الفصل الأول
___الغياب جمرة تحرق القلب___
أسميتك رحمة لترحمى من فى الأرض فيرحمك من فى السماء..
أنثرى ورود الرحمة فى طريق الناس لتحصدى عبق الذكرى بعد الرحيل..
هديتي أنتى فصيرى هدية لكل من يصادفك فى طريق الحياة..
وكونى له .....رحمة تُرجى.
كانت تتذكر كلمات أمها الحبيبة وهي تروى زهورها الجميلة،تتمتم بتلك الكلمات مرارا وتكرارا كي لا تنسى،فالأهم من الحب هي الرحمة ،قد نستطيع الحياة دون الحب ولكننا بالتاكيد لا نستطيع الحياة دون رحمة.
إبتسمت برضا ،قبل أن تغادر الشقة وتتقدم بإتجاه الشقة المقابلة،تطرق الباب برقة ثم تدلف إليها ،تستنشق رائحة الفلافل التى تعشقها،تقول بإستمتاع :
-الله الله ياطمطم ،إيه الروايح الجميلة دى،نزلتى جبتى الفلافل دى إمتى بس؟
وضعت (فاطمة)طبق السلطة على الطاولة وهي تقول بإبتسامة:
-وإنتى على السطح بتأكلى الفراخ ،يلا بقى تعالى إعملى الشاي،ابن خالتك على وصول وانتى عارفة إنه مبيحبش الشاي غير من إيديكى.
تبعتها (رحمة)إلى المطبخ ،تعد الشاي وهي تقول:
-صحيح هو إيه اللى أخره لحد دلوقتى ياخالتى؟
قالت (فاطمة) وهي تقرصها من وجنتها بخفة:
-كان بيجيبلك الكتاب اللى انتى قلتيله عليه ياقلب خالتك.
إبتسمت (رحمة)قائلة بحب:
-بجد ياخالتى؟!أنا مش عارفة أقولكم إيه،من يوم ما ماتت أمي وجيت عشت بينكم محسيتش انى لوحدى أبدا،ولا حسيت إنى محتاجة حاجة،ولما رجعت عشت هنا تانى فضلتم مكملين معايا وآخدين بالكم منى وكأنى فعلا بنوتك ياطمطم وجلال زي أخويا،ياريت كان فى إيدى حاجة ممكن أرد بيها جميلكم علية ،كنت قدمتهالكم بكل حب،بس مفيش غير دعواتي اللى بدعيهالكم فى صلاتي ليل ونهار.
ضمتها (فاطمة)قائلة:
-جميل إيه ياخايبة؟!ماإنتى قلتيها بنفسك يارحمة،انتى بنتى اللى مخلفتهاش وجلال...أهو زي أخوكى ،يبقى مسمعش الكلام العبيط ده تانى،آل جميل آل،الجميل مات محروق ودفناه من زمان ياعين خالتك.
إبتسمت(رحمة)وهي تستكين داخل صدر تلك السيدة الطيبة،يغمرها حنانها كما عودتها دوما،لتشعر....بالوطن.
صدح صوته وهو يقول بمزاح:
-بتخونيني ياأمي ومع مين؟مع رحمة؟!
خرجت (رحمة)من حضن (فاطمة)بينما تقول (فاطمة):
-بس ياواد بلاش هزار،ويلا غير هدومك بسرعة عشان نفطر،أنا عصافير بطني صوصوت.
إقترب منها رافعا حاجبيه قائلا:
-عصافير بطنك عملت إيه يابطة؟!
ضربته على راسه بخفة قائلة:
-صوصوت،عندك إعتراض؟!
نظر إلى معدتها الممتلئة قليلا وهو يقول متمتما:
-هم مش عصافير وغالبا فيلة بس نمشيهم عصافير وماله.
أنت تقرأ
الحب رحمة تُرجى
Romanceمقدمة قد نبحث عن مشاعر كثيرة فى قلوب أحبتنا كالحب والشوق والاهتمام ولا ندرك أننا مانبحث سوى عن رحمة تُرجى فى قلوبهم فالجميع قادرون على الحب والإهتمام ولكن القليل فقط من هم قادرون ...على الرحمة.
