My Little Boss

part 1

كانت قاعدة في بيروها تترشف في كاس قهوة .... قهوة النصر بعد ما سكرت القضية الي كانت مكلفة بيها بنجاح . دق الباب...
- شكون (أريج)
- ايهاب
- ااا ايهاب ادخل والله توا كنت باش ناديلك
دخل ايهاب (المساعد الأول متاعها وذراعها اليمين ديما متكية عليه وما تاثق كان فيه) ايهاب طفل بقلاوة بأتم معنى الكلمة زين وڨد أسمر وبدنو الكلو عضلات حرجو في الأكحل أما ما عندوش لحية عينيه عسليين يهبلو ... قعد ايهاب مقابل أريج وكان مباين عليه متقلق شويا عرفت الي ثما مصيبة جديدة (يعني قضية جديدة) ياخي قتلو:
- تي أنطق يا ولدي ياخي ماو نعرفو هاذيكا هيا حياتنا وهاذيكا هيا خدمتنا الله غالب
قدم ووخر سي ايهاب ورمالها دوسي على البيرو وقلها:
- سمعنا الي فما عصابة كبيرة تروج في المخدرات في بلادنا الboss متاعهم اسمو سي بدر **** مهمتنا كلعادة نطيحو الجماعة هاذوم
- اممم نعرش علاش حاستها باش تكون قضية غريبة شوية
- شمعناها موش كيما لخرين؟ ياخي أول مرة أحنا نتبعو تجار مخدرات ؟
- اوووه يا ايهاب تي شبي عزاك فحت فيا قتلك مجرد احساس .... على كل حال خلينا نبداو خدمتنا على رواحنا
- اوكي.... عندك سي بدر الراس الكبير راجل في الخمسينات هو الي بدا حكاية تجارة المخدرات في البلاد أما حاليا ماهواش هو الي قاعدة يسير في الجو..
- أريج: اااا شكون معاه زاداا
رمالها تصويرة طفل بوڨوس يهبل غزرتلو قعدت حالا فمها كالبوهالية 😂 تعشق في زينو
- اوووه وين سرحت يا بنتي
- ااا... لا.... لا شي هاني معاك ... امالا شكون هاذا ؟؟؟
- هاذا سي كرم (اسمو بركة يزعزع البلاد) أكبر رجل أعمال في البلاد يملك برشا شركات تحت يديه.....
- ايه.... ربي يزيدو من خيرو اش مدخلو في حكايتنا
- هاذا الراجل الي حاشتنا بيه هاذا هوا الي لاهي بالدولاب الكل
- (يطلع منو القطوس هاذا ااه) قالتها بالشوي 😅....
- نعم شقلت ما سمعتكش
- لا...لا...شي (,تربثت) اااا....قتلك اش يقرب لسي بدر خاطر مادام وصل كلفو بالمسؤولية هاذيكا الكل مادامو ياثق فيه ثقة عمياء
- ايه وي....محسوب ولدو
- محسوب ولدو ؟؟؟؟ شمعناها؟ مستبنيه؟؟
- تنجم تقول
- ياخرا تي حل فمك وأحكي بالواضح علاه الألغاز ...
- هو ولد خو سي بدر وحسب المعلومات الي عندنا بو كرم (خو سي بدر) مات وقتلي كرم كان صغير برشا عمرو أقل من عام وأم كرم ماتت وهي تولد فيه ويضهرلي ماعندهاش عايلة ولا سي بدر خذا كرم ورباه على خاطر مرتو (مرت سي بدر) توفات عندها مدة يعني قبل ما يولد كرم وهي كانت عاقم ماجبتلوش صغار وماحبش يعرس مرة أخرى على خاطرو كان يحبها برشا ولا حسب كرم ولدو ورباه عندو يعني رباه على أصول المافيا باش كي يكبر يستلم المهمة
- ااا واضح معناها أحنا الهدف متاعنا هو سي كرم ....
- اييه بالضبط أما موش كان كرم أكهو...
- اااا شنوا زادا ثما جرثومة أخرى في الحكاية مكثرهم الصخط فيهم
- للأسف.. ثما زادا هاذا (وراها تصويرة طفل وجهو يوحي بالبراءة برشا حاصيلو ما يضهرش تاع مافيات)
- هاذا؟ الشقنوس هاذا هوا زادا عندو ما يقول في روحو!؟
ايه ايه ... الشقنوس هاذاكا زادا رجل أعمال كبير مايقلش قوة على كرم ويخدم معاه زادا في تجارة المخدرات وهو أصحاب هو وكرم مالمدرسة وكان يجي برشا لدار كرم وتعرف عالجو ودخل في الدولاب وولا الذراع ليمين تاع كرم
- أسمع ااا سيدك ااه يطلع منو هالوحيد أي شقتلي اسمو
- سي هارون
- سي ؟ وتكسرلو في السي زادا مقوا سعدو .... حاصيلو توا الوقت وخر برشا وأنا تعبت برجولية نحب نروح نرتح فخار ربي تو غدوة انشاء الله نبداو نشدو راس الفتلة..
