اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
فيه حاجة من فترة عايزة اتكلم فيها ومش مترددة اني اتكلم فيها الا وهي علاقتك بالولد الي حضرتك المفروض انك بتحبيه .....
اولا فيه فرق بين حب وبين رغبة ايه هو الفرق ؟!
ببساطة شديدة الحب ده بيبقي من غير اسباب يعني متبقيش من جواكي عايزة حاجة غير انك تشوفي اللي بتحبيه ده مبسوط ومرتاح ،، مفهوم الحب ذات نفسه مش رغبة جسدية وبس الحب شئ اسمي من كده بكتير لو بضحكة او بنظرة طيبة او بكلمة حنينة هتحسي انك راضية
اما الرغبة ففي مثل بيقول " مش بيملي عينهم غير التراب "اهو التراب ده زي الرغبة بالظبط في ايه ؟!
في انه بيحول مشاعر الانسان لمشاعر جافة مع مرور الوقت مبيهمهاش غير انها تشبع غريزة معينة فيها الا وهي غريزة الجسد ،،، ادمان بيحتل كافة الاعضاء وتساؤلات مش بتنتهي " ياتري هيحصل بينا ايه ؟! ،، يعني انا نفسي انه يمسك ايدي " انا نفسي اترمي في حضنه " انا نفسي انا نفسي ..... وللاسف للاسف كمان مرة البنت هي الي غريزتها بتشد الراجل ليها يعني البنت طالما حست بالأحاسيس ديه يبقي عليه العوض ومنه العوض ....
انا هجاوبك علي سؤال سؤال براحة ...
اولا هيحصل بينكوا ايه ؟ لا يا اوختشي والله فيه بلاااااوي ممكن تحصل يا ببلاوي .... اولا الفكرة طالما في مخك وطالما انتي معتقدة ومؤمنة انه لازم اي اتنين بيحبوا بعض بيحصل بينهم حاجة تغضب ربنا يبقي عمر الفكرة ديه ما هتخرج من دماغك وهتبدأي تتصرفي علي الاساس ده ..
هيمسك ايدي ؟
طبعا طبعا وهيبوسها كمان....ومش قبلة بريئة يا حبيبة قلبي عشان معظم البنات فاكرة انه قبلة الكف او اليد هي الي عادية والباقي سبايسي لا يا اوختشي مفيش الكلام ده كل لمسة منه ليكي وكل احساس ليكي بالاستمتاع والانتشاء ده بيعتبر زنا اه والله زمبقولك كده
انا نفسي اترمي في حضنه ؟
حلو اوي التخيل مش كده .... وهيحصل اه والله لو انتي سمحتي بيه فهيحصل اصل عايزة اعرفك حاجة الولاد او الشباب او الرجالة ولو انه ميعتبرش راجل الي يفكر يعمل كده في بنات الناس مش بيقف علي محطات بيعمل كل حاجة نفسه فيها ومن غير تأنيب ضمير ...
كلمة وهمسة وبعديها حضن ومسكة ايد وبعد كده تمادي وتمادي وتمادي وهتلاقي نفسك ضيعتي نفسك عشان واحد في الآخر هيقولك باي باي ...
بصوا يا بنات مفيش راجل محترم هيقبل انه يتجوز بنت باسها او حضنها قبل كده لان انتي بتبقي في نظره قليلة لدرجة انه هيكرهك في اليوم الي سلمتيله نفسك فيه ....ولنفترض انه طلع ابن حلال واتجوزك هيفضل يزل ويعر فيكي طول حياتك ..
يا بنات المعتقد الي فاهمينه عن الحب ده غلط والله غلط جدا جدا جدا كمان انا عارفة ان كل بنت نفسها تعيش قصة حب خيالية زي الروايات بس اديني قلت خيالية يعني قصص الروايات اغلبيتها مش واقعية هيا بس بتملي شعور جواكم عشان متروحوش تملوه في حتة تانية ...
حافظوا علي نفسكم البنت ماهي الا سمعة ...لو سمعتك ضاعت مفيش حد هيندم غيرك الولد الي يقولك هاتي بوسة وبعديها هاتي حضن وبعديها احنا عايزين نقضي يوم سوا وبعديها ابعتيلي صورك وانتي عريانة والله ده مش راجل ولا شم ريحة الرجولة اقسم بالله لو راجل كان اتقي ربنا فيكي وخاف عليكي منه هو شخصيًا ....
واخيرا انا مش بقولكوا نصايح وانا مش بعملها لا انا بعملها قبلكوا والله وعرفت ان الحب مش كل حاجة فيه حاجات بديلة عنه لحد ما يجي الشخص الصح في الوقت الصح بحيث انه تبقي علاقة نور مش ظلام ...
وكل سنة وانتم طيبين وعايزاكوا تثبتوا نفسكوا سنجل ولا مرتبط ......😂😂♥♥ جوزاء جوزاء يعني 😂😂😂
