اسكريبات 🔥❤

اسكريبت جديد 💦

من حوالي ٣ ايام ، رقم غريب رن عليا ، ٣ مرات بالظبط  . وانا عشان كنت بصلي ف مردتش عليه .
بعد ما خللصت صلاة،  جيت ابص على التليفون تاني ، حاولت ارن عشان اعرف مين ، بس محدش رد عليا ،
ف قفلت التليفون كالمعتاد ، وكملت يومي !

..........

تاني يوم ف نفس المعاد الموضوع اتكرر،  بس ساعتها كنت قاعدة عادي ، مش بصللي ف فتحت بسرعة و رديت ب
= ايوا مين
- لسا فاكرة صوتي ؟
= انا اسفة الشبكة بتقطع؟
الو
الو ..
حضرتك سامعني؟
" ومعرفتش حتى أميز مين بيتكلم  ،  كان عايز اي .. ف قفلت التليفون عشان الشبكة. 
بعدها بنص ساعة ،، رن تاني
اضطريت افتح تاني
هو : هو موجود على فكرة  !
وقفل  ..
: مفهمتش بردو قصده ، مين دا اللي موجود !! ومين اللي اتصل بيا كتير اوي كدا عشان يقولي الكلمتين دول !
قولت تلاقيه واحد غلط في رقم التليفون ، وكان بيحسبني حد يعرفه تاني واللا حاجة !
يومها حلمت بحلم غريب اوي ،وابتدى الحلم يتكرر معايا كل يوم
كل يوم احلم بولد صغير عنده شعر احمر ، بينادي عليا من قدام بيت مهجور كبير ، ويقولي متمشيش،،،
......
انا من النوع اللي مش بيحلم كتير .عشان كدا  ، اول مرة حلمت الحلم دا ، صحيت من النوم مفزوعة جامد من شكل الطفل ، وخوفي عليه  ، كانه كان خايف من حاجة ، وبيستنجد بيا .
كل يوم رغم انشغالي في العيادة ، وشغلي الكتير طول اليوم ، إلا أن موضوع الحلم مكانش بيروح من بالي،  تفاصيل الحلم بتتكرر بنفس الأحداث. 
عدى اسبوعين ،، والموضوع بدا يقلقني اوي ، حاولت احكي لماما،  إلا أنها قالتلي،  ممكن متهيألى ،عشان انا دكتورة اطفال ، فممكن عشان بتعامل مع أطفال طول الوقت ..

بس لما الحلم يتكرر بالشكل دا معايا  دا معناه ان فيه حاجة غلط انا مش فاهماها
..........
تاني يوم صحيت ع نفس الحلم تاني .. اللي خلاص من كتر تكراره،  بقى روتين معين، وجزء من يومي .
  كل يوم اصحى بلا مبالاة على نفس الحلم !
بس فيه اسئلة بتدور ف دماغي اوي ، هل يا ترى الطفل دا موجود في الحقيقة فعلا !!
روحت العيادة، واخدت من سها " الممرضة " الكشوفات، ودخلت كالعادة البس الماسك واجهز نفسي عشان اقابل المَرضَى !

خلصت الكشوفات بدري ، عن كل مرة ،  ف حبيت اني انزل اتمشى في شوارع القاهرة كالعادة ، مع محمود ، - صديق طفولتي - اتربينا سوا ، وكبرنا سوا ، وكننا في نفس المدرسة ، ونفس الفصل ، ولما روحنا الكلية ، كننا نفس القسم .. محمود بيحب الاطفال من صغره اساسا .. وكمان اشتغلنا مع بعض في نفس المبنى !
وانا ماشية .. حكيتله الحلم،  وهو استغرب جدا زيي بالظبط، ولسا بيتكلم ، لاقيت ايد بتشد في هدومي،
ببص لاقيت طفل صغير بنفس الشعر الاحمر،  بس ملامحه متغيرة شويتين  ، بيقولي عايز ياكل وبيشاور على (بقه) .
وشه كان مليان جروح، ولبسه كان متقطع ، ف اتخضيت ، لكن ف نفس الوقت اتضايقت اوي من شكله دا ، وأنه اد ايه طفل مسكين جدا ، اي اللي يخلي طفل كدا ف الشارع لوحده، بمنظره ده .
محمود نزل على ركبته يكلمه، و يقوله فين مامته او باباه او حتى اي حد من عيلته الا ان الطفل .. مكانش بيرد بأي حاجة غير أنه عايز ياكل  . فأخدناه انا ومحمود على مطعم قريب ، واشتريناله اكل ،وأكلناه ، وبعدها محمود ساله تاني .
محمود : اسمك اي ياعسل ؟
الطفل: عمر
محمود : وفين بابا ومااما ؟
الطفل.. بكل تلقائية شاور عليا وقال : ماما !
بصينا لبعض انا ومحمود في نفس الوقت !
واستغربنا ردة فعل الولد .
ف محمود ساله تاني
محمود : طيب فين بابا يا عمر
الولد مردش على السؤال وكان مشغول باللعبة اللي محمود اشتراهاله .
ف انا بصيتله تاني وسالته نفس السؤال .
ف بصّلي جامد وقالي : هو مستنيكي!!
هو مين دا يا عمور اللي مستنيني ؟
عمر : بابا محمد !!
= وهو فين بابا محمد يا عمر ؟
عمر : مش عارف
محمود : طيب فين بيتك يا عمر يا حبيبي عشان نوصلك !
قاطعنا النادل بتاع المطعم !
جماعة انا عارف الطفل دا !!
بصيتله بكل تلقائية ..
= كممل احنا سامعين حضرتك  !
النادل: الطفل دا عايش في الشارع اللي جنب للمطعم مع جدته فبيت قديم هتلاقيه ف الوش ف اخر الشارع دا حضرتِك!
محمود : تمام شكرا
تعال ي عمر يللا عشان نروح ل تيتا 
عمر : لا انا عايز ماما وقعد يعيط جامد وهو ماسك فيا  !
محمود كلمه بالراحة،  وقاله هنيجي معاك، لحد ما سكت ورضي. 
فِضل ماسك في ايدي جامد ، لحد ما وصلنا البيت ،
خبطنا على الباب ، محدش كان بيرد علينا !

