#حواديت ايممى

اسكربت ( لا تيأس ابدا )

طلاق !!
بابا وماما هيطلقوا !
كان اول مرة  بابا بيقولها لماما و كان بيقولها جد و معملش اعتبار ليا انى قاعدة
انا يارا بنت 17 سنة مليش اخوات و مليش غير بابا و ماما
لما لقيت ماما ابتدت تعيط و لما لقيتها بتلم شنطة هدومها علشان هتمشى وانا مش فى اعتبار حد
دخلت اوضتى قعدت اعيط و خرجت لقيت بابا قاعد متعصب قولت مش هكلمو يمكن الامور تتظبط لوحدها
شوية ولقيت اعمامى عندنا و انا مش مستوعبة يعنى اى بيتكلموا فى طلاق بابا و ماما فعلا  يعنى مهما يتخانقو المفروض يتصالحوا على الاقل عشانى  و لاكن مفكروش فيا خالص مع ان الموضوع دا يهمنى اكتر من اعمامى
دخلت اوضتى بردو عيط بحرقة على بابا و ماما
نمت حوالى 15 ساعه متواصلة من الزعل معقوله !!!
قومت ملقتش بابا موجود فى البيت و لا حتى حد حاول يكلمنى يطمن عليا
بقيت قاعدة مخنوقة من غير امى فعلا عرفت اهميتها فى وقت زى دا
امى لما كنت بضايق بقولها فرحانة بقولها جعانة زهقانة كنت بقولها كل حاجة و كانت بتحمسنى بتشجعنى كانت محور حياتى
بابا اللى لما كنت بطلب منو طلب بيوافق وكان دايما يخرجنى و يفسحنى
ولما كنت عايزة اروح رحلة افتكر خناقهم ان ماما مش عايزة تودينى علشان  خايفة عليا و بابا عايز يودينى علشان  يفرحنى
دماغى بتجيب فى مواقف حلوة بينى و بينهم
فجأة !!!!!
كل دا هيتهدم
فتحت التليفزين لقيت القراءن اللى شغال
فسيبتو
و حسيت براحة كبيرة
حسيت اد اى انا كنت بعيدة عن ربنا
حسيت بقيمة القراءن اللى انا هجراه
حسيت انى فعلا مقصرة حدا مع ربنا
ادركت انى مبصليش
ادركت انى لبسى مش كويس
ادركت انى بكلم ولاد
كل دا انا بعملو و انا مش واخدة بالى
كرهت نفسى اوى
شوية و خلص القراءن و لقيت برنامج دينى و فى متصل بيكلمو
المتصل : يا شيخ هو ربنا هيقبل توبتى انا عملت الكبائر
الشيخ : اه هيقبلها بس لازم يكون عندك نية
المتصل : الكبائر يا شيخ انا عملت الكبائر
الشيخ : ايوا الكبائر ربنا لان ربنا فاتح ابواب التوبة و الرسول صلى الله عليه وسلم قال و الندم توبة ولو وقعت فى الذنب تب و استمر فى حياتك و قال الله انكم تذنبون  بالليل و النهار  وربنا بيقول انكم لو استغفتوه ربنا هيغفرلكو
حسيت براحة نفسية و فعلا وقتها كان العصر لسة مأذن
قومت اتوضيت و صليت و دعيت ان ربنا يهدى بابا و ماما هارفة انو صعب بس ان الله على كل شئ قدير
وجيت اقرأ قراءن قراتو بس حسيتو صعب لانى بقالو فترة طويلة اوووى هجراه
فقومت و جبت التليفون و الهاند فرى
و شغلت سورة الكهف و عليت الصورة على الاخر
كل ما بسمع القرءان اعيط و انا معرفش لى لحد ما نمت تانى
وصحيت و فعلا قررت انى اسمع فيديوهات عن ربنا و الرسول
و عرفت ان اسهل عبادة هى الذكر زى
سبحان الله - الحمدلله - الله اكبر - الخ
فقعدت اذكر ربنا كتير
شوية و لقيت بابا جه هو و عمى
ومن معنى الكلام عرفت انو فعلا طلق ماما
ذكرت ربنا كتييير اوى
و المصيبة انى فهمت انو هيتجوز !!!
