وبعدين دا انسان زيه زيك مينفعش تفضلي تديله شحنات نكد متواصله بالشكل دا انتي ذات نفسك مش هتقدري تستحملي وهتتعبي نفسيا 
          =اه يعني لو مخنوقه مفضفضش معاه ولو مدايقه منه منكدش عليه ولو هرموناتي بايظه مطلعاش عليه !! 
          -مقولتش كدا بس بالعقل يا بنتي ...نكدي شوية في اليوم وفي نفس اليوم اتصالحوا 
          =لا طبعا مبعرفش اعمل كدا 
          -اه طبعا ما انتي بومه اعوذ بالله ! 
          =انا اصلا انسانه نكدية وعاوزاه يبعد عني خلاص كفاية لحد كدا 
          -لا بردو دا مش حل علشان هتظلمي نفسك لأنك بتحبيه ف بعدك عنه كدا كأنك بتجلدي نفسك وبتعاقبيها 
          =يوووه اومال اعمله ايه ما انا هبعد علشان اريحه مني 
          -حاولي تتغيري شوية علشانك وعلشانه 
          =لا صعبه دي 
          -لا عادي حاولي تكوني فرفوشه شوية وبطلي نكد ومش لازم كل ما تحسي انك مخنوقه تكلميه وتخرجي شحنتك السلبيه فيه 
          =اومال هو لازمته ايه مش المفروض يقف جنبي وانا مخنوقه 
          -اه يقف جنبك ويساعدك تتخطي المرحله اللي انتي فيها بس انتي مش تضغطي عليه وتتعبيه معاكي وتخنقيه 
          =امممم تمام هحاول هفكر في كلامك