محمود حاول يدخل عشان يشوف مين جواا الا انه دخل وقعد ينادي كتير اوي ، صوته بدا يبعد اكتر ف اكتر لحد ما اختفى !
حسيت بخوف شديد ، وعمر قعد يعيط جامد ، وانا بدات اقلق . ف نديت يا محمود اكتر من مرة بس محدش كان بيرد!
عمر:
هي مش جوا !
هي راحت تجمع الحطب عشان تاكل !
=هي مين يا عمر
عمر : الست الكبيرة اللي هنا ، هي مش هنا دلوقتي !
مرة واحدة لاقيت محمود واقف قدامي
ف اتخضيت اوي
محمود : مفيش حد جوا !
= طب هي هتيجي امتا ي عمر !
عمر : هتيجي كمان شوية ،،
عمر : شد ايدي وقالي انا مش عايز اروحلها، انا عايز اخليني مع ماما !
واشتغل عياط تاني !!
اتوترت وبصيت لمحمود
وبصيت لعمر وهو بيعيط وحاولت اهدّيه تاني الا انه مكانش راضي يسكت.
ف محمود اتعصب من عياطه مرة واحدة،  وقاله اصبر شوية وزعقله!
ف عمر سِكت مرة واحدة وبرّق لمحمد جامد وقاله:
هخلي بابا محمد يدبحك بالسكينة  !
مع انه طفل صغير ، إلا أن نبرة صوته وهو بيقول الجملة دي اتغيرت فجأة ، لدرجة اني حسيت ان اللي قدامي دا مش عمر الطفل البرئ !!

ف بدلت اخاف وايدي سابت ايده بالراحة
ورجعت لورا ووقفت ورا محمود !
.......
مرة واحدة لاقيت واحدة عجوزة طالعة من البيت ، ضِحكتها غريبة اوي ، بتقول :
نوّرتوني ! 
انتو لاقيتوا عمر ؟
ااه على الولد الشقي ؟ دا هو غلبكوا!!
ومِسكِته جامد من دراعه وزقته جوا البيت !
انا ومحمود اتخضينا مرة واحدة.. لان من شوية صغيرين بس، محمود كان جوا ، ومكانش فيه اي حد في البيت !
رجعت لورا وانا مش عارفة اقف من كتر التوتر والخوف منها ومن شكلها !
كانت عجوزة اوي تحس سِنّها فوق ال ٧٠ سنة .. شعرها ابيض اوي اوي وتقييل، وعاملاه ضفيرتين على الجمبين ، و لابسة عباية قديمة لونها اسود وف ايديها حطب محروق  !!
محمود حاول يمسك نفسه هو كمان ، وقالها الولد دا تايه منك يا حَجة ورجعناه!
هي : شكرا ي ابني تعبناكو، 
اسمِك اي يا عسل انتي كمان ؟
= ... ن ندين
هي : اسمك حلو يا ندين  ، بتفكريني بالمرحومة!
كانت شبهك بالظبط ، تبقى ام عمر ، بس هي مكانتش حلوة زيك كدا !
محمود : شكرا يا حجة ، احنا اسفين مضطرين نمشي دلوقتي !
لا لا ميصحّش ابدا ، احنا لازم نضايفكو حاجة ، 
...............................
يتبع

........................

انا اسفة بس الأجزاء مش هتنزل مره واحده على ما اكتبها.

ي رب تعجب الكل واتمنى تقولولي رايكو وتوقعاتكوا باللي ممكن يحصل فيها  ف كومنت وحطوا فوت.

دمتم بخير  ❤