ضرغام قرب حتى وقف عليها بديك الطولة و التجريدة و العضلات تيشوف فيها بنضرات مامفسرينش ابدا بينما هي رجعات خطوة للوراء تتقفقف و ترعد فبلاصتها القتلة لي عطاها يالاه مامشاو اثارها بالبومادة و دابا جاي يعاود ليها وحدة خرى ولا شنو؟..رفيف حداه تدعي ربها يوفي بكلمتو و مايتهوورش و يهز عليها يدو خصوووصا بوجود هاد الجوجات لي باينين من عائلة قوس و جاو لعندو...
ضرغام: عذراء!
ترف هزات فيهوم عينيها باستغراب خصوصا فعذراء لي تترعد بحالا شافت شي جن و فابيين مستغربة حتى هي...
و اخيرا نقزات رفيف و هرسات التوتر لي بيناتهوم: احم انا رفيف الأخت ديال عذراء و هدا خونا ضرغام جينا نزوروهاا
ترف بتاسمات: ااه وي(مدات يديها)
سلمات معاها رفيف و دازت سلمات مع ضرغام لي صافحها بديك الخباطة مخليها مبعدة منو بتعجب حاسة بهالة محيطة بيه مخلياها متوترة واش حيت تتبان ليها عذراء غتبول فحوايجها فاش شافتو ولا حيت السييد ماراضيش يكون هنا اصلا..سلمات معاهوم فابيين حتى هي و هي تسبق رفيف...
رفيف:اجيو نسبقو للصالة من فضلكوم دابا غيلحقو علينا
مشاو و و اخيرا بقاو غير هاد جوج خوت الراس فالراس..الكوافورة تسرط لسانها ولاو فيها غير العينين لي مخرجاهوم بالخلعة اما هو فاش عرف انه الساحة خوات اشار ليها تجلس فالجليسة د الفوتويات لي كانت حداهوم تما..ماعاوداتش معاه الهضرة لي ليها ليها الى قرب ليها يضربها هاد المرة غتهرب و تعييط لقوسها مالو فدار باه و كاينة السيبة ولا راهو فدار حبيبها لي حماها من كلشي و الى تجرأ يقيسها غيوريه شنو تيسوا غير هي لي شداتو عليهوم فاش ساق الخبار اول مرة للحالة لي دارو ليها..جلس ضرغام متقابل معاها و شاف فيها...
ضرغام: لباس عليك؟
عذراء مبلقة فيه دوك العينين: ل ل ل لاباس ك كيدرتي جيتي؟
ضرغام: جيت لعند رفيف و سياحة هنا (بصرامة)و نتي صدقتي غتزوجي؟!
عذراء جمعات قوتها: ااه غنتزوج داكشي علاش مابقا عندكوم الحق تقيسوني ولا تضربوني!
ضرغام: مالين الدار مافراسهومش هادشي و انا مابقيتش مسوق لهاد العادات و التقاليد اصلا
عذراء بدهشة: وايلي؟؟؟؟
ضرغام: ضربتك حيت كنتي عاطياها لضوران مع راجل غريب و فكرت انه غير تيتفلا عليك حيت لباس عليه ولكن الى غيتزوج بيك انا ماشغليش فهادشي!
عذراء مامصدقاش اش تيسمعو ودنيها: ا انا يتصحابلي بلي كلكوم تتعبدو دوك العادات...
ضرغام: الواليد لدابا مزال ماحييدك من الحالة المدنية واخا كاع داكشي لي درتيه و واخا هربتي و واخا قالتها ليه جدة و واخا ضربك و كلشي و انطلاقا منو تعلمت و عرفت انه الواليدين واخا يوقع لي يوقع حتال ولادهوم تيفضلو الموت على ينكروهوم
عذراء غرغرو عينيها من كلامو و هي لي يتصحاب ليها بلي ضربو عليها و شطبوها من الحالة المدنية و نساوهاا بحال الى غير زايدة و زبالة ماشي بنتهوم و طرف من كبدتهوم بقات بالبكاوات تمايا حتى لحقات عليهوم رفيف لي جلسات الجوجات فالصالون و خلات الخدامات تيضييفوهوم...
عذراء شافت فيها بدوك الدموع: مانكرونيش ا رفيف(عنقاتها تتبكي فحضنها)
رفيف معنقاها تتهدنها: لا مانكروكش غير كوني هانية
ضرغام ناض: لي بغيت نقولو قلتو و غنسالي كلامي بمبروك
رفيف شافت فيه: فين غادي؟ بقا مزال شوية
ضرغام: لا غنرجع بغيت نرتاح
رفيف: واخا قول للشيفور يوصلك للفيلا و الى وصلتي و قول للخدامة توصلك لبيتك
حرك ليها راسو و مشا مخلي الكوافورة ماباغياش تسكت من البكا...
رفيف: وا صافي دابا تبكيني حتى انا تفو على سلعة نوضي غسلي وجهك و دوزي ضحكي لضيوفك
عذراء: واخا سيري عندهوم دابا غنجي
ناضت مشات للطواليت حتى غسلات وجهها مزيان و لحقات عليها لقات الخدامات زوقو الطبلة بالماكلة...
عذراء جلسات تتبتاسم: مرحبا بيكوم ههه واش قوس فخبارو ولا نعييط ليه؟(السييد راه خدام اشمن تعييطي ليه)
ترف: لا ماخباروش جينا غير نشوفوك و صافي حنا عارفينو بلي خدام فهاد الوقيتة ههه
عذراء: ا ااه واخا(شافت ف فابيين و تتبتاسم) ماقالتش ليا عجوزتي كيف جيتها(ديريكت)
فابيين صدماتها شوية بهاد الدخول لي فيها ديريكت فبنادم ماتوقعاتش تصارحها فالكلام نيشان: ام ااه زوينة و غزالة
عذراء مبتسمة عاجبها الحال: عويناتك لي زوينين و لي ولدو الزين هههه
ترف تضحك: هههه هادشي باش تتعجبني عذراء مافيهاش الزواق ا ماما تتحسي براسك داوية مع بنادم ماشي بلاستيك
فابيين مبتسمة ليها: هادشي علاش خوك متعلق بيها لهاد الدرجة...
♍عَــــــذْرَاءْ وَ قَــــــوْسْ♐
للكاتبة✒️: Victoria kaelin
أنت تقرأ
عــــذراء و قــــوس♍️♐|🇲🇦
Storie d'amore⛔ممنوووووع الإقتباااس جميع الأفكاار و الأحداااث من مخييلتي الخاصة⛔ ___________________________________________ ♍عَــــــذْرَاءْ وَ قَــــــوْسْ♐ ✑𝓥𝓲𝓬𝓽𝓸𝓻𝓲𝓪 𝓚𝓪𝓮𝓵𝓲𝓷 ___________________________________________ في عالم بحال ديالنا غير هو ه...
