روايه_المتيمه ❤️
-الحلقه الخامسه 5
#بقلمي نور الاسلام 🧘🏼♀️
ملاحظه""" تفاصيل الاعراس انا وحده من الناس منحبهاش نحس فاها ممله هلبا ف بنختصر الاحداث❤️
في الصاله🌷
ايمان:قاعده ع الكوشه ومن فرحتها حاسها روحها بطير سرحت شوي بخيالها وتذكرت كيف كانت علاقتها بمصطفى قداش مره تزاعلو وتصالحو نزلت دمعه من عينها مسحتها وتنهدت براحه وابتسمت ابتسامه عريضه وهيا تشبح في المعازيم كيف منسجمين مع الاغنيه يلي تصفق ويلي تاكل ويلي تصور في الماكله شبحت في منار لقتها ترقص مع راسيل والفرحه تبان من عيونهم دورت ع حنان لقتها جنب شاديه منزله راسها وباين انها تبكي 💔 وسناء متوتره هلبا ماشيه وجايه ع الطاولة خايفه يطلع حد مش واكل كل مره تمشي تتاكد من متاعين الصاله
الهام لابسه قفطان نص جسمها مكشوف وضابط هلبا ومكياج قوي هلبا و شاده تليفونها ومطبسه راسها شوي ومن حركاتها واضح ان تحكي فيديو 🤦🏼♀️
واستمرت الحفله لحد ماقالو مصطفى برا خش خدي عروسته وروح بيها ❤️
-----------------------------------
منار: واقفه قدام المرايه وتمسح في مكياجها وتمتم بروحها ،، اااه محلاني ياريته شبحني بالمكياج بالك يحبني زي ما اني نعشقه
حنان:فتحت الباب بشوي وقعدت تشبح في منار كيف فرحانه ودندن،
منار:وهيا تحول في الرموش شبحت في حنان،اخخخ لو تعرفي قداش حاجه كليت اليوم
حنان:ضمت ايديها لصدرها وقعدت تشبح فيها،نقولك حاجه،
منار:شبحت فيها،قولييي
حنان:خاطري نشبحك تبكي من لما بدي العرس ونتي كل همك شن بتاكلي بس اختك طلعت من هني خلاص معادش بتعيش معانا ونتي ولا همك
سناء: طالعه من المطبخ وماشيه للغرفتها وقفها صوت حنان وقفت وقعدت تسمع
منار:حطت ايدها ع طاوله الزيانه وايد ع خصرها وشبحت في حنان برفعه حاجب بصوت عالي،، ، به غصب عني نبكي يعني بلاه هبال ذايد شن هيا ماشيه للحرب ولا ماشيه للقبر علاش بنبكي علاها ان شاء الله بلاه فلسفه ذايده ترا وتعالي جاي تعالي تبيني نصدق ان انت تبكي ع اختك ولا تبكي ع خالد يلي مشي خطب غيرك ونتي من يومها شاده العزى في جرته فيقي ع روحك ومتخلطيش الامور ببعض طلعت اختك من هنى وبكاك ع خالد غير
حنان:فتحت عيونها وحست بكلام منار امواس في قلبها 💔قعدت تشبح فيها مده ودموع في عيونها، بصوت هادي، صحيتي هلبا صحيتى يامنار صحيتي
منار:بلعت ريقها وحست بروحها ذودتها معاها شوي خدت نفس،اسفه حنون بس
حنان:عطتها بظهرها و مسحت وجها وخدت نفس عميق،وخشت لسريرها وتغطت