- مريڨلين حتى أنا هاذاكا اش كنت باش نقلك
خرجو الزوز مالمركز
- تصبح على خير
- ليلتك زينة
ركبو الزوز في كرابهم وروحو لديارهم
دخلت أريج لدارها تلقى أسيل صاحبتها تاكل في ڨاطو وتتفرج في التلفزة
- شنوا يا مكبوبة تاكل وحدك ما تقليش هيا بسم الله هههه
- بسم الله العظيم الرحمان الرحيم منين طلعت يا سخطة وقتاش جيت ومنين دخلت !؟
- والله جيت توا وطلعت مالدروج ودخلت مالباب (,تشقشق في مفتاح الدار) والا صعيبة على مخك هاذي هههههه
- نا نا نا نا (تعكي عليها) لا ضامرة ياسر الحق نقصد فجعتني طيحتلي قلبي ...
- سملا على قليّب حبيبي طاح هوااا .... هاني طالعة نبدل دبشي حطلنا نتعشاو انفض ريشك
- أسمعني للا مانيش خديمة عند حضرة جنابك راهو تبخص وتكش عليا وتزيد تحب العشا حاضر دويووو يبطا في الهبطا
وتربعت فوق الفوتاي وكتفت يديها وهبطت شفتها اللوطانية كيما يتغششو الصغار 😅
جاتها أريج وقعدت بحذاها ودزتها من كتفها
- أسيل ... أسولة ... سوسو ...
وهي لا حياة لمن تنادي عاقدة عرنينها وملفتة وجها للشيرة الأخرى
- ابعد عليا نحبش نحكي معاك
- اماااان.... باهي (وتربعت أريج عالفوتاي كيما أسيل وكتفت يديها هي زادا وهبطت شفتها اللوطانية ولفتت وجها للشيرة الأخرى ههههههه)
-أسيل: 😡 ماني قتلك ماعادش تقلدني !!! 😡😡
وأريج حاقرتها ههه
- يا سخطة ... هاااي ... يا مصيبة نحكي معاك !؟ ماعاش تقلدلي حركاتي 😡😡 (وتعارك وجايبا ماعندها ههههه)
-أريج: ابعد عليا نحبش نحكي معاك..
- ياكلبة كلمتي هاذي أنا بركا نقولها ماتحشمش تقلدلي في حركاتي وزادا في كلامي 😡
تلفتتلها أريج وجات العين في العين وقعدو يغزرو لبعضهم ثواني من بعد طرشقو الزوز بالضحك فرد وقت 😂 وشدتهم هيستيريا تاع ضحك على تبهليلهم وسخافة عقلهم زوز مهبلة طاحو ببعضهم😅
- توا هاذم فازات تاع زوز بنات عمارهم 25 ؟ ههه(أسيل)
- قول لروحك أنت لبديت بالتفوريخ هههه
- وانت تبعتني خاطرك أفرخ مني ههههه
- هيا يزي بلا خراا هليلة وبرا حطلنا نتعشاو هاني طالعة نبدل حوايجي
- أوكي يا فرخة😅(تتمقصص عليها)
بالطبيعة أريج ماسكتتلهاش وبعثتلها المخدة صرفقتها بيها وطلعت تجري لبيتها في الطابق الثاني وخلات أسيل تسب وتتحلف 😂
#أسيل
احم احم علاش ما تقولوليش الي أنا ما عرفتكمش على أسيل ااه؟! 😒
حاصيلو موش مشكل....
أسيل طفلة مزيانة علخر بيضا وحرجها في الأكحل عينيها خضر كبار يدوخو وخشيمها صغرون وشفايفها روز وديما يلمعو حاصيلو تتڨرمش تڨرميش هي أنتيمة أريج الروح بالروح محسوب أختها قراو ما بعضهم مالسنة أولى ابتدائي حتاش للباك ومن وقتها كراو مع بعضهم دار وأسيل مشات تقرى تصميم أزياء من بعد حلت وأريج في أكاديمية الشرطة حاصيلو أسيل وأريج كبرو مع بعضهم في ملجأ الأيتام كيما قلتلكم قبيلة قراو مع بعضهم من السنة الأولى للباك وكي خذاو الباك خرجو كراو مع بعضهم من بعد قراو كل وحدة في جامعتها أما يروحو لنفس الدار حتى لين عامناول تخرجو وأريج والات بوليسة وفي ظرف عام رقاوها ولات كوميسار أما أسيل مسكينة مالقاتش خدمة لتوا أما عندها فلوس في البانكا تززيها وتعيشها حياتها الكل خاطر كانت ثما مرا كانت تجي لدار الأيتام ديما وعجبتها أسيل ولات تكفلت بمصاريفها الكل وكي توفات المرا هاذي كتبت ثروتها الكل باسم أسيل مع العلم أنو المرا هاذي ما عندهاش عائلة جملا حاصيلو ما نطولش عليكم نتصور راكم عرفتو أسيل بلڨدا أما أريج مازال عليها برشا كلام تو تفهمو من بعد😁) حطو العشا تعشاو ورقدو ....
نلقا تفاعل نهبط شابيتر الثالث 🔥🔥