هو لحق دا لسة مطلق
قومت قرأت قران كتيير اوى برغم انو كان صعب عليا قرأتة بس كل ما بقرأ بحس براحة و بعدين لقيت المغرب اذن صليتو و لقيت فى ولد باعتلى ماسدج
فكرت شوية هل ارد ولا لا
قررت انى ارد و اعرفو ان دا اللى بنعملو دا غلط و مش هنتكلم تانى
طبعا الرد اللى كنت متوقعاه انو اتريق عليا
اضايقت انو اتريق عليا
و بعتلو فيديو ان كلام الولد مع البنت غلط و الفيديو بتاع التوبة و عملتلو بلوك
يمكن اضايقت علشان اتريق عليا بس دعيت ان ربنا يهديه
المهم صليت العشا و نمت
صحيت لقيت بابا قاعد فى الصالة روحت و قعدت و متكلمتش
لقيتو بيقولى : انتى عارفة انى خلاص انا و ماما اطلقنا بس انا هتجوز يمكن هيكون صعب عليكى فى الاول بس بعد كدا هتتعودى
بصتلو بدموع و قومت عيطت
و دعيت كتير
وعرفت ان علشان دعوتك تستجاب
ادعى وانتى فى السجود
وقبل و بعد الدعاء قولى اللهم صلى و سلم و بارك على سيدنا محمد
و قولى اسم من اسماء الله الحسنى فى الدعاء زى الله على كل شئ قدير .. الخ
طبعا دعيت
وقومت افتح فونى اول ما فتحت اليوتيوب لقيت العنوان صددمنى
( لماذا الله قاسى ..انا كرهت الصلاة اين الله نحن نتبهدل )
العنوان شدنى ودخلت على الفيديو
المتصل : انا تعبت انا بشتغل 3 سنين و تعبت اين الله هو الله خلقنا يعذبنا ..فين الرحمة...انا تعبت والله انا تعبت
الشيخ : اول شئ انك جرئ و عايز تعرف فين ربنا
المتصل : ابغى ان الله ما ياخدنى على هذا
الشيخ : لا لاان شاء الله  .. وكمل كلامو
قريش لما ارات الله  طلبو من  للرسول ( ص)انشقاق القمر  فشق الله القمر علشان يقتنعوا ان الله موجود
- ابراهيم علية السلام قال ارنى كيف تحىى الموت
و مش معنى انك قولت اين الله انك ملحد بل انت مريت بظروف تتساىل اين الله عنى
المتصل : تعبت يا شيخ
الشيخ : ربنا معيشك كل حياتك سعيد و اخر 3 سنين اللى تعبت فيهم فمن عدل الله ان يأتى بالموازنة يعنى عيشك عمرك كلو سعيد و 3 سنين شقاء يريك الله الرخاء لتعلم ان الدنيا تكفل بك و يريك الشدة لتعلم ان لدنيا رب ( الفيديو طويل اوى الصراحة 😂 بس دى الخلاصة يعنى )
كان فى سؤال بيدور فى دماغى و هو انى بقيت اصلى و اقرأ قران و ادعى ان بابا و ماما يرجعوا لبعض لاكن حصل العكس ان بابا عايز يتجوز كمان
سرحت
وافتكرت الاية اللى بتقول (  فإن مع العسر يسر  ان مع العسر يسر )  
ربنا قال الاية دى مرتين معنى ذلك ان الفرج قريب ان شاء الله
و بقيت ادعى و اعيط ان ربنا يقبل دعوتى
عدى اسبوع وانا على نفس النظام ملتزمة بالصلاة و بقرأ و بسمع قراءن
و لسة مفيش نتيحة شوفت فيديهات تانية بتتكلم عن الصبر و ان ربنا مع الصابرين
فقولت انى لازم اصبر
عدى شهرين  و بابا بيتكلم معايا بس مش زى الاول
شهرين  و بابا بيدور على عروسة !
شهرين دول وانا فيهم بتعذب
شهرين و انا بقول الحمدلله
المهم ان ماما خرجتنى علشان نشترى هدوم و قولتلها على قرارى ان لبسى لازم يكون محتشم مهو الجنة مش ببلاش
ماما فرحت جدا بقرارى دا و هى كمان قررت تلبس محتشم
المهم عدى كمان شهر
يعنى عدى 3 شهور على طلاق بابا و ماما وانا بتعذب كانو بيقولولى ان هتعود بعدين بس فى الحقيقة انا كنت بتعذب و مفيش اى نتيجة من دعائى
ببص فى المرايه على شكلى لقيت هالات سودة تحت عينى ووشى شاحب و حتى جسمى خس
قعدت لسمع قراءن تانى
و لقيت بابا داخل عليا الاوضة بيقولى فى مفاجاة فى الصالة
لما قالى كدا قولت يبقى اتجوز
بس معقولة بالسرعه دى
المهم خرجت لقيت ماما !!!!!
ماما ازاى
بصتلها بصدمة و هى بتبصلى بفرحة
يارا : فى اى انا مش فاهمه حاجة
بابا : انا و مامتك رجعنا لبعض
يارا وشها بدا ينور : بجد !!!
بابا و ماما كانو قاعدين جمب بعض روحت و قعدت جمبهم
بابا : مامتك اتصلت عليا و قالتلى انها حامل فقررنا نرجع لبعض و مش علشان كدا بس احنا رجعنا لبعض علشانك بس كنا محتاجين وقت نعرف قيمة بعض
فى الوقت دا عرفت اد ايه ربنا كريم
اخيرا بابا و ماما رجعو لبعض
و ماما طلعت حامل ف 4 شهور
يعنى هيبقى عندى اخ الفرق بينى و بينو 17 سنة
فررحت جدا انى هيكون عندى اخ
المهم فيوم يرحت و قعدت افكر
بالنسبة ليا طلاق بابا و ماما كان ابتلاء
بس قارنت بين الفترة قبل طلاقهم و ببعد طلاقهم
لقيت انى مثلا بقيت قريبة من ربنا
بقيت اصلى
بقيت البس كويس
ربنا هدانى و بقيت اذاكر
مش بقيت اكلم ولاد
حياتى اتغيريت رأسا على عقب
بس اتغيرت للاحسن
________________
- مش كل اللى بيحصلنا نتيجتو وحشة
- اى مشكلة تقابلك استعينى بالصبر و الصلاة و حولى تحليها مش تستسلمى
- اى وقت تكونى فيه حزينة و ترجعى لربنا ربنا هيطمن قلبك ❤
- طبعا لازم تكونى مع ربنا فى السراء و الضراء يعنى مش تفتكرى ربنا بس وقت الحزن لا وقت الفرح قبل الحزن
- و لما تزعلى قومى ادعى والحى بالدعاء  هيخفف كربك بإذن الله ❤
_